ගුවන් සේවිකාවක් වීමේ සිතේ ඇතිව නිරූපණ ක්ෂේත්‍රය තුළ නියැළෙන ඇය රෙවනි සිල්වාය. ඇගේ කලා කටයුතු සහ ඉදිරි බලාපොරොත්තු පිළිබඳව කතාබහ කිරීමට අපත් සමග මෙසේ එක්විය.

ඔයාව හඳුන්වා දුන්නොත්?

මගේ නම රෙවනි සිල්වා. වයස අවුරුදු 19යි. මම අධ්‍යාපනය ලැබුවේ, Princess of wales collage හිදීය. පදිංචි වෙලා ඉන්නේ මොරටුවේ.

දැන් පාසල් අධ්‍යාපන කටයුතු අවසන්ද?

ඔව් අවසන්. එයාර්ලයින් ඩිප්ලොමා එකක් කළා. මගේ බලාපොරොත්තුව ගුවන් සේවිකාවක් වීමයි.

එතකොට නිරූපණය කරන්නේ?

ඒක වෘත්තියක් විදිහට නෙමෙයි කරන්නේ. හැම ගෑනූ ළමයෙකුම Beauty Queen කෙනෙක් වෙන්න ආසාවක් තියෙනවා. ඉතිං ඒ ආසාව මටත් තියෙනවා. පාසල් අධ්‍යාපනය අවසන් වීමත් සමගම දෙරණ 4ever මිස් ශ්‍රී ලංකා ෆෝ මිස් එර්ත් තරගයට අයදුම් කළා. ඒ තරගයෙන් අවසන් දොළොස් දෙනා අතරට තේරුණා. ඒකත් සමගම මේ දවස්වල නිරූපණ ක්ෂේත්‍රයේ වැඩකටයුතුවල තමයි නියැළි ඉන්නේ.

මේ දිනවල දායක වෙලා තියෙන වැඩකටයුතු ගැන කිව්වොත්?

චිත්‍රපටයක් සඳහා ආරාධනාවක් ලැබුණා. ඒකේ වැඩකටයුතුවල තමයි මේ දවස්වල නියැළී ඉන්නේ.

ගෙදරින් නිරූපණයට එකතු වෙනවාට කැමැත්තක් තියෙනවාද?

ගෙදරින් අකමැත්තක් නැහැ. ෂූටින් වැඩවලට යද්දී උනත් අම්ම මගේ පස්සෙන්ම ඉන්නවා.

නිරූපණය කියන දේ ගැන පැහැදීමක් තියෙනවාද?

ඉස්සරහට වඩා අද ලංකාවේ නිරූපණයට තැනක් තියෙනවා. ඉතිං මං හිතනවා නිරූපිකාවක් විදිහට මටත් සාධාරණයක් මේ ක්ෂේත්‍රයට කරන්න පුළුවන් කියලා.

කවුරු හරි කොටට ඇඳලා ෆොටෝ ෂූට් එකක් කරපු පළියට ඇය නිරූපිකාවක් වෙනවාද?

නිරූපිකාවක් වෙන්න කොටට ඇඳලම ෆොටෝ ෂූට් එකක් කරන්න ඕනේ නැහැ. දිගට ඇඳලා ෆොටෝ ෂූට් කරන්න ඕනේ කියලා නීතියකුත් නැහැනේ.

ඉදිරි කටයුතු ගැන කිව්වොත්?

නිරූපණ හා කලා කටයුතුවලට දායක වෙනවා සහ ගුවන් සේවිකාවක් වීමේ බලාපොරොත්තුව ඉෂ්ට කරගැනීමට මහන්සි වෙනවා.

කවුරු හරි මතක් කරන්න ඉන්නවාද? උදව් කරපු අය වගේ?

ඔව්, මගේ අම්මවයි, තාත්තාවයි මතක් කරනවා. මගේ වැඩකටයුතු සඳහා එයාලා ගොඩක් උදව් කරනවා. පැජන්ට් එකේ ඉන්න කාලේ උදව් කරපු ගොඩක් අය ඉන්නවා. විශේෂයෙන් ස්තූති කරනවා, දිනේෂ් චන්ද්‍රසේන, බ්‍රයන් කෙර්කෝවන් මහත්මයාට සහ ටීවී දෙරණ වැඩසටහන් අධ්‍යක්ෂක ෂර්මිලා ධර්මරස මෙනෙවියටත් මේ මොහොතේ ස්තූති කරනවා.

ඩිලාන් ක්‍රිෂාන්ත / ඡායාරූප - රෙවනිගේ ෆේස්බුක් ගිණුමෙනි.