(චමිල් රුපසිංහ)

මහනුවර ජනාධිපති මන්දිරියේ ප්‍රවේශ මාර්ගයට බාධා ඇතිවන පරිදි ඉදිකෙරෙමින් පවතින පස් ‍මහල් ගොඩනැගිල්ලක වැඩකටයුතු වහා අත් හිටුවීමට මධ්‍යම පළාත් ආණ්ඩුකාර නිලූකා ඒකනායක මහත්මිය නියෝග කර ඇත.

මහනුවර නගර මධ්‍යයේ මහනුවර මහ නගර සභාවට යාබදව ඉදිකෙරෙමින් පවතින මෙම ගොඩනැගිල්ල මධ්‍යම පළාත් සභා මන්ත්‍රීවරයකුට අයත් බව ද කියති. මෙම ගොඩනැගිල්ල සම්බන්ධව නගර සභාවේ හා නාගරික සංවර්ධන අධිකාරියේ නිලධාරීන් මේ සම්බන්ධව කිසිදු පියවරක් නොගැනීම විමතියට කරුණක් බව නගර වැසියෝ පවසති.

අදාළ ගොඩනැගිල්ලේ ඉහළ මාලය ඉදි කිරීම සඳහා බාධාවන ලෙස පැවැති දැවැන්ත රොබරෝසියා වෘක්ෂයක් මියගොස් තිබෙන අතර එයට විසක් දමා මරා දමන්නට ඇති බවට සැක කරයි.

පේරාදෙණිය උද්භිද උද්‍යානය දෙපාර්තුමේන්තුව මගින් මෙම වෘක්ෂය මියයෑම සම්බන්ධයෙන් පරීක්ෂණයක් පවත්වා එය ස්භාවික හේතුවක් නිසා සිදුවූ මරණයක් නොවන බවට වාර්තාවක් ලබාදී තිබෙන බවත් මෙම ගොඩනැගිල්ලේ ඉදි කිරීම් සම්පූර්ණයෙන්ම අනුමත සැළැසුම්වලට පිටින් සිදුවන බවත් මහනුවර මහ නගර සභාවේ වැඩබලන නාගරික කොමසාරිස් දිලීපා රූපානි පියදාස මහත්මිය පැවැසුවාය.

අදාළ ගොඩනැගිල්ල සම්බන්ධයෙන් පරීක්ෂණ වාර්තාවක් නාගරික සංවර්ධන අධිකාරියෙන් හා මහනුවර මහ නගර සභාවෙන් ලබා ගන්නා බවත් මහනුවර නගරයේ මෙවැනි අවිධිමත් ඉදි කිරීම් රැසක් පසුගිය කාලය තුළ සිදුව තිබෙන බවට තොරුතුරු ඇති බවත් ආණ්ඩුකාරවරිය පැවැසුවාය.