(සිරංගිකා ලොකුකරවිට)

කිසිම දෙයක් ස්ථිර නැති ලෝකයක රජයේ සේවය ස්ථිර කියල හිතාගෙන අපේ තරුණ තරුණියන් ඉල්ලනවා කාර්යාල කාර්ය සහායක තනතුරක් හරි දෙන්න කියලා. මේ තමයි අපේ සමාජය අද හැඩ ගැහිලා තියෙන හැටි. නමුත් හොඳ ව්‍යපාරයක් කරගෙන, හොඳ ව්‍යවසායකයෙක් වෙලා ඊට වඩා යමක් උපයන්න පුළුවන් බවත් රටට සේවයක් කරන්න පුළුවන් බවත් අපේ අය තේරුම් නොගැනීම කණගාටුවක්.’’ යැයි ස්වදේශ කටයුතු අමාත්‍ය වජිර අබේවර්ධන මහතා අඟහරුවාදා (11)  ගාල්ලේ දී කීවේය.

අමාත්‍යවරයා මේ බව කියා සිටියේ කුඩා ව්‍යාපාර සංවර්ධන අධිකාරිය මගින් ගාල්ල නගර ශාලා භූමියේ දී ආරම්භ කෙරුණු ගාලූ ව්‍යවසාය-2017 ප‍්‍රදර්ශනය විවෘත කිරීමේ අවස්ථාවට එක්වෙමිනි. එහි දී අමාත්‍ය වජිර අබේවර්ධන මහතා වැඩිදුරටත් මෙසේ ද කීවේය.

‘‘අපේ අය හිතනවා රාජ්‍ය සේවය ස්ථිරයි කියා. රාජ්‍ය සේවයත් ස්ථිර නැහැ. විශ‍්‍රාම වැටුපක් ලැබෙන නිසා තමයි රාජ්‍ය සේවයට මේ තරම් පොරකෑමක් ඉල්ලූමක් තියෙන්නේ. නමුත් අපි දකිනවා රටේ මේ වගේ කර්මාන්ත කරන නිෂ්පාදන කරලා අළෙවි කරමින් ව්‍යාපාරයක් කරන අය කොතරම් සේවයක් මේ රටට රටේ ආර්ථිකයට කරනවා ද කියා. ඒ නිසා කුඩා ව්‍යාපාර ක්ෂේත‍්‍රය වැඩිදියුණු කරන්න අපි රජයක් ලෙස විශාල අවධානයක් යොමු කරලා තියෙනවා. ව්‍යාපාර කරන අයට ස්වශක්ති ණය ව්‍යාපාරය හඳුන්වා දුන්නා රුපියල් 250,000ක ණයක් ලබාදෙන විට රුපියල් 50,000ක් දෙන්නේ නැවත අය කරගන්න නොවෙයි.

මේ සඳහා කර්මාන්ත ක්ෂේත‍්‍රයේ විශාල පිරිසක් සම්බන්ධ වුණා.  සුළු ව්‍යාපාරිකයන් තමන්ගේ කර්මාන්තය දියුණු කරගෙන ගුණාත්මක බවින් වැඩි නිෂ්පාදන අළෙවි කරනවානම් මේවා තවතවත් දියුණු කරන්න පුළුවන්. අපි දන්නවා මීට දශක කිහිපයකට පෙර මාගාල්ල ඉතා ප‍්‍රසිද්ධව තිබුණේ රේන්ද කර්මාන්තය සම්බන්ධයෙන්. නමුත් අද මාගාල්ලේ රේන්ද කර්මාන්තය කරපු අය දැන් කරන්නේ නිමි ඇඳුම් කර්මාන්තය. ඔවුන් කාලානුරූපව වෙනස් වෙලා තියෙනවා. අම්බලන්ගොඩ වෙස්මුහුණු කර්මාන්තය කරපු අයත් අද නව වෙළෙඳ පොළට ගැලපෙන ආකාරයට තමන්ගේ නව නිර්මාණ බිහිකරන්න පටන් අරගෙන. මේ ආකාරයට අපේ කුඩා කර්මාන්ත දියුණු කළ යුතුයි. අපි රජයක් ලෙස මේ වගේ කර්මාන්ත දියුණු කරන්න අවශ්‍ය පියවර ගනිමින් සිටිනවා.’’ ඇමැති වරයා පැවසීය.