(ශාන්ත ප්‍රදීප් කුමාර කුලරත්න සහ ප්‍රියන්ත ජයලත්)

හෝමාගම අයි.ඕ.සී ඉන්ධන පිරවුම්හලෙහි ආරක්ෂාවට යොදවා සිටි පොලිස්  නිළධාරින්ගේ රාජකාරියට බාධා කළ යුධ හමුදා කෝප්‍රල්වරයෙකු අත්අඩංගුවට ගත් බව හෝමාගම මූලස්ථාන පොලිසිය පවසයි .

මෙසේ අත්අඩංගුවට  ගෙන ඇත්තේ  පනාගොඩ යුද හමුදා කදවුරට අනුයුක්තව සේවයේ නිරත මීරිගම ප්‍රදේශයේ පදිංචි (34) හැවිරිදි යුධ හමුදා කෝප්‍රල්වරයෙකු බව පොලිසිය කියයි .

මෙම පුද්ගලයා හෝමාගම අයි.ඕ.සී ඉන්ධන පිරවුම්හල අසලට පැමිණ එහි සිටි තවත් පුද්ගලයින් කිහිප දෙනෙකු හා එක්ව ඉන්ධන ටැංකි විවෘත කර පෙන්වන ලෙස එහි ආරක්ෂාවට යොදවා සිටි පොලිස් නිලධාරීන්ට බලපෑම් කර ඇතැයි පැවසේ.

ඒ වන විට ඉන්ධනහලෙහි ඉන්ධන තොග බෙදා අවසන් කර තිබූ අතර පැමිණ සිටි  ජනතාවද පිටව ගොස් තිබුණි.

එම අවස්ථාවේ දී මෙම පුද්ගලයා එම ස්ථානයට මෙසේ පැමිණ කලහකාරීව හැසිරී පොලිස් නිළධාරින්ගේ රාජකාරියට බාධා කරමින් රැදී සිට  ජනතාවද උසිගන්වමින් හැසිරී ඇතැයි පැවසේ .

පසුව සිද්ධිය සැළවීමත් සමග හෝමාගම මූලස්ථාන පොලීසියේ ස්ථානාධිපති ප්‍රධාන පොලිස් පරීක්ෂක තුසිත වික්‍රමරත්න මහතා එම ස්ථානයට පැමිණ සිද්ධිය පාලනය කිරීමට උත්සාහ කළ අතර එම අවස්ථාවේදී සැකකරු ස්ථානාධිපති වරයාගේ නිළ ඇදුම අල්ලා කළහකාරීව හැසිරී ඇතැයි පැවසේ .

පසුව එහි සිටි පොලිස් නිලධාරින් වහා ක්‍රියාත්මක වී සැකකරු අත්අඩංගුවට ගෙන පොලිසියට රැගෙන ගොස් ප්‍රශ්න කිරීමෙදී ඔහු ශ්‍රී ලංකා යුධ හමුදාවේ කෝප්‍රල් වරයෙකු ලෙස පනාගොඩ  යුද හමුදා කඳවුරට අනුයුක්තව සේවය කරන අයෙකු බවට තොරතුරු අනාවරණය වූ බව පොලීසිය කියයි .

මෙම පුද්ගලයා මීට පෙර ද ඉන්ධන පිරවුම් හල අසල ඉන්ධන බලාපොරොත්තුවෙන් රැඳී සිටන ජනතාව කුපිත කොට උණුසුම් තත්වයන් සිදු කිරීමට සම්බන්ධ අයෙකු බවට තොරතුරු අනාවරනය වූ බව පොලිසිය පවසයි .

සිද්ධිය සම්බන්ධයෙන් ශ්‍රී ලංකා යුද හමුදාව දැනුවත් කිරීමට ද පියවර ගෙන තිබේ.

අත්අඩංගුවට ගත් සැකකරු හෝමාගම මහේස්ත්‍රාත් අධිකරණයට ඉදිරිපත් කිරීමට නියමිතය .

සිද්ධිය සම්බන්ධයෙන් හෝමාගම මූලස්ථාන පොලිසියේ ප්‍රධාන පොලිස් පරීක්ෂක තුසිත වික්‍රමරත්න මහතාගේ උපදෙස් මත වැඩිදුර විමර්ශන ක්‍රියාත්මකය.