ජාතික තරුණ සේවා සභාවත්, යෙවන කටයුතු හා නිපුණතා සංවර්ධන අමාත්‍යංශයත් එක්ව සංවිධානය කරන ශ්‍රී ලංකා යොවුන් රේසිං පාපැදි තරගය අද (8) පෙරවරු 8.30 ට මඩකළපුව පුස්තකාලය අසළින් ඇරැඹෙයි. කිලෝමීටර 365 ක දුරකින් යුත් රේසිං පාපැදි තරගය අදියර තුනකින් ක‍්‍රියාත්මකවේ. රේසිං පාපැදි තරගයේ පළමු අදියර අද මඩකළපුවෙන් ආරම්භ වී කාන්තන්කුඩි, පදිරිප්පු, කල්මුනේ, සමන්තුරේ, අම්පාර, දමන, පල්ලේවෙල හරහා සියඹලාණ්ඩුව නගරයෙන් අවසන් වේ. හෙට (9 වැනිදා) සියඹලාණ්ඩු නගරයෙන් ආරම්භවන දෙවැනි අදියර කොඩයාන, මොණරාගල, බුත්තල, වැල්ලවාය, තණමල්විල, ලූණුගම්වෙහෙර හරහා තිස්සමහරාමයෙන් නිමාවේ. තිස්සමහරාම නගරයෙන් 10 වැනිදා ආරම්භවන අවසන් අදියරේදී තරගකරුවෝ මිරිජ්ජවිල, අම්බලන්තොට, නෝනාගම, රන්න, තංගල්ල, දික්වැල්ල නගර ඔස්සේ මාතර සනත් ජයසුරිය ක‍්‍රීඩාංගණය අසළින් තරගය අවසන් කරති. රේසිං පාපැදි තරගයට සමගාමීව පැවැත්වෙන ස්ටෑන්ඩර්ඞ් පාපැදි තරගයේ දුර කිලෝමීටර 125.4 කි. මඩකලපුව පුස්තකාලය ඉදිරිපිටින් ආරම්භ වන තරගය මඩකළපුව, කාන්තන්කුඩි, පදිරිප්පු, කල්මුනේ, සමන්තුරේ, අම්පාර, දමන, පල්ලේවෙල හරහා සියඹලාණ්ඩු නගරයෙන් අවසන්වේ. රේසිං තරගයේ ශූරයාට වටිනා මෝටර් රථයක් පිරිනමන මෙම තරගය සඳහා තරගකරුවන් 120 කට ආසන්න සංඛ්‍යාවක්ද, ස්ටෑන්ඩර්ඩ් පාපැදි තරගයට තරගකරුවන් 300 කට වැඩි පිරිසක් ද ඉදිරිපත්ව සිටින බව සංවිධායක කමිටුව පවසයි. රේසිං තරගයේ දෙවැනි ස්ථානය දිනා ගන්නා තරගකරුට රුපියල් ලක්‍ෂ තුනක් ද, තෙවැනි ස්ථානයට රුපියල් ලක්‍ෂ දෙකක් ද පිරිනැමේ. 25 වැනි ස්ථානය දක්වා තරගය නිම කරන තරගකරුවන්ට මුදලින් ත්‍යාග පිරිනැමීමට ද කටයුතු යොදා තිබේ. අදියර ජයග‍්‍රහකයන්ට සහ කණ්ඩායම් ජයග‍්‍රහකයන්ට ද වටිනා ත්‍යාග පිරිනැමේ. ස්ටෑන්ඩර්ඩ් පාපැදි තරගයේ ශූරයාට රුපියල් 100,000 ක්ද, දෙවැනි ස්ථානයට රුපියල් 75,000 ක් සහ තෙවැනි ස්ථානයට රුපියල් 50,000 ක් ලෙස 25 වැනි ස්ථානයට තරගය නිම කරන ධාවකයා දක්වා මුදල් ත්‍යාග පිරිනැමේ. රේසිං සහ ස්ටෑන්ඩර්ඩ් තරගදෙකේ පළමු ස්ථානයේ සිට 5 වැනි ස්ථානය දක්වා තරගකරුවන්ට හිමි ත්‍යාග මෙම 11 වැනිදා පස්වරු 3.00 ට ජනාධිපති මහින්ද රාජපක්‍ෂ මහතාගේ ප‍්‍රධානත්වයෙන් කොළඹ ක‍්‍රීඩා අමාත්‍යංශ ක‍්‍රීඩාංගණයේදී පිරිනැමීමට නියමිතය.