(ටී.කේ.ජී.කපිල )

ව්‍යාපාරිකයෙකු  විසින් මෙරටට ගෙන ආ  රුපියල් විසි හත් ලක්ෂ තිස් දහසක් වටිනා රත්තරන් පෙන්ඩන්ට් 04 ක් , කටුනායක ගුවන් තොටුපොළේ දී සොරා ගෙන ගිය තවත් ව්‍යාපාරික  කාන්තාවක් ගුවන් තොටුපොළ පොලිසිය මගින් අත් අඩංගුවට ගෙන තිබේ .

ඔහු කොළඹ - 10 ප්‍රදේශයේ පදිංචි 45 හැවිරිදි , නිතර  ගුවන් ගමන් වල නිරත වෙමින් , විවිධ භාණ්ඩ වර්ග මෙරටට රැගෙන විත් අලෙවි කිරීමේ ව්‍යාපාරයක යෙදී සිටින පුද්ගලයෙකි .

ඔහු එරට දී ග්‍රෑම් 118 යි මිලි ග්‍රෑම් 980 ක් බරැති රත්තරන් පෙන්ඩන්ට් 04 ක් මිළදී ගෙන තිබේ .

එම පෙන්ඩන්ට් 04 , අත පිසිනා කඩදාසි ලේන්සු දෙකක ඔතා , බ්‍රවුන් පේපර් කඩදාසි බෑගයක බහා ඇත්තේ , පිටතට චොක්ලට් ලෙස පෙනෙන පරිදිය .

ඔහු විසින් රැගෙන ආ අනෙකුත් භාණ්ඩ තොගය , ගුවන් තොටුපොළ ට්‍රොලි කරත්තයක පටවා , ඔහු හදුනන තවත් ව්‍යාපාරික කාන්තාවක් වෙත , ගුවන් තොටුපොළෙන් පිටතට රැගෙන යන ලෙස පවසා ගුවන් තොටුපොළ තීරු බදු රහිත සාප්පු සංකීර්ණයේ දී  භාර දී තිබේ .

ඇය මෙම ට්‍රොලි කරත්තය , ගුවන් තොටුපොළ ට්‍රොලි කරත්ත තල්ලු කර ගෙන යාම සදහා සිටින  '' පෝටර්වරයෙකු " යොදා ගනිමින් , ගුවන් තොටුපොළ රේගු පරිශ්‍රයේ කිසිවක් ප්‍රකාශ කිරීමට නොමැති , හරිත මාවත ඔස්සේ පිටතට රැගෙන විත් , භාර දී තිබේ .

ඇය 43 හැවිරිදි මීතොටමුල්ල , වැල්ලම්පිටිය ප්‍රදේශයේ පදිංචි , ගුවන් මගින් විවිධ භාණ්ඩ මෙරටට ගෙනැවිත් අලෙවි කිරීමේ නිරත ව්‍යාපාරික කාන්තාවකි .