---

ආචාර්ය හර්ෂ ද සිල්වා මහතාගේ කතාවෙන් පසු නියෝජ්‍ය කතානායකවරයා විසින් පාර්ලිමේන්තුව ලබන 27 වැනි දා පස්වරු 1 වන තෙක් කල් තබනු ලැබීය.

---

ආචාර්ය හර්ෂ ද සිල්වා 

රටේ ඇති වී තිබෙන තත්ත්වය ගැන සහ ඔක්තෝබර් කුමන්ත්‍රණය ගැන මන්ත්‍රීවරුන් අද කතා කළා. පාර්ලිමේන්තුව විසිරුවන්න හේතුව ගැන ජනාධිපතිවරයා ජාතිය අමතන කතාවෙන් කිව්වා. 

මන්ත්‍රීවරුන් කෝටි ගණන් වලට ගිය බව ජනාධිපතිවරයා කිව්වා. ‘රංගෙද‘ කියලා අාව දුරකතන ඇමතුම මගේ ෆේස්බුක් එකේ දැම්මා. එය ලක්ෂ 10ක් පමණ බලලා තියෙනවා.

දැන් තිබෙන නීතිය ගැන මන්ත්‍රීවරුන්ට එරෙහිව විනය පියවරක් ගත්තොත් මාසයක් ඇතුළත ශ්‍රේෂ්ඨාධිකරණයට යන්න පුලුවන්.

මන්ත්‍රීලා සල්ලි දීලා ගන්නවට එරෙහිව එදා පාර්ලිමේන්තුවේ  කතා කළේ දිනේෂ් ගුණවර්ධන සහ ජී ඇල් පීරිස් මහත්වරුන්.

මන්ත්‍රීවරුන් පක්ෂ මාරු කිරීම නවත්වන්න ආණ්ඩුක්‍රම ව්‍යවස්ථාවට සංශෝධනයක් ගෙන ආ යුතුයි. 

---

අජිත් මාන්නප්පෙරුම 

රට යපාලනය වෙන්න නම් ව්‍යවස්ථාදායකය, විධායකය හා අධිකරණය හරියට වැඩ කළොත් රට ප්‍රජාතන්ත්‍රවාදී වෙනවා. එදා ජනාධිපතිවරයා කියන විදියටයි ව්‍යවස්ථාදායකයයි, අධිකරණයයි වැඩ කළේ. අපි එය නැවැත්තුවා. මේ රටේ ජනතාවට විශ්වාස කළ හැකි අධිකරණයක් ඇති කරන්න හැකි වෙලා තියෙනවා.

කරු ජයසූරිය මහතා ආදි ආනන්දියෙක්. මමත් ආදි ආනන්දියෙක්. ව්‍යවස්ථාදායකය ශක්තිමත් කියලා පෙන්වන්න කොන්දක් කතානායකතුමාට තිබෙනවා. පාර්ලිමේන්තුව කාටවත් නැමෙන තැනක් නෙමෙයි කියලා පෙන්වන්න කතානායකතුමාට පුලුවන් වුණා.

අද රට අරාජිත වෙලා නෑ. රට අරාජික කරලා තියෙනවා. පාර්ලිමේන්තුවේ අභියෝගවලට මුහුණ දෙන්න බැරි අගමැතිවරයෙක් බිහි කළා. ඡන්දයක් තියෙනවා කිව්වාම කතානායක පුටුව පෙරලනවා. පොලිසියට ගහනවා. අයි පාර්ලිමේන්තුව අරාජික කරන්න හදන්නේ? 

ව්‍යවස්ථාවක් හදන්නේ එක රැයෙන් නෙමෙයි. රට කරවන යන ලියැවිල්ල සාකච්ඡා කරලයි නිර්මාණය කළේ. මේ ව්‍යවස්ථාවට එකඟව කටයුතු කරනවා කියලයි මන්ත්‍රීවරුන් දිවුරුම් දෙන්නේ. ජනාධිපතිවරයා අගවිනිසුරුවරයා ඉදිරිපිට දිවුරුම් දෙන්නෙත් ව්‍යවස්ථාව රකිනවා කියලයි. 

දැන්වත් හරි තීන්දුව ගන්නා ලෙස ආයාචනා කරනවා. 

---

බන්දුලාල් බණ්ඩාරිගොඩ 

කිහිප දෙනකුගේ උවමනා නිසා අද මුලු රටම බිල්ලට දෙමින් යනවා. අද කතානායකගේ පඹයො පුච්චනවා සමහරු. මේ පාර්ලිමේන්තුවේ කතානායක ව්‍යවස්ථාවට අනුව සහ ස්ථාවර නියෝගවලට කටයුතු කළ නිසා ඔහු පහරකෑමට පත් වෙනවා. කතානායකට විරෝධය දක්වන්න අවශ්‍ය නම් ස්ථාවර නියෝග අනුව මේ සභාවෙදි කටයුතු කරන්න පුලුවන්.  

ජනාධිපතිවරණ සමයේ වඳුරඹ වේදිකාව ගිනි තිබ්බා. වඳුරඹ පොලිස් ස්ථානාධිපතිට ඉල්ලා අස් වෙන්න වුණා බලපෑම් නිසා. අද ඒ වෙඩි තැබීමේ ප්‍රධාන පුද්ගලයට නියෝජ්‍ය ඇමැතිකමක් දුන්නා. ඒ නඩුවේ සැකකරුවන් විදියට ඉන්න නම දෙනාගෙන් හය දෙනකුට වරායේ රස්සාවල් දුන්නා. නමුත් ඒ ගිනි තිබ්බ වේදිකාව හදපු අය ගැන බැලුවේ නෑ.

අපි ඕවා කලින් දැක්කා. අගමැතිතුමා කිව්වා ජනාධිපතිට විරුද්ධව මොනවත් කියන්න එපා කියලා. අපි රස්සාවල් දෙන්න යද්දි විවිද හේතු කියලා ඒවා නතර වුණා.

 

---

නියෝජ්‍ය කතානායකවරයා මූලාසනයට පැමිණේ.

---

ඉෂාක් රහුමාන්

බොහොම පැහැදිලිව ලියැවුණු ව්‍යවස්ථාවක් අපට තිබෙනවා. නමුත් ඒ ව්‍යවස්ථාවට අනුව නෙමෙයි දැන් වැඩ කරන්නේ. ඔක්තෝබර් 26 වෙනකම් මහතීර් මොහොමද්, ලීක්වාන් වගේ වෙන්න හිටියා. ඉන් පස්සේ එය ඈත් වුණා.

අපේ රටට වගේම වැරදි කරපු නායකයෝ හිටපු රටක් හැටියටයි අද ලංකාවේ ලෝකයේ කොං වෙලා තියෙන්නේ. ඩොලