(නිමල කොඩිතුවක්කු)

රටටත් ලෝකයාටත් පොරොන්දු වූ 19 වන සංශෝධනය බලගැන්වීම තවත් ප්‍රමාද කරමින් ජනතාව රවටන්න එපා යැයි ජනාධිපතිවරයා ප්‍රමුඛ රජයට අවධාරණය කරන බව සාධාරණ සමාජයක් සඳහා වන ජාතික ව්‍යාපාරයේ සභාපති කරු ජයසූරිය මහතා පවසයි.

ප්‍රජාතන්ත්‍රවාදය ශක්තිමත් කරන පොරොන්දු වූ ප්‍රතිසංස්කරණ වහා ක්‍රියාත්මක කරන ලෙස ජනාධිපතිවරයා ප්‍රමුඛ රජයට බල කර සිටින බවත් ජයසූරිය මහතා සඳහන් කළේය.

එම ප්‍රතිසංස්කරණ නොකර විවිධ හේතු දක්වමින් ජනතාව තවත් කෝප නොකරන්නැයි ඉල්ලීමක් කරන බවත් සාධාරණ සමාජයක් සඳහා වන ජාතික ව්‍යාපාරය කොළඹ දී කැඳවූ මාධ්‍ය හමුවකදී අදහස් දැක්වූ කරු ජයසූරිය මහතා පැවසීය.

එහිදී තවදුරටත් අදහස් දැක්වූ සාධාරණ සමාජයක් සදහා වූ ජාතික ව්‍යාපාරයේ සභාපති හිටපු කථානායක කරු ජයසූරිය මහතා මෙසේ ද කීවේය.

"රාජ්‍ය නායකයා විසින් ප්‍රජාතන්ත්‍රවාදය රැක දෙන බවටත්, මිනිස් අයිතීන් සුරකින බවටත් ජගත් මහලේකම්වරයාටත්, ලෝක ප්‍රජාවටත්, පොරොන්දු වූ ආකාරය නැවතත් සිහි කරන්නට කැමතියි.

එමෙන්ම ශ්‍රී ලාංකික පුරවැසියන්ට ද 19 වැනි සංශෝධනය නැවත බල ගැන්වීමටත්, විධායක ජනාධිපති පදවිය අහෝසිකිරීමටත්, විරුද්ධත්වයක් නොමැති බවත්, එතුමා ප්‍රසිද්ධියේ ප්‍රකාශ කර ඇත. එමෙන්ම බලයට පැමිණ අවුරුද්දකින් නව ව්‍යවස්ථාව ගෙන ඒමටත්, ද්විත්ව පුරවැසිභාවය පිළිබඳ කොන්දේසිය අවුරුද්දකින් ඉවත් කරන බවටත්, ආගමික නායකයන් ඇතුළු සකල ජන වාසීන්ට සහතික වී ඇත. මේ පොරොන්දු ලබා දුන්නේ ශ්‍රී ලංකා ජනරජයේ ජනාධිපතිවරයා විසිනුයි. මේ කිසිවක් අද වනතුරු ඉටු කර නැත. නව ව්‍යවස්ථාවක් එළි දැක නැත. එය වචනවලට සීමා වී ඇත.

ලෝකයා හමුවේ දුන් එවැනි ප්‍රකාශ එළිපිට උල්ලංඝනය වන විට එවැනි රටක රාජ්‍ය නායකයාගේ පොරොන්දු ලෝකයා විශ්වාස කරයිද? රටවැසියා විශ්වාස කරයිද? ආයෝජකයා විශ්වාස කරයිද? රට සමඟ ගනුදෙනු කරන ගනුදෙනුකරුවන් විශ්වාස කරයිද? අද අපි කණගාටුවෙන් හා ලජ්ජාවෙන් මේ ගැන කරුණු කියන්නේ රජය විසින් ලබා දුන් පොරොන්දු දැන් එළිපිටම කඩන නිසයි. මෙවැනි සිද්ධි නිසා ජනාධිපතිවරයාට පමණක් නොව ඔහු නියෝජනය කරන ශ්‍රී ලාංකික ජනතාවට ද විශාල අපකීර්තියක් ලැබෙන බව ජනාධිපතිවරයා තේරුම්ගත යුතුයි.

20 වැනි සංශෝධනය බල පවත්නාතාක් මෙරට මහජන නියෝජිතයින් මෙන්ම පුරවැසියන්ද ජීවත් වන්නේ ප්‍රජාතන්ත්‍ර මූලධර්ම අමු අමුවේම උල්ලංඝනය කෙරෙන ඒකාධිපති, කෲර, අසංවර පාලනයක් තුළ බව බහුතර මතයයි.