(නිමල කොඩිතුවක්කු)

මොරටුව වෛද්‍ය සිසුන්ට අවශ්‍යය සායනික පුහුණුව ලබා දීම සඳහා කලුතර, නාගොඩ ශික්ෂණ රෝහල තුළ මහාචාර්ය ඒකයක් ස්ථාපිත කිරීමට සෞඛ්‍ය අමාත්‍යාංශය පියවර ගෙන තිබේ.

ඊට අවශ්‍ය සංවර්ධන කටයුතු` කලුතර, නාගොඩ ශික්ෂණ රෝහල තුළ සහ කලුතර ජාතික සෞඛ්‍ය විද්‍යායතනය මුල්කර ගනිමින් කඩිනමින් සිදුකරන්නැයි සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා බලධාරීන්ට උපදෙස් දී ඇත.

මොරටුව විශ්ව විද්‍යොලයට අනුබද්ධ වෛද්‍ය පීඨය මේ වන විට වර්ෂ හතරකට අදාළ වෛද්‍ය සිසුන් 400 කට ආසන්න ප්‍රමාණයක් අධ්‍යයන කටයුතු වල නිරත වන අතර එහි සිව්වන වසරේ අධ්‍යයන කටයුතු සිදුකරන වෛද්‍ය සිසුන් සඳහා මහාචාර්ය පුහුණුව සඳහා අවශ්‍ය පහසුකම් නොමැතිවිම හේතුවෙන් මෙම පියවර ගෙන තිබේ.

ඒ අනුව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් සෞඛ්‍ය අමාත්‍යාංශය, උසස් අධ්‍යාපන අමාත්‍යාංශය, විශ්ව විද්‍යාල ප්‍රතිපාදන කොමිසම, මහා භාණ්ඩාගාරය, මොරටුව විශ්ව විද්‍යාලය ඇතුලු ආයතන නියෝජිතයන්ගේ ප්‍රධානත්වයෙන් පැවති හමුවකදී මෙම පියවර ගෙන තිබේ.

කළුතර ජාතික සෞඛ්‍ය විද්‍යායතනය තුළින් වසරකට සෞඛ්‍ය වෘත්තියන් 1000 කට අධික පිරිසක් පුහුණුකර මෙරට සෞඛ්‍ය සේවාවට එක් කර ගැනීමට අවශ්‍ය වැඩපිළිවලක් කඩිනමින් සකස් කරන්නැයිද අමාත්‍යවරයා එහිදි උපදෙස් දුන්නේය.