(ගයාන් සූරියආරච්චි සහ බිමල් ශ්‍යාමන් ජයසිංහ)

ඩුබායි රාජ්‍යය මගින් අත්අඩංගුවට ගෙන අපරාධ පරීක්ෂණ දෙපාර්තමේන්තුවේ නිලධාරීන් විසින් මෙරටට රැගෙන ආ සැකකරුවකුගෙන් කළ ප්‍රශ්න කිරිම්වලදී ඝාතනයක් සදහා යොදාගත් ගිනි අවියක් නුගේගොඩ ප්‍රදේශයේ වළදමා තිබියදී අපරාධ පරීක්ෂණ දෙපාර්තමේන්තුව විසින් සොයගනු ලැබීය.

ඩුබායි රාජ්‍යයට නිකුත් කළ රතු වරෙන්තු මත එම සැකකරු ඩුබායි පොලිසිය විසින් අත්අඩංගුවට ගෙන තිබුණි. ඒ අනුව අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් ඩුබායි රාජ්‍යයට ගොස් සැකකරු ඉකුත් 12 වැනිදා මෙරටට රැගෙනවිත් තිබුණි.

එසේ ඩුබායි සිට මෙරටට රැගෙන එනු ලැබූවේ නුගේගෙඩ, ජම්බුගස්මුල්ල ප්‍රදේශයේ පදිංචිව සිටි අවුරුදු 45ක ව්‍යාපාරිකයෙකි.

අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශයේ නිලධාරීන් විසින් සැකකරු අධිකරණයට ඉදිරිපත් කිරීමෙන් අනතුරුව දින 90 ක රැදවුම් නියෝග ලබාගෙන තිබුණි.

 ඒ අනුව සිදුකළ විමර්ශනවලදී සැකකරු පුද්ගලයකුට වෙඩි තබා ඝාතනය කර ඩුබායි රාජ්‍යයට පලාගොස් සැගව සිට ඇති බව අනාවරණයවී ඇත.

සැකකරු එම ඝාතනය සදහා යොදාගත් බ්‍රවුනින් වර්ගයේ පිස්තෝල ගිනි අවියක් නුගේගොඩ, ජම්බුගස්මුල්ල ප්‍ර දේශයේ ඉඩමක වළදමා ඇති බව අනාවරණයවීමෙන් අනතුරුව එම ගිනි අවිය පොලිස් නිලධාරින් විසින් සොයාගනු ලැබීය.

අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශයේ අධ්‍යක්ෂ ලකී රන්දෙණිය මහතාගේ උපදෙස් පරිදි මනුෂ්‍ය ඝාතන හා සංවිධානාත්මක අපරාධ විමර්ශන අංශය වැඩිදුර විමර්ශන සිදුකරයි.