මෙම වසරේ එනම් 2016 වසරේ අඩක්ම නිමවී ගියත් බොලිවුඩයේ ඇතැම් අයට තවම නව වර්ෂයක් ලෙස හැඟේ. එයට හේතුව වන්නේ ඉදිරියේදී එළිදැක්වීමට ඇති බොලිවුඩ් චිත්‍රපටවලින් ක්ෂේත්‍රයට බිහි වීමට ඇති නවකයන්ගේ දස්කම් දැකගැනීමට හැකියාව තිබෙන බැවිනි. ඇතැම් රංගන ශිල්පීන් නවක නොවුණද ඔවුන් විශාල වශයෙන් ප්‍රසිද්ධියට පත් වී නොමැත. එයට හේතුව ලෙස සඳහන් කරන්නේ ඔවුන් දායක වූ චිත්‍රපට ආදායම් නොලැබූ හෙයිනි.එවැනි රංගන ශිල්පීන් කිහිප දෙනෙකු මෙසේ ගෙනහැර දක්වමු.

Saiyami Kher

1992 වර්ෂයේදී උපන් ඇය ක්ෂේත්‍රයට පිවිස ඇත්තේ 2013 වර්ෂයේදීය. මේ වනවිට ඇය රංගනයෙන් දායක වී ඇත්තේ එක් චිත්‍රපටයක් සඳහා පමණි. ඒ 2015 වර්ෂයේදී තිරගත වූ "Rey" නම් තෙළිඟු චිත්‍රපටයටය. ඉදිරියේදී බොලිවුඩයේ එළිදැක්වීමට නියමිත "Mirzya"චිත්‍රපටයේ ප්‍රධාන චරිතය සඳහා ඇය දායක කරගෙන තිබෙන බව සඳහන් වෙයි.

Shriya Pilgaonkar 

ඇය කුඩා කාලයේදීම ක්ෂේත්‍රයට පිවිසි Tu Tu Main Mainනම් රූපවාහිනී කතාමාලාව ඔස්සේය. ඒ 1996 වර්ෂයේදීය. ඉන්පසු ඇය ක්ෂේත්‍රයෙන් ඉවත්ව තිබේ. ඉන්පසු 2013 වර්ෂයේදී නැවතත් චිත්‍රපටය සඳහා දායක වී ඇති ශ්‍රියා, මෙම වසරේ ශාරුක් ඛාන් සමග චිත්‍රපටයක රංගනයෙන් දායක වීමට නියමිතය.

Sayesha Saigal

මේ වනවිට 18 වැනි වියේ පසුවන ඇය ක්ෂේත්‍රයට පිවිසියේ 2015 වර්ෂයේදී තිරගත වූ Akhil නම් තෙළිඟු චිත්‍රපටය හරහාය. මැය පිළිබඳව ඉන්දියානු මාධ්‍ය බොහෝ විට කතා කිරීමට පෙළඹී ඇත්තේ ඔක්තෝබර් මාසයේ එළිදැක්වීමට නියමිත අජේ දේව්ගන්ගේ නවතම චිත්‍රපටය වන Shivaay නම් චිත්‍රපටය නිසාය. එම චිත්‍රපටයේ ප්‍රධාන චරිතයට ඇය රංගනයෙන් දායක වන බව සඳහන් වෙයි.

Pooja Hegde

නිරූපණ ක්ෂේත්‍රය හරහා රංගනයට අවතීර්ණ වූ ඇය, මූලිකව රංගනයට දායක වූයේ 2012 වර්ෂයේදී තිරගත වූ Mugamoodiනම් දෙමළ චිත්‍රපටයටය. 2010 වර්ෂයේදී Miss Universe India තරගයේ අවසන් තිදෙනා අතරට පැමිණි ඇයට චිත්‍රපට රංගන වරම් හිමිවිය. මේ දිනවල යූටියුබ් ජාලයේ උණුසුම් ප්‍රතිචාර ඇති Mohenjo Daro නම් චිත්‍රපටයේ පූර්ව ප්‍රචාරක පටය නිසා ඇය පිළිබඳව බොහෝ දෙනා කරුණු සොයන බව ඉන්දියානු මාධ්‍ය පෙන්වා දෙයි. අගෝස්තු මාසයේ එළිදැක්වීමට නියමිත මෙම චිත්‍රපටයේ ප්‍රධාන චරිතයට රිතික් රෝෂන් සමග ඇය රංගනයෙන් දායක වී ඇත.