(ඩයනා උදයංගනී)

රාජ්‍ය ව්‍යවසාය ප්‍රතිව්‍යුහගත ඒකකයක් ස්ථාපිත කිරීමට මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව ඇත.

මෙම ප්‍රතිව්‍යුහගතකරණ ඒකකය මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය යටතේ ස්ථාපිත කිරීමට නියමිතය.

රජය සතු වානිජ ව්‍යාපාරයන්හි කාර්යසාධනය දීර්ඝ කාලයක් තිස්සේ සතුටුදායක තත්වයක නොපවතින අතර, ඇතැම් ව්‍යාපාර දිගින් දිගටම පාඩු ලබමින් පැවතීම හේතුවෙන් මහාභාණ්ඩාගාරය වෙත දැඩි පීඩනයක් එල්ල වී ඇති බවත්, එවැනි ව්‍යාපාර කාර්යක්‍ෂම හා ඵලදායී ලෙස ක්‍රියාත්මක කිරීම සඳහා විකල්ප යාන්ත්‍රණයක් හඳුන්වා දිය යුතුව ඇති බවත් අග්‍රාමාත්‍යවරයා අමාත්‍ය මණ්ඩලයට ඉදිරිපත් කළ යෝජනාවේ දැක්වේ.

ඒ අනුව මහා භාණ්ඩාගාරය වෙත පැවරී ඇති මූල්‍ය බර අවම කරගැනීම සඳහා වන ක්‍රම හඳුනාගැනීමත්, රජය සතු ව්‍යවසායන්හි සමස්ත කාර්ය සාධනය වැඩිකිරීමත් අරමුණු කරගනිමින් රාජ්‍ය ව්‍යවසායන් ප්‍රතිසංස්කරණය කිරීම සම්බන්ධයෙන් අවශ්‍ය මගපෙන්වීම සහ සහයවීම සඳහා මෙම ඒකකය පිහිටුවන බව ද එහි සඳහන්ය.

එමෙන්ම රාජ්‍ය පෞද්ගලික හවුල්කාරීත්ව ජාතික නියෝජිතායතනය ඉදිරිපත් කිරීම සඳහා මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා වශයෙන් ජනාධිපතිවරයා ඉදිරිපත් කළ යෝජනාවකට ද අමාත්‍ය මණ්ඩල අනුමැතිය හිමිව ඇත.