වෘත්තීමය ගුරුවරියක වශයෙන් සේවය කරමින් විනෝදාංශයක් ලෙස නිරූපණය ශිල්පිනියක වූ ඇය අමානි කෝට්ටේආරච්චිය. ඇගේ නිරූපණ ගමන පිළිබඳව කතා බහ කිරීමට "සාරවිට" අප සමග මෙලෙසෙ එක් විය.

ඔබ ගැන හැඳින්වීමක් කළොත්?

මම අමානි කෝට්ටේආරච්චි. මගේ පවුලේ ඉන්නේ මමයි, අම්මයි, තාත්තයි, අක්කයි. අක්කා විවාහ වෙලා ඉන්නේ. මම ජාත්‍යන්තර පාසලක ගුරුවරියක් විදියට සේවය කරනවා.

ගුරුවරියක් වශයෙන් කටයුතු කරද්දී නිරූපණ ක්ෂේත්‍රයට යොමුවෙන්නේ කොහොමද?

මම මේ ක්ෂේත්‍රයට එන්නේ ගුරු වෘත්තියට ඇතුළු වෙන්නත් කලින් සිටයි. ඒ මනාලියන් දැක්මක් සඳහා ඉදිරිපත්වීමට අවස්ථාව උදාවීමෙන්.

ගුරුවරියක් නිරූපණ ක්ෂේත්‍ර‘යේ නියැළීම පිළිබඳව බොහෝදෙනෙක් චෝදනා කරන්න පුළුවන්. මේ පිළිබඳව ඔබ මේ දරන්නේ මොනවගේ අදහසක්ද?

ගුරුවරියක් හා නිරූපණ ශිල්පිනියක් කියන ක්ෂේත්‍ර දෙක හාත්පසින්ම වෙනස් ක්ෂේත්‍ර දෙකක්. මම මේ ක්ෂේත්‍ර දෙක පටලවගන්නේ නැහැ. ගුරුවරියක් වීම මගේ පොඩිකාලේ ඉඳන්ම තිබුණ ආසාවක්. ඒ සඳහා තවමත් මම ඉගෙනීම් කටයුතු කරනවා. ඒවගේම නිරූපණය කියන්නේ මගේ විනෝදාංශය.

ඔබ මේවනවිට නිරූපණයෙන් දායකවෙලා තියෙන වැඩකටයුතු මොනවාද?

මම වැඩිවශයෙන් සහභාගීවෙලා තියෙන්නේ මානාලියන් දැක්මවල් සඳහා තමයි. විවිධ වැඩකටයුතු සඳහා ආරාධනා ලැබුණත් මම ගුරුවරියක් නිසා භාරගන්න දේවල් ගොඩක්දුරට සීමාකරලා තියෙන්නේ.

ඔබගේ වෘත්තීයත් සමග නිරූපණයට කාලය වෙන්කරගන්නේ කොහොමද?

ඕනෑම දෙයක් පිළිබඳව හැදෑරීමක් කර ඒ ක්ෂේත්‍රයේ නියැලීම තමයි වඩාත් සුදුසු. නමුත් මම විනෝදාංශයක් විදියට ඉඩක් ලැබෙන වෙලාවට තමයි මේවාට සහභාගීවෙන්නේ. ඒ නිසා මම ඒ පිළිබඳව ඉගෙනීමට වැඩිය යොමුවුණේ නැහැ.

ගුරුවරියක ලෙස නිරූපණ ක්ෂේත්‍ර‘යේ නියැළෙනවිට යම්කිසි සීමා තබාගත යුතුයි. ඔබ නිරූපණ කටයුතු කරන්නේ ඒ සීමාව තුළ සිටද?

ඔව් අනිවාර්යෙන්ම. මම දැනට නිරූපණ කටයුතුවලට දායක වෙන්නේ තෝරාබේරාගෙනයි. ඉදිරියටත් එය එසේ සිදුවේවි.

වෘත්තියෙන් ගුරුවරියෙක් වෙච්ච ඔබ නිරූපණයට යොමුවෙද්දි, ඒ සඳහා පවුල් පසුබිමෙන් ලැබෙන සහයෝගය කොහොමද?

තාත්තාගේ තමයි ලොකුම ආශාවක් තිබුණේ මම ගුරුවරියක් වෙනවට.මම එයාගේ ආශාව ඉෂ්ට කළාත. ඉන් පසු මගේ ආශාවත් ඉටුකරගත්තා. නිරූපණයට පවුලේ අයගේ අකමැත්තක් නැහැ. එයාලාගෙන් ලොකු සහයෝගයක් තියෙනවා.

ඉදිරි බලාපොරොත්තු මොනවද?

මම විවෘත විශ්වවිද්‍යාලයේ උපාධිය නිමකිරීමේ බලාපොරොත්තුවෙන් ඉන්නේ. ඒ අතරතුර නිරූපණ ක්ෂේත්‍ර‘යේ වැඩකටයුතුත් තෝරාබේරාගෙන කිරීමට තමයි බලාපොරොත්තුව.

අතහිත දුන් පිරිසක් ඇති, ඒ අය ගැනත් පුංචි හැඳින්වීමක් කළොත්?

පුංචි තමයි මාව ක්ෂේත්‍රයට ගෙනාවේ. එයා තමයි මුලින්ම මාව මනාලියන් දැක්මක් සඳහා තෝරාගත්තේ. එයාගේ නම ඊෂා මධූ. අම්මා, තාත්තා මතක් කරනවා. ඒ වගේම මගෙ Boyfriend මතක් කරනවා.එයා මගේ ළඟින්ම ඉඳන් ලොකු සහයෝගයක් දෙනවා. සැලොන් දහම්සා එකේ රමේෂා අක්කාව වගේම මගේ පාසලේ ගුරු මණ්ඩලය මතක් කරන්න ඕන.

ඩිලාන් ක්‍රිෂාන්ත / ඡායාරූප - දිෂ්ණ ධර්මරත්න

Hair and Makeup - Kalpani Elvigala