එකිනෙකට වෙනස් විවිධ චරිත තුළින් මේ දිනවල ඔබේ ආලින්දයට ගොඩවදින රශිපබා සංදිපනි සමගින් මෙවර "සාරවිට" තරු කතාබහ ආරම්භ කරන්නට අපි බලාපොරොත්තු වුණෙමු. පාසල් අධ්‍යාපනය ලබන කාලයේ සිට රංගන කටයුතුවල නියැළුණ රශිපබා, වර්තමානය වනවිට වෘත්තීයමය මට්ටමේ රංගන ශිල්පිනියක බවට පත්ව සිටින්නීය. මේ ඇය සිය ඉදිරි කලා කටයුතු පිළිබඳව අපට පැවසු දේ.

මේ දිනවල ටෙලිනාට්‍යය කිහිපයකින්ම අපි ඔබව දකිනවා?

ස්වාධීන රූපවාහිනි නාළිකාවේ විකාශය වන "නෙරංජනා" ටෙලිනාට්‍යයේ, ස්වර්ණවාහිනි නාළිකාවේ විකාශය වන "යකඩ කහවුණු" හා දෙරණ රූපවාහිනි නාළිකාවේ විකාශය වන "දේදුන්නයි ආදරේ" කියන නාට්‍යයවල මාව දැකගත හැකියි.

වේදිකා රඟපෑම් නිසා ඔබ ටිකක් කාර්යබහුලත් වෙලා නේද?

ඔව්. අ.පො.ස උසස් පෙළ විභාගය සඳහා පෙනී සිටින පාසල් ළමුන් වෙනුවෙන් රඟදක්වන "සිංහබාහු" හා "රත්නාවලී" නාට්‍යය සමගින් රටපුරා පැවැත්වෙන දර්ශන සඳහා මම සම්බන්ධ වෙනවා. ඒ වැඩ කටයුතු නිසා ටිකක් කාර්ය බහුල වෙලා ඉන්නවා. ඊට අමතරව ටෙලිනාට්‍යය කිහිපයක රූපගත කිරීම්වලටත් මේ දිනවල සහභාගි වෙනවා.

අපි ඔබව දකින ටෙලිනාට්‍යය අතරින් වැඩි පිරිසකගේ ප්‍රතිචාර ලැබෙන්නේ?

දැනට මම රඟපාන ටෙලිනාට්‍යය ගත්තොත් එහි මා රඟපාන්නේ එකිනෙකට බෙහෙවින් වෙනස් චරිත තුනක්. "නෙරංජනා" නාට්‍යයේ "නෙරංජනා" කියන චරිතය ගත්තොත් අහිසංක චරිතයක්. "යකඩ කහවුණු" ටෙලිනාට්‍යයේ "දේවින්දි" චරිතය ගත්තොත් චාම් ගතිගුණ ඇති අහිංසක චරිතයක්. ඒත්, "දේදුන්නයි ආදරේ" ටෙලි නාට්‍යයේ "දෙවුණි" කියන්නේ අර පෙර මා සඳහන් කළ චරිත දෙකට වඩා හාත්පසින්ම වෙනස් චරිතයක්. නපුරු ගතිපැවතුම් ඇති දඟකාර කොළිලොල් චරිතයක් තමයි "දෙවුණි" කියන්නෙ. මට දැනෙන විදිහට ප්‍රේක්ෂයෝ ඒ හැම චරිතයකට ලොකු කැමැත්තක් දක්වනවා. ලැබෙන ප්‍රතිචාරවලින් ඒ බව තේරෙනවා.

නමුත්, "දෙවුණි" කියන්නේ ටිකක් නපුරු ගතිපැවතුම් ඇති කෙනෙක්නේ. මේ චරිතය ඔබට අභියෝගයක් වුණාද?

මේ චරිතයට හැඩ ගැහෙන්න ටිකක් විතර අභියෝගයක් වුණා. මොකද මගේ ස්වරූපය ගත්තොත් ගොඩ දෙනෙක්ට පෙන්නේ චාම් අහිසංක ගතියක්. නමුත්, දැන් මාව දකින බොහෝ දෙනෙක් අහන්නේ කොහොමද ඔයා ඔච්චර හොඳට "දෙවුණි" කියන නපුරු චරිතය රඟපාන්නෙ කියලා. ඉතින් මගේ රසික, රසිකාවියෝ මේ චරිතය ගැන කතා කරන්නේ මෙම ඒ චරිතය හොඳට කරපු හින්දානේ. ඉතින් ඒ ගැන ලොකු සතුටක් මට තියෙනවා.

ටෙලිනාට්‍යය නිළියක් විදිහට ඔබ ආපු ගමන් මඟ ගැන කිව්වොත්?

වෘත්තීයමය රංගන ශිල්පිනියක් විදිහට වැඩ කරන්න පටන් අරන් දැන් අවුරුදු 4ක් විතර වෙනවා. ඉතින් මේ ගෙවපු අවුරුදු කිහිපය තුළ රංගන ශිල්පිනියක් විදිහට යම් දුරක් ඇවිල්ලා තියෙනවා කියලා මට හිතෙනවා. ඉතින් මේ ක්ෂේත්‍රය තුළ මගේ ඉලක්ක කිහිපයක්ම තියෙනවා. ජනප්‍රිය වගේම දක්ෂ නිළියක් ලෙස සම්මාන ලබන්නත් මට ලොකු උවමනාවක් තියෙනවා.

රංගන ශිල්පිනියක් කිව්වාහම ඒ පිළිබඳව දැනීමක් හැදෑරිමක් තියෙන්න ඕනා?

පාසල් යන කාලේ ඉඳලා මම රංගන කටයුතුවලට නිරත වෙලා තියෙනවා. පාසල් අධ්‍යාපනය ලබන කාලෙ මම පාසල් වේදිකාවෙ ජනප්‍රිය චරිතයක්. සමස්ත ලංකා පාසල් මට්ටමින් පැවැති තරගවලට පවා සහභාගි වෙලා මම ජයග්‍රහණ අත්කරගෙන තියෙනවා. කුඩා කාලෙ ඉඳලා රංගනය කියන දේ මගේ ඇඟේම තිබුණ දෙයක්. නමුත්, මගේ අදහසක් තියෙනවා ඉදිරියටත් රංගනය පැත්තෙන් තව තවත් හැදෑරීම් සිදු කරන්න.

බුද්ධික සේනාධීර / ඡායාරූප - රශිපබාගේ ෆෙස්බුක් ගිණුමෙනි