(කේ. බුද්ධික කුමාරසිරි)

අවිස්සාවේල්ල - කොළඹ හයිලෙවල් මාර්ගයේ පාදුක්ක මාවතගම කොඩිගහකන්ද මාවත අසලදී යතුරු පැදි දෙකක් එකිනෙක ගැටීමෙන් අද (10)වැනි දින සවස සිදු වූ අනතුරකින් එක් යතුරුපැදියක පසුපැදිකරු ලෙස සිටි කාන්තාවක් එම ස්ථානයේදීම මියගොස් ඇතැයි පාදුක්ක පොලිසිය පවසයි.

අනතුරට ලක් වූ යතුරු පැදි දෙකම පහත්ගම දෙස සිට මීපේ දෙසට ධාවනය කර ඇති අතර මියගිය කාන්තාව තම ස්වාමිපුරුෂයා සමඟ ගමන් ගත් යතුරුපැදිය වම් අත දෙසින් ධාවනය කරමින් සිට එක්වරම මාර්ගය හරහා දකුණු පැත්තට ධාවනය කරවීමේදී එම දෙසටම ධාවනය වූ තවත් යතුරු පැදියක් ගැටීමෙන් මෙම අනතුර සිදුව ඇති බවද පොලිසිය පවසයි.

අනතුරින් තුවාල ලැබූ මියගිය කාන්තාවගේ ස්වාමිපුරුෂයා සහ අනෙක් යතුරු පැදියෙහි පැදිකරු සුළු තුවාල ලබා පාදුක්ක දිසා රෝහලට ඇතුලත් කර ඇති අතර මියගිය කාන්තාවගේ දේහය එම රෝහලේ ම මෘත ශරීරාගාරයේ තැන්පත් කර ඇත.

ඒ පිළිබදව වූ හදිසි මරණ පරීක්ෂණය පැවැත්වීමට නියමිතය.

පාදුක්ක පොලිසිය වැඩිදුරටත් පරීක්ෂණ පවත්වයි.