(යොහාන් භාසුර)

පාර්ලිමේන්තුව නියෝජනය කරන සියලුම මහජන නියෝජිතයන් එකතුව වහාම ජාත්‍යන්තරයට පිළිගත හැකි ආණ්ඩුවක් පිහිටුවිය යුතු බවත් එසේ නොකරන්නේ නම් සියලුම පාර්ශව සමඟ එක්ව දැඩි තීන්දුවක් ගන්නා බවත් ශ්‍රී ලංකා පරිපාලන සේවා සංගමයේ සභාපති රෝහණ ද සිල්වා මහතා අද (20) පැවසීය.

පාර්ලිමේන්තු මන්ත්‍රීවරු පසුගිය දේවල් කථා කරමින් සිටීම නතර කර වර්තමානයේ මුහුණ දී සිටින ආර්ථික ඇර්බුදයෙන් ගැලවීම සඳහා ජාත්‍යන්තර සහය ලබාගැනීම සඳහා අවශ්‍ය පාලන ව්‍යූහයක් වාහාම නිර්ණය කළ යුතු බව කී රෝහණ ද සිල්වා මහතා පැවසුවේ රට ඉල්ලන වෙනස ලබාදීමට අපොහොසත් වන්නේ නම් සමස්ත රාජ්‍ය සේවය එකතු වී බලකිරීමට කටයුතු කරන බවත්ය.

රජයේ සේවකයා ස්වාධීන කිරීමේ පළමු පියවර 21 වැනි ආණ්ඩුක්‍රම ව්‍යවස්ථා සංශෝධයට ඇතුළත් කළ යුතු බවත් එසේ නොවුණ හොත් රාජ්‍ය සේවය තව දුරටත් දේශපාලඥායන්ගේ බලයට යටත්වන බවත් රෝහණ ද සිල්වා මහතා කීය.

රට වර්තමානයේ මුහුණ දී සිටින අර්බුදයෙන් ගලවාගැනීම සඳහා ආහාර අර්බුදයට විසඳුමක් ලෙස ‘සාර ශ්‍රී ලංකා ’ නමින් වැඩසටහනක්, ක්ෂේත්‍ර 16 ක් එක්කරමින් ජාතික ප්‍රතිපත්ති රාමුවක්, සාර්ව පාක්‍ෂික එකඟතාවකට බලකිරීම සහ රාජ්‍ය සේවය ස්වාධීන කිරීම ප්‍රමුඛ 19 වැනි ව්‍යවස්ථා සංශෝධනයට එහා ගිය 21 වැනි ව්‍යවස්ථා සංශෝධනය යන කරුණු සම්බන්ධයෙන් කටයුතු කරන බවත් සභාපතිවරයා වැඩි දුරටත් පැවසීය.

කොළඹදී අද (20) පැවැති විශේෂ මාධ්‍ය හමුවකදී රෝහණ ද සිල්වා මහතා එසේ පැවසීය.

එහිදී අදහස් දැක්වූ ශ්‍රී ලංකා පරිපාලන සේවා සංගමයේ නියෝජ්‍ය සභාපති ධම්මික මුතුගල මහතා පැවසුවේ 21 වැනි ව්‍යවස්ථා සංශෝධනයට රට හරි මඟට ගැනීම සඳහා අවශ්‍ය කරුණු ඇතුළත්ව නොමැති බවත් අමාත්‍ය මන්ඩලය 20 කට අඩු කරන ලෙස යෝජනා කළ ද එය තව දුරටත් අමාත්‍යවරුන් 30 ක් සහ රාජ්‍ය අමාත්‍යවරුන් 40 ක් ලෙස පවතින බවත්ය.

එම සංගමයේ නියෝජ්‍ය සභපාති රංජිත් ආරියරත්න මහතා එහිදී පැවසුවේ වර්තමානයේ රට මුහුණ දී සිටින අර්බුදය හමුවේ ජනතාව ආහාර, ඉන්ධන සහ විදුලිය වැනි දේවල් අරපරිස්සමින් පාවිච්චි කළ යුතු බවත්ය.

ශ්‍රී ලංකා පරිපාලන සේවා සංගමයේ සාමාජිකා අනූෂා ගෝකුල මහත්මිය ද මෙම මාධ්‍ය හමුවේදී අදහස් දැක්වූවාය.