(රොමේෂ් මධුෂංඛ)

‘ඇනෝපීලිස් ස්ටීවන්සායි’ නැමති නව මැලේරියා මදුරු විශේෂයක් මන්නාරමෙන් හා වවුනියාවෙන් හමු වීමත් සමග සෞඛ්‍ය බලධාරීන් ඒ පිළිබඳව දැඩි අවධානයක් යොමු කර ඇති අතරම ජනතාව තුළ බියක් ඇතිව තිබේ.

මෙම නව මැලේරියා මදුරු විශේෂය ඉන්දියාවෙන් පළමුව වාර්තා වී ඇති අතර මර්ධනය කිරීමටද තරමක් අපහසු බවට සෞඛ්‍ය බලධාරීන් පවසති.

ජාතික මැලේරියා මර්ධන ඒකකය පැවසූවේ නව මැලේරියා වාහක මදුරුවා තලෙයිමන්නාරම ප්‍රදේශයේ පේසාලේ ළිඳක තිබී පළමුව සොයාගත් බවත් පසුව වවුනියාවේ බස්නැවතුම්පල ආසන්නයේ සහ ළිඳක තිබී හමු වූ බවත් ය.

කෙසේ වෙතත් මේ දිනවල අදාල මදුරු කීටයින් සොයා වවුනියාව නගර ආශ්‍රිතව විශේෂ පරික්ෂණයක් කෙරෙන බවත් ඒ නිසා ජනතාව අනියත බියක් ඇති කරගත යුතු නැති බවත් ජාතික මැලේරියා මර්ධන ඒකකය පැවසීය.

“ වවුනියාවෙන් එවැනි මදුරු විශේෂයක් හමු වූවත් මේ වන තුරු එවැනි රෝගීන් කිසිවෙක් වාර්තා වෙලා නැහැ.එවැනි රෝගයක් පැතිරීමේ බියකුත් නැහැ.නමුත් මේ මදුරුවා පැතිරීම වළක්වා ගැනීමට තමයි අපි මේ දවස්වල කටයුතු කරන්නේ.මේ මදුරු වාහකයා නගර ආශ්‍රිතව සිටින මදුරුවෙක්.අපි පිටරටින් එන මැලේරියා රෝගීනුත් බොහෝ ප්‍රමාණයක් හඳුනාගන්නවා.පිටරටින් එන රෝගීන් අතර මේ මදුරු විශේෂයේ රෝගීනුත් ඉන්නවනම් මෙය පැතිරෙන්නටත් පුළුවන්. “යැයි නියෝජ්‍ය සෞඛ්‍ය සේවා අධ්‍යක්ෂ ජනරාල් මහජන සෞඛ්‍ය වෛද්‍ය සරත් අමුණුගම මහතා පැවසීය.