( ප්‍රියානි මංගලිකා )
 
කොරෝනා වෛරසය ආසාධිත  වූ පොලිස්  නිළධාරීයෙකු නිකවැරටිය දියගම ප්‍රදේශයේ  උපන්දින සාදයකට  සහභාගී වීම හේතුවෙන්  එම ප්‍රදේශයේ පවුල් 36 ක පුද්ගලයන්  165  දෙනෙකු නිරෝධායනයට ලක් කල බව නිකවැරටිය සෞඛ්‍ය වෛද්‍ය නිලධාරී කාර්යාලය අද(01) දා පැවසීය.

මේවන විට  එම ප්‍රදේශයට පොලිස් මුර පොලක් යොදවා සංචරන සීමා පනවා ,ව්‍යාපාරික ස්ථාන කීපයක්ද වසා දැමීමට රස්නායකපුර පොලීසිය පියවර ගෙන ඇත.

කොළඹ ප්‍රදේශයේ රාජකාරි කරණ  පොලිස් නිලධාරී යෙකු නිකවැරටිය දියගම ප්‍රදේශයේ පැවති උපන් දින සාදයට සහභාගී වී ඇති අතර ,ඉන් දින දෙකකට පසුව පොලිස් නිලධාරීයාට කොරෝනා වෛරසය ආසාධනය වී ඇති බවට වෛද්‍ය වාර්ථා වලින් තහවුරු වීම හේතුවෙන් එම උපන්දින සාදය පැවති නිවසේ සාමාජිකයන් ඇතුලුව   සහභාගී වු ආශ්‍රිතයන් ගේ පවුල් 36 ක් මෙලෙස නිරෝධායනයට ලක් කල බවද සෞඛ්‍ය වෛද්‍ය නිලධාරී කාර්යාලය පැවසීය .

නිරෝධායනයට ලක්කල පවුල් වලට අවශ්‍ය උපදෙස් ලබා දී ,නිරෝධායන නීතිය පිළිබඳවද දැනුවත් කර , එම ප්‍රදේශයේ වෙසෙන සෙසු පිරිස්ද දැනුවත් කිරීමට පියවර ගත් බවද සෞඛ්‍ය වෛද්‍ය නිලධාරී කාර්යාලය පැවසීය .

මෙවැනි භයානක වසංගත රෝග තත්වයක් රට තුල පවතින අවස්ථාවේ  මෙවැනි උත්සව සාද පැවැත්වීමෙන් වැලකී ,සෞඛ්‍යාරක්ෂිත ක්‍රමවේදයන්ට අනුගතව කටයුතු කරමින්  කොරෝනා ව්‍යාප්තිය මර්ධනය කිරීම සඳහා ජනතාවගේ සහය ලබා දෙන ලෙසද සෞඛ්‍ය වෛද්‍ය නිලධාරී කාර්යාලය ජනතාවට දැනුම් දී සිටී.

මේ වන විට  නිකවැරටිය ප්‍රදේශයෙන් කොරෝනා වෛරසය ආසාධිත පුද්ගලයන් තිදෙනෙකු වාර්ථා වී ඇති බවද ,  කොරෝනා වෛරස් වසංගත රෝග ව්‍යාප්තිය  මර්ධනය කිරීම සඳහා ජනතාව දැනුවත් කිරීම සඳහා වැඩසටහන් සිදු කරමින් සිටින බවද සෞඛ්‍ය වෛද්‍ය නිලධාරී කාර්යාලය වැඩිදුරටත් සඳහන් කලේය .