මම මුලින්ම චිත‍්‍ර කලාව ඉගෙන ගත්තේ් පහලවත්තේ ගුණසේකර සර්ගෙන්. ඔහු තමයි අපේ පාසලේ මුල් ගුරුතුමා. මම 4 වන ශ්‍රේණියේ ඉගෙන ගනිද්දී මම චිත‍්‍රයක් අඳිනවා දැකලා ඔහු මගේ ළඟට ඇවිල්ලා චිත‍්‍රයක් ඇඳලා පෙන්නුවා. එතනින් ඇති වුණ ආසාව නිසා තමයි මම චිත‍්‍ර කලාව හැදෑරීමට පටන් ගත්තේ. එතනින් පස්සේ මම සෙනරත් පෝල් කියලා සර් කෙනෙක් යටතේ චිත‍්‍ර කලාව ඉගෙන ගත්තා. එතනින් පස්සේ මම උපසේන ගුණවර්ධන ගුරුතුමා යටතේත් චිත‍්‍ර කලාව හැදෑරුවා. අපේ රටේ ජාතික කොඩිය නිර්මාණය කළ එස්.බී. චාල්ස් මහත්මයා යටතේ පාරම්පරික චිත‍්‍ර කලාව හදාරලා තිබෙනවා. ගිරාගම ගුරු විද්‍යාලයේ දී චාල්ස් දයානන්ද මහත්මයාගෙන් සහ නන්දලාල් උඩුකුඹුර යන ගුරුවරුන් යටතේත් චිත‍්‍ර කලාව හදාරලා තිබෙනවා.

මම දැන් අවුරුදු 26ක ඉඳලා චිත‍්‍ර ගුරුවරයෙක් ලෙස නාරම්මල මයුරපාද මධ්‍ය මහා විද්‍යාලයේ සේවය කරනවා. ඒ අතරතුර මම ”ආර්ට් වේ” කියලා චිත‍්‍ර ඇකඩමියක් ආරම්භ කළා පන්නල ප‍්‍රදේශයේ. එහි 1 වන ශ්‍රේණියේ සිට උසස් පෙළ දක්වා විවිධ පාසල්වල සිසුන් චිත‍්‍ර කලාව හදාරනවා. ”ආර්ට් වේ” එක පටන් අරන් දැන් අවුරුදු 11ක් විතර වෙනවා. මගේ චිත‍්‍ර ඇකඩමියෙන් වසරක් පාසා චිත‍්‍ර ප‍්‍රදර්ශනයක් පවත්වනවා. මෙවර චිත‍්‍ර ප‍්‍රදර්ශනය පවත්වන්නේ 5වන වතාවට. මෙවර චිත‍්‍ර ප‍්‍රදර්ශනයට පැස්ටල්, දිය සායම්, නිල් සායම්, ඇක්ටලීන් යන මාධ්‍යවලින් මගේ ඇකඩමියේ තෝරා ගත් ළමුන් 20ක් වැනි පිරිසකගේ චිත‍්‍ර 130ක් පමණ ඉදිරිපත් කරලා තිබෙනවා. මගේ චිත‍්‍ර මම මෙවර ප‍්‍රදර්ශනය සඳහා ඉදිරිපත් කළේ නැහැ. ළමුන්ගේ චිත‍්‍ර පමණයි ඉදිරිපත් කරලා තිබෙන්නේ.

මගේ ඒක පුද්ගල චිත‍්‍ර ප‍්‍රදර්ශන 4ක් මම කරලා තිබෙනවා. ලබන වසරේ මම මගේ තවත් ඒක පුද්ගල චිත‍්‍ර ප‍්‍රදර්ශනයක් පැවැත්වීමට බලාපොරොත්තු වෙනවා. මම චිත‍්‍ර අඳින්නේ ස්වභාව සෞන්දර්ය, සමාජ විෂමතාවයන් වැනි තේමාවන් පාදක කරගෙනයි. ළමුන්ගේ චිත‍්‍ර ප‍්‍රදර්ශනයේදීත් එම තේමාවන් යටතේ ඇඳපු චිත‍්‍රම තමයි ඉදිරිපත් කරලා තිබෙන්නේ.

මෙම චිත‍්‍ර ප‍්‍රදර්ශනය මම අවුරුදු 5ක්ම කළේ කොළඹින් පිටත පන්නල, නාරම්මල යන ප‍්‍රදේශවල මාරුවෙන් මාරුවට. මෙවර මෙම ප‍්‍රදර්ශනය ඔක්තෝබර් 27, 28, 29 සහ 30 යන දිනයන් හිදී නාරම්මල ටවුන්හෝල් එකේ පැවැත්වෙනවා.

වැඩිදුර තොරතුරු අවශ්‍ය නම් 076 7191703 දුරකථනයට අජිත් පී. බණ්ඩාර වන මට කතා කරන්න පුළුවන්.

සඳුනි ඉමල්කා