(සුජිත් හේවාජුලිගේ සහ  අංජුල මහික වීරරත්න)

නවවැනි පාර්ලිමේන්තුවේ තෙවැනි සභාවාරය ජනාධිපතිවරයා  විසින් 2022 අගෝස්තු මස 03 වැනිදා පෙරවරු 10.30ට උත්සවාකාරයෙන් විවෘත  කිරිමට නියමිත බැවින් එම අවස්ථාවට සහභාගි වන ලෙස පාර්ලිමේන්තුවේ මහලේකම් ධම්මික දසනායක මහතා සියලු මන්ත්‍රීවරුන්ට ලිපියක් යවමින් දැනුම් දී ඇත.

නවවැනි පාර්ලිමේන්තුවේ තෙවැනි සභාවාරය ආරම්භ කිරිමට අදාළ ලිපි ලේඛන පාර්ලිමේන්තුවේ නිල වෙබ් අඩවියේ (www.parlaiment.lk) දැනටමත් උඩුගත කර  ඇති බවද මහලේකම්වරයා දන්වා සිටී.

ඒ අනුව නවවැනි පාර්ලිමේන්තුවේ දෙවැනි සභාවාරය වාර අවසාන කරමින්  ජනාධිපතිවරයා විසින් නිකුත් කරන ලද ප්‍රකාශනය ඇතුළත් 2022.07.28 දිනැති අංක 2290/35 දරන අති විශේෂ ගැසට් පත්‍රය, නවවැනි පාර්ලිමේන්තුවේ තෙවැනි සභා වාරය උත්සවාකාරයෙන් විවෘත  කිරීමට අදාළ පාර්ලිමේන්තුවේ න්‍යාය පත්‍රය සහ එදිනට අදාළ විස්තර සටහන පාර්ලිමේන්තු වෙබ් අඩවියෙන්  පරිශීලනය කළ හැකි බවද  මහලේකම්වරයා දැනුම් දෙයි.