එංගලන්තයේ මැන්චෙස්ටර් යුනයිටඞ් පාපන්දු කණ්ඩායම පාපන්දු ලෝකයේ හිණි පෙත්තටම කැඳවාගෙන ගිය කළමනාකරුවා වන ශී‍්‍රමත් ඇලෙක්ස් ෆර්ගසන් හෙට (මැයි 12, ඉරිදා) දැඩිසේ හැගීම්බරව සිය අවසන් රාජකාරිය සඳහා සූදානම් වෙයි.

වසර 26 ක් පුරා මැන්චෙස්ටර් යුනයිටඞ් පිලේ අසහාය කළමණාකරුවා වූ ශී‍්‍රමත් ෆර්ගසන් මෙවර එංගලන්ත පාපන්දු සමය නිමාවත් සමගම සිය හද බැඳි කණ්ඩායමෙන් සමුගන්නේ බි‍්‍රතාන්‍ය ප‍්‍රධානතම පාපන්දු ලීග් ශූරතා 13 ක්, ශූරයන්ගේ කුසලාන දෙකක්, පාපන්දු සංගම් කුසලාන 5 ක්, ලීග් ශූරතා 4 ක්ද ඇතුළුව කුසලාන රාක්කයක්ම මැන්චෙන්ටර් යුනයිටඞ් පිලට ඉතිරි කරමිනි.

මෙය ඇදහිය නොහැකි දස්කමක් සේ ලෝපුරා පාපන්දු විචාරකයෝ පවසති.
ශී‍්‍රමත් ෆර්ගසන්ගේ අවසන් තරගයේදී මැන්චෙස්ටර් යුනයිඞ් පිලේ ප‍්‍රතිවාදීන් වන්නේ ස්වෝන්සී කණ්ඩායමයි. මෙම තරගය වඩාත් අවස්ථාවෝචිත එකක් වන්නේ මෙම තරගය අවසානයේදී මෙවරත් බි‍්‍රතාන්‍ය ප‍්‍රධානතම පාපන්දු ශූරතාවලියේ ජයග‍්‍රාහකයන්ට හිමි කුසලානය, තරගය අවසානයේදී මැන්චෙස්ටර් යුනයිටඞ් පිලට ප‍්‍රදානය කිරීම නිසාය.

කණ්ඩායම් 20 ක් සහභගි වන බි‍්‍රතාන්‍ය ප‍්‍රධානතම පාපන්දු ශූරතාවලියේ මෙවර තරග 36 කට සහභාගි වූ මැන්චෙස්ටර් යුනයිටඞ් පිල, තරග 27 ක් ජයගනිමින්, කුසලානය තමන් සතුකරගත්තේ සති තුනකට පමණ කලියෙනි. එහෙත් ස්කොට්ලන්ත ජාතිකයකු වන ශී‍්‍රමත් අලෙක්ස් ෆර්ගසන්ගේ අවසන් තරගයේදී මැන්චෙස්ටර් යුනයිටඞ් පිලට තවත් කුසලානයක් එක්වීම ඔහුගේ වසර 26 ක සේවය වෙනුවෙන් පිරිනැමෙන අමිල ත්‍යාගයක් වන නිසැකය.

මෙම තරගය දෙපිලටම එතරම් වැදගත් නොවේ. එහෙත් මැන්චෙස්ටර් යුනයිටඞ් පිලට නම් එය ශී‍්‍රමත් ඇලෙක්ස් ෆර්ගසන්ට අලංකාර සමුදීමක් සඳහාම නිර්මාණය වූ අගනා අවස්ථාවකි. එහි විශේෂත්වය වන්නේ වසර 26 ක් පුරා කිසිම කුසලානයක් දිනැගැනීමට අසමත්ව සිටි මැන්චෙස්ටර් යුනයිටඞ් පිල ශී‍්‍රමත් ඇලෙක්ස් ෆර්ගසන්ගේ ආගමනයත් සමගින් පුනර්ජීවයක් ලබා අති විශිෂ්ට දස්කම් දැක්වීමට සමත් වීමත්, එතැන් සිට බි‍්‍රතාන්‍යයේ මෙන්ම යුරෝපයේත් අති විශිෂ්ට පාපන්දු කණ්ඩායමක් බවට පත්වෙමින් වසර ගණනාවක් පුරා යුරෝපා පාපන්දු පිටියේ අණසක පැතිරවීමයි.

