(සුමිත් පොතුපිටිය, සමන් කාරියවසම්, බිමල් ශ්‍යාමන් ජයසිංහ සහ ඉන්දිකා රාමනායක)

පානදුර ඇගළුම් කර්මාන්ත ශාලාවක් ඉදිරිපිට පසුගිය 31 දා රාත්‍රි තියුණු කඩුවකින් කපාකොටා 23 හැවරිදි පුද්ගලයකු ඝාතනය කිරීමේ සිද්ධියට සම්බන්ද (17) හැවිරිදි පාසල් යන වයසේ දරුවෙක්  අත්අඩංගුවට ගත්බව පානදුර දකුණ පොලිසිය පවසයි .

මෙසේ අත්අඩංගුවට ගෙන ඇත්තේ පානදුර බෙක්කේගම ප්‍රදේශයේ පදිංචි දරුවෙකු බව පොලිසිය කීය.

පානදුර මෝදරවිල මහල් නිවාස සංකීර්ණයේ පදිංචිව සිටී සෙබස්තියන්ගේ මියුරු හසංජය නැමැති 23 හැවිරිදි අයට කඩු පහරවල් 10 ක් පමණ එල්ලකර ඉකුත් 31දා රාත්‍රි  ඝාතනය කර තිබූණි.

පහරදීම සදහා ත්‍රීරෝද රථ දෙකක්  සහ යතුරුපැදි දෙකකින් කණ්ඩායමක් පැමිණ ඇති බවට පොලිස් පරීක්ෂණ වලදී අණාවරණය වී තිබූ අතර, අත්අඩංගුවේ පසුවන සැකකරු, ප්‍රධාන සැකකරුගේ සහයට ත්‍රීරෝද රථයකින් පැමිණ ඇති බවට පරීක්ෂණවලදී තහවුරුව ඇති බව පොලිසිය පවසයි .

සැකකරු අත්අඩංගුවට ගෙන ඔහු පැමිණි ත්‍රීරෝද රථයද පොලිස් භාරයට ගෙන තිබේ.

ඝාතනයට ලක්වූ පුද්ගලයාව  ත්‍රිරෝද රථයකින් හැප්පීමට උත්සාහ කර ඇති බවත් , එය අසල තිබූ CCTV කැමරාවක පටිගතව තිබී එය උපයෝගී කරගනිමින් සැකකරු අත්අඩංගුවට ගත්බවත් පොලිසිය කීය.

ප්‍රධාන සැකකරු ඇතුළු අනෙක් සැකකරුවන්  සොයා තවදුරටත් විමර්ශන සිදුකරන බව පොලිසිය පවසයි .

සැකකරු පානදුර මහේස්ත්‍රාත් අධ්කරණයට ඉදිරිපත් කිරීමට නියමිතව තිබූණි .

ජේෂ්ඨ පොලිස් අධිකාරී සමන්ත වෙදගේ , සහකාර පොලිස් අධිකාරී නිශාන්ත සේනාරත්න යන මහත්වරුන්ගේ උපදෙස් පරිදි අපරාධ අංශ ස්ථානාධිපති ප්‍රධාන පොලිස් පරීක්ෂක ඩබ්ලිව්.ජී.විජේතුංග සහ කොට්ඨාස අපරාධ විමර්ශන ඒකක ස්ථානාධිපති ප්‍රධාන පොලිස් පරීක්ෂක චන්න අමරසේකර යන මහත්වරුන්ගේ ප්‍රධානත්වයෙන් පරීක්ෂණ සිදුකරති.