ශ්‍රී ලංකා රග්බි සංගමයේ නව සභාපතිවරයා ලෙස අසංග සෙනවිරත්න මහතා  නිතරගයෙන් පත්ව සිටියි. ඒ මහතා දැනට එම සංගමයේ උපසභාපතිවරයා ලෙස කටයුතු කරයි. රග්බි සංගමයේ නිලවරණය (2011-12) ලබන ජනවාරි 7 වැනිදා පස්වරු 5ට බත්තරමුල්ල වෝටර්ස් එජ් ශාලාවේ දී පැවැත්වීමට නියමිතය. වත්මන් භාණ්ඩාගාරික කිරාන් අතපත්තු මහතාත් මෙවර එම ධුරයට නිතරගයෙන් පත්ව සිටින අතර සෙසු තනතුරු සඳහා නාමයෝජනා රැසක් ඉදිරිපත්ව තිබෙන බැවින් එම තනතුරු පිරවීම සඳහා ඡුන්ද විමසුමකට යාමට සිදු වනු ඇතැයි ද වාර්තා වේ. සංගමයේ උප සභාපති ධුරය සඳහා දැනට එම ධුරය දරන ලසිත ගුණරත්න මහතා හා මොහාන් සමරකෝන් මහතා තරග වදිති. ප‍්‍රධාන ලේකම් ධුරය සඳහා දැනට යෝජනා දෙකක්  ඉදිරිපත්ව තිබෙන අතර ඒ සඳහා තරග වදින්නේ වත්මන් ලේකම් ෂේන් දුහුල්ලෑව හා රිස්වි ඉල්ලියාස් යන මහත්වරුන්ය. සංගමයේ කාරක සභාව සඳහා සභිකයන් නව දෙනකු තෝරා ගැනෙන අතර ඒ සඳහා ද නාමයෝජනා 11ක් ඉදිරිපත්ව තිබේ. සියලූ පළාත් රග්බි සංගම් යෝජනා ස්ථිරත්වයෙන් අසංග සෙනවිරත්න මහතා හා කිරාන් අතපත්තු මහතා සභාපති ධුරය හා භාණ්ඩාගාරික ධුරය සඳහා යෝජනාවී තිබෙන අතර අතපත්තු මහතා වසර කීපයක්  තිස්සේ රග්බි සංගමයේ සාමාජික ධුරය දරන අතර පැවැති රග්බි අතුරු කමිටුවේ ලේකම් ධුරය ද දැරීය. බස්නාහිර පළාත් රග්බි සංගමය නියෝජනය කරන නව  සභාපතිවරයා ”සී.ආර්. සහ එෆ්.සී. කී‍්‍රඩා සමාජය නියෝජනය කරමින් රග්බි ක‍්‍රීඩකයකු ලෙස කටයුතු කළේය. සෙනවිරත්න මහතා ලබන ජනවාරි 3 වැනිදා පැවැත්වෙන ශ්‍රී ලංකා කි‍්‍රකට් ආයතනයේ උප සභාපති ධුරයකට ද නාමයෝජනා බාර දී තිබේ.