හිටියෙ නැහැ. මෙදා අම්මත් නැහැ” ගිය වසරේ දී මෙන්ම මෙම වසරේදී ද සුමති ටෙලි උළලේ දී ජනප‍්‍රියම නළුවාට හිමි ටෙලි සම්මානය ලැබුණේ කාවිංග පෙරේරා හටය. විටෙක පෙම්වතා, විටෙක දුෂ්ඨයා, තවත් මොහොතක දී වෙනස්ම චරිත රංගනයක් වෙතින් චරිතාංග රංග ශිල්පියකු ලෙස ටෙලි තිරය හැඩ කරන ”කාවිංග” මේ දිනවල හමුවන්නේ වස්සාන පේ‍්‍රමය, සීතල ගිනිදැල්, සේයා නාට්‍ය චරිත වෙතිනි. ඒ සියල්ලටම සාපේක්ෂව ජනප‍්‍රිය සම්මානය නැවතත් හිමි කරගත් කාවිංගට එය දැනෙන්නේ කෙලෙසින් විය හැකිද? ඒ සම්මානයේ සතුට අරන් ඔහු සැඳැල්ලට පැමිණි නිමේෂය හැඩවුණේ මෙලෙසිනි.

කාවිංග ඔබට ලැබෙන චරිත තරමක් ඒකාකාරියි වගේ නේද?

එහෙමම කියන්න බැහැ. මම හිතන්නේ පෙම්වතාගේ සිට තාත්තා දක්වා විවිධ චරිත රඟපෑමට මට අවස්ථාව ලැබුණා. මම එක රාමුවකට කොටු වුණේ නැහැ.

මේ විදිහට මේ දක්වා රඟපෑ චරිත අතරින් ඔබට දැනිච්ච චරිතය මොකක්ද?

රඟපෑ සෑම චරිතයකටම වගේ එක ලෙස ආදරෙයි. ඒත් ඒ අතරින් සිවගුරුනාදන් සර්ගෙ ”අඟුරු සිත්තම්” රඟපෑමෙන් පසු ප්‍රේක්ෂකයින්ගෙන් ලැබුණු ප‍්‍රතිචාර හරිම වෙනස්. ඒක මාරයි. ඒ නිසා ඒ ගැන පුද්ගලිකව සතුටු වෙනවා.

ඔබ හිතුවද ජනප‍්‍රිය කිරුළ ලැබේවි කියලා?

හීනෙකින්වත් නැහැ. ගිය අවුරුද්දෙත් මේ සම්මානය ලැබෙද්දී මට එය ලැබේවි කියලා හිතුවෙ නැහැ. ඒ ගිය වසරේ දී වගේම මේ වසරේ දී ජනතාව මට ීඵී එවලා ජනප‍්‍රිය කිරුළට යොමු කළා. ඒ ගැන මගේ හද පත්ලෙන්ම ඔවුනට ගෞරවය පුදනවා.

ඇයි මෙවරත් ඔබට ඒ සම්මානය ලැබෙන්න ඇත්තේ?

මම කැමරාව ඉදිරියේ දී විතරයි නළුවකු වුණේ. සමාජයේ දී මම හිටියෙ මිනිස්සු එක්කයි.

මිනිස්සු අතරට ගිහින් ඔබ මොනවද කළේ? කොහොමද සමාජයෙ ගැවසුණේ?

සාමාන්‍ය සමාජයේ දී මිනිස්සු අපට හරි ආදරෙයි. ඒ ආදරය ලෙංගතුකම අපට දැනෙන්න ඕනෑ. එවිට අපි ඔවුනට දුරස්ථ වන්නේ නැහැ. එයාල කතා කරන කල් මම කවදාවත් ඉඳලා නැහැ. මම එයාලා එක්ක කතා කරලා හිනා වෙලා ඒ මොහොතට අවංක වෙනවා. මාත් සාමාන්‍ය සමාජයේ චරිතයක්. නළුකම රූගත කිරීම් කෙරෙන මොහොතට විතරයි. ඉතින් ඒ සරලකම අපි හැමෝටම පොදු දෙයක්නේ.

කාවිංග ඔබ අද මේ නළුකම විතරමද කරන්නේ?