ශී‍්‍රමත් ෆර්ගසන් සමුගැනීමත් සමගම මැන්චෙස්ටර් යුනයිටඞ් පිලේ කණමනාකරු ධූරයට එවර්ටන් පිලේ හිටපු කළමණාකරුවා වන ඬේවිඞ් මෝයිස් පත්ව සිටී. ඉතා දැඩි පාපන්දු කළමණාකරුවකු වශයෙන් නමක් දිනා සිටින ඬේවිඞ් මෝයිස් සහ මැන්චෙස්ටර් යුනයිටඞ් පිල අතර ඇතිකරගත් ගිවිසුම වසර 6 කි.

මේ අතර 71 හැවිරිදි ශී‍්‍රමත් ඇලෙක්ස් ෆර්ගසන්ගේ පුතණුවන් වන ඩැරන් ෆර්ගසන් මහතා පවසන්නේ තම පියා මැන්චෙස්ටර් යුනයිටඞ් පිලෙන් සමුගන්නේ කිසිදු සෞඛ්‍ය හේතුවක් මත නොවන බවයි.

”ඔහු අපිත් එක්කත් කතා කළා. ඔහු හිතන්නේ මේක සමුගන්න හොඳම වේලාව කියලයි. විශේෂයෙන්ම කිසිම ප‍්‍රශ්නයක් නැති වෙලාවක” යයි පීටර්බරෝ පාපන්දු කණ්ඩායමේ කළමණාකරුවා වන ඩැරන් ෆර්ගසන් පාපන්දු ලෝකයේ ජනපි‍්‍රය වෙබ් අඩවියකට ප‍්‍රකාශ කර තිබිණ.

ස්වෝන්සී පිලේ කළමණාකරු මයිකල් ලවුඩ‍්‍රප් පවසන්නේ ශී‍්‍රමත් ඇලෙක්ස් ෆර්ගසන් මැන්චෙස්ටර් පිලේ කළමණාකරු වන අවසන් තරගයේදී ඔහුගේ ප‍්‍රතිවාදියා වීම තමන් ලද ගෞරවයක් බවයි.

ශී‍්‍රමත් ෆර්ගසන් විසින් පාපන්දු පිටියේදී කළ කී දේ කිරීමට වෙනත් කිසිම පාපන්දු කළමණාකරුවකුට අපහසු වනු ඇතැයිද ලවුඩ‍්‍රප් මහතා පවසයි.

”අප හැමෝම දන්නවා අපට කවදා හෝ සමුගෙන යන්න වෙන බව. ඒත් ශී‍්‍රමත් ෆර්ගසන් නම් දිගින් දිගටම ඉන්න බවයි පෙනෙන්නට තිබුණේ”

”වසර කිහිපයකට ඉහතදීත් මේ ගැන (ශී‍්‍රමත් ෆර්ගසන්ගේ සමුගැනීම සම්බන්ධයෙන්) විවිධ කටකතා තිබුණා. ඒත් හදිසියේම ඒ බව ප‍්‍රකාශයට පත්කෙරුණේ අප සියලූ දෙනාම මවිතයෙන් මවිතයට පත්කරමින්” යයිද ලවුඩ‍්‍රප් පැවසීය.

”පුදුම සහගත දේ නම් ඔහු මැන්චෙස්ටර් යුනයිටඞ් පිල සමග වසර 27 ක් ගතකිරීමයි. ඒත් වෙන තැනකදී නම් වසර 10 ඉඳීමත් අසීරුයි”

”කොහොම වුණත් කුසලානයක් දිනාගැනීමෙන් පසුව ඉවත්ව යාම, සමුගෙන යාමට ඇති හෙඳම ක‍්‍රමයයි. යයිද ස්වෝන්සී පිලේ කළමණාකරුවා පැවසීය.