මේ දිනවල නිතර ඇසෙන හා දකින ගීත අතරේ නවක ගායකයෙකු වන මධු රොක්ස්ගේ "මගේ ලොව හිරු" ගීතයට විශේෂ තැනක් හිමිවී තිබෙනවා. මීට පෙර ගීත කිහිපයකටම සිය හඬ මුසුකළ ඔහු ඉදිරියේදී තවත් ගී නිර්මාණ කිහිපයකින්ම රසික ඔබ හමුවීමට සූදානමින් සිටිනවා. මේ දිග හැරෙන්නේ "සාරවිට" අපි සමග මධු කළ කතාබහයි.

"ඔබ ගියා කියා" ගීතයෙන් පස්සෙ මගේ රසික, රසිකාවියන්ට තිළිණ කරන අලුත්ම ගීතය තමයි "මගේ ලොව හිරු" කියන්නේ. මේ ගීතයේ ඕඩියෝව වගේම වීඩියෝවත් මම එක්වරම එළිදැක්වුවා. ගීතය ලිව්වේ සාගරිකා ශ්‍රීපාලි. සංගීතය එකතු කළේ චන්දන වල්පොල. "හරි" ක්‍රියේෂන් ආයතනය වෙනුවෙන් මෙහි රූප රචනාව නිර්මාණය කළේ එරන්ද වනිගසේකර. මේ ගීතය මේ දිනවල රූපවාහිනි හා එෆ්.එම්. නාළිකා කිහිපයකම අහන්නටත් දකින්නටත් ලැබෙනවා."

ආදරය හා විරහව තේමා කරගත් "මගේ ලොව හිරු" ගීතයේ රූප රචනාවට ගීත ගායනයෙන් දායක වෙන මධු රොක්ස් සමගින් ජනප්‍රිය රංගන ශිල්පිනි නයෝමි තක්ෂිලාද දායක වී තිබෙනවා. ඔවුන්ට අමතරව උදිත වෙදසිංහ, ස්වර්ණා රණසිංහ යන පිරිසද මෙම ගීත රූප රචනාව සඳහා රංගනයෙන් එක්වෙනවා. එමෙන්ම වේෂ නිරූපණයෙන් තාරක අධිකාරි, කැමරාකරණයෙන් සුමිත් කුමාර, සංස්කරණයෙන් පැතුම් රත්නායක හා රුවන් අත්නායක දෙදෙනාද සහය වී තිබෙනවා.