(විමුක්ති එස් රුද්‍රිගු)

එක්සත් ජාතීන්ගේ මහා මණ්ඩලය විසින් ජාත්‍යන්තර වෙළඳ නීතිය පිළිබඳ එක්සත් ජාතීන්ගේ කොමිසමට පසුගියද 20 වැනිදා තෝරා පත්කර ගන්නා ලද සාමාජිකයන් 31 දෙනා අතරට ශ්‍රී ලංකාවද ඇතුළත්ව ඇත.

ජාත්‍යන්තර වෙළඳ නීතිය පිළිබඳ එක්සත් ජාතීන්ගේ කොමිසමේ අසුනක් දිනා ගැනීම සඳහා ශ්‍රී ලංකාව අසියා ශාන්තිකර කලාප කණ්ඩායමෙන් තරඟ වැද ඇති අතර එහිදී ශ්‍රී ලංකාවට ඡන්ද 177 ක් ලබා ගැනීමට හැකියාව ලැබී තිබිණි. මෙම ඡන්ද සංඛ්‍යාව අසියා ශාන්තිකර කලාප කණ්ඩායමේ රටක් දෙවැනි ස්ථානයට ලබාගත් වැඩිම ඡන්ද සංඛ්‍යාවද වන අතර එම කොමිසමට තේරී පත් සාමාජිකයන් 31 දෙනා අතරින් දෙවැනි ස්ථානයට ලබා ගත් වැඩිම ඡන්ද සංඛ්‍යාවද වේ.

අසියා ශාන්තිකර කලාප කණ්ඩායමෙන් මැලේසියාව, පිලිපීනය, සිංගප්පූරුව, වියට්නාමය, චීනය, ජපානය සහ කොරියානු සමූහාණ්දුව යන රටවල්ද ජාත්‍යන්තර වෙළඳ නීතිය පිළිබඳ එක්සත් ජාතීන්ගේ කොමිසමට තේරී පත්වී ඇත.

සාමාජිකත්වය වසර 6 ක් සඳහා බලපැවැත්වෙන අතර එය ලබන ජනවාරි මාසයේ සිට ආරම්භ වේ. ජාත්‍යන්තර වෙළඳ නීතිය පිළිබඳ එක්සත් ජාතීන්ගේ කොමිසම යනු ජාත්‍යන්තර වෙළඳාම සඳහා තිබෙන ප්‍රධාන නීති කොමිසමකි. ජාත්‍යන්තර වෙළඳාම සඳහා තිබෙන බාධක ආමන්ත්‍රණය කිරීම එහි එක් අරමුණකි.