නළුකම එක්ක වෙනත් වෘත්තියක නියැලෙන්න තරම් කාලයක් නැහැ. මේ දෙවියන් වහන්සේ දුන් වරමක්. මේ නිසා ජීවිතයට ලැබෙන දැනුම් සම්භාරය හරිම ඉහළයි. මැරෙන තුරාවට අත්දැකීම් ලබන්න පුළුවන් වෘත්තියක්. ඒ නිසා ඒකට මම ගෞරවනීයව කැපවෙලා. මම වෘත්තියට හරිම ආදරෙයි.

ජනප‍්‍රියත්වය මේ විදිහට ලැබෙනවා, ඒ වගේම හෙට එය නොලැබෙන්නත් පුළුවනි. ජනප‍්‍රියත්වය නැති වුණාම එය දරා ගන්න අමාරුයි කියලා කතාවක් තියෙනවා. එවැනි දේකට ඔබට මුහුණ දෙන්න වුණොත්?

සියල්ල රඳා පවතින්නේ අපි මිනිස්සුත් එක්ක ගනුදෙනු කරන විදියත් එක්කයි. මම අපේ අප්පච්චිගෙන් ලබා ගත් ඉහළම දේ මනුස්සකමයි. අප්පච්චි සල්ලි නෙමෙයි, මිනිස්සුයි හම්බ කළේ. අන්තිමට අප්පච්චි මැරෙන මොහොතේදිත් කිව්වෙ, සල්ලි නෙවේ, මිනිස්සු හම්බ කරපං කියලයි. ඒ වෙනුවෙන් මට පටු අරමුණු නැහැ. දෙන්න ඕනෑ දේ මම සමාජයට ලබා දෙනවා. ස්වභාවධර්මය, මට දිය යුතු දේ ලබා දේවි.

දැන් සම්පුර්ණයෙන්ම පවුලේ බර ඔබ අතේ නේද?

අප්පච්චි 2012 නැති වුණේ. ඉන් පස්සේ අම්මවයි නංගිවයි කාටවත් කරදරයක් නැතිව හොඳින් බලා ගත්තා. අම්මත් අසනීප වුණා. ඉන් පස්සේ අම්මාව ගොඩ දාන්න උපරිමයෙන් උත්සාහ ගත්තා. ඒත් හරි ගියේ නැහැ. හැබැයි ඒ දෙන්නගෙ ආශිර්වාදය මට ලැබෙන බව විශ්වාසයි. ඒ දෙදෙනාගේ ඉහළම බලාපොරොත්තුව වූ මගේ එකම සහෝදරිය විවාහ කර දීම අද මගේ එකම බලාපොරොත්තුවයි. නංගි වෙනුවෙන් මම එය උපරිමයෙන් ඉටු කරනවා.

අද අම්මා, තාත්තා නැති අඩුව ඔබට දැනෙන්නේ කොහොමද?

ඒක වචනයෙන් කියන්න බැරි තරමටම ගොඩාක් ගොඩාක්ම දුකක්. පළමු වතාවේ සම්මානය ගනිද්දි අප්පච්චි හිටියෙ නැහැ. දෙවැනි වතාවෙදි අම්මා නැහැ. ඒත් පළමු වතාවෙදි සම්මානය ලැබුණාම දෙවැනි සැරේවත් පුතාටත් සම්මානයක් ලැබෙන බව අම්මි කීවා. ඒත් එය ලැබෙද්දි ඇයත් නැහැ.

ඉදිරියේ දී ඔබගේ ජීවිතය කෙසේ වේවි ද?

නිහතමානී කලාකරුවකු ලෙස අධ්‍යක්ෂවරු නිෂ්පාදකවරු ඇතුළු කලාවේ සියලූ දෙනාම ගරු කරමින් ගෞරවනීයව කලාවේ නිරත වේවි.

නංගිට පෙළවහක් කරදීලා, ඊට පස්සේ අයියත් පෙළවහක් කර ගනීවි නේද?

විවාහ වෙන්න ඕනෑ. හොඳ කෙනෙක් හොයාගෙන කසාදය කර ගන්න ඕනෑ තමයි.

කාවිංග කවුද?

හරිම නිහතමානී, ඕනෑම පුද්ගලයකු සමග හිනාවෙලා කතා කරන, අවංක හදවතක් තියෙන, මෝඩ කොල්ලෙක්.

සඳුන් ගමගේ

‍‍