(සුජිත් හේවාජුලිගේ සහ අංජුල මහික වීරරත්න)

කොට්ඨාස හා සමානුපාතික නියෝජනය ඇතුළත් මිශ්‍ර මැතිවරණ ක්‍රමයක් මෙරට පැවතීම වඩාත් සුදුසු බව පැෆරල් සංවිධානයේ නියෝජිතයෝ මැතිවරණ හා ඡන්ද විමසීම් ව්‍යුහයේ නීති ප්‍රතිසංස්කරණයට අදාළව පත්කර ඇති පාර්ලිමේන්තු කාරක සභාව හමුවේ සිය යෝජනා ඉදිරිපත් කරමින් පෙන්වා දුන්හ.

සෑම ජන්දදායකයෙකුටම ජන්ද හිමිකම ලබාදීමේ අවශ්‍යතාවද පැෆරල් නියෝජිතයන් මෙහිදී ප්‍රකාශ කර ඇත.

මැතිවරණ අපේක්ෂක වියදම් සීමා කිරීම, ජනාධිපතිවරණය සහ මහමැතිවරණය එක් දිනයක පැවැත්වීම, මැතිවරණ කැලැන්ඩරයක් ක්‍රියාත්මක කිරීම, මැතිවරණ ක්‍රියාවලියේ සහ දැනට පවතින මැතිවරණ නීතියේ ඇති අඩුපාඩු හඳුනාගෙන යාවත්කාලීන කිරීම, රාජ්‍ය බලය සහ රාජ්‍ය දේපළ අවභාවිතය වැළැක්වීම, දඩ මුදල් හා මැතිවරණ නීතිය යාවත්කාලීන කිරීම, සෑම ජන්දදායකයෙකුටම සාධාරණ ලෙස තොරතුරු දැන ගැනීමට ඇති අයිතිය තහවුරු කිරීම, ප්‍රචාරණය සම්බන්ධ නීති මෙන්ම ප්‍රමාණවත් කාන්තා නියෝජනය තහවුරු කිරීම යන කාරණා සම්බන්ධයෙන්ද පැෆරල් සංවිධානයේ නියෝජිතයෝ කාරක සභාව හමුවේ දීර්ඝව අදහස් දැක්වූහ .

මැතිවරණ සහ ඡන්ද විමසීම් ව්‍යුහයේ ප්‍රතිසංස්කරණ සඳහා නිර්දේශ ඉදිරිපත් කිරීමට පත් කෙරුණු පාර්ලිමේන්තු විශේෂ කාරක සභාව එහි සභාපති සභානායක දිනේෂ් ගුණවර්ධන මහතාගේ ප්‍රධානත්වයෙන් පාර්ලිමේන්තු සංකීර්ණයේදී පෙරේදා (14) රැස්විය.

මෙම කමිටුව හමුවේ යෝජනා ඉදිරිපත් කිරීමට පැෆරල් සංවිධානයට ආරාධනා කර තිබූ අතර එම නියෝජිතයන් ඊට සහභාගී සහභාගී වූයේ ඒ අනුවය.

අපේක්ෂකයන්ගේ වත්කම් බැරකම් ප්‍රකාශ මෙන්ම ජාතික ලැයිස්තුව මඟින් අපේක්ෂකයන් තෝරා ගැනීම, මැතිවරණ කොමිෂන් සභාවේ ස්වාධීනත්වය ආරක්ෂා කිරීම සහ දේශපාලන පක්ෂ ලියාපදිංචි කිරීමේ ක්‍රමවේදය සම්බන්ධයෙන්ද පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා කාරක සභාවේදී අදහස් දැක්වීය .

එම කාරක සභාවට කැඳවා සිටි මැතිවරණ කොමිෂන් සභාවේ හිටපු සභාපති මහින්ද දේශප්‍රිය මහතා මෙහිදී පැවසුවේ ජනාධිපතිවරණය සහ මහමැතිවරණය එක දිනයක පැවැත්වීම ප්‍රායෝගික නොවන බවයි.

මැතිවරණ ප්‍රචාරණ වියදම පාලනය කිරීම වෙනුවෙන් කඩිනමින් නීති සම්පාදනය විය යුතු බවද මහින්ද දේශප්‍රිය මහතා කාරක සභාවට පෙන්වා දුන්නේය.

මෙම කාරක සභා රැස්වීමට අමාත්‍ය නිමල් සිරිපාල ද සිල්වා,රාජ්‍ය අමාත්‍ය ජීවන් තොණ්ඩමන්, පාර්ලිමේන්තු මන්ත්‍රීවරුන් වන අනුර දිසානායක,කබීර් හෂීම්, රංජිත් මද්දුම බණ්ඩාර, එම්.ඒ. සුමන්තිරන්, මනෝ ගනේෂන් ,මධුර විතානගේ සහ සාගර කාරියවසම්, යන මහත්වරුද සහභාගි වූහ.

ඊට අමතරව මැතිවරණ කොමිෂන් සභාව, නීතිපති දෙපාර්තමේන්තුව යන ආයතනවල නිලධාරීන් පිරිසක්ද ඊට සහභාගි වූ බව පාර්ලිමේන්තු සන්නිවේදන අංශය පවසයි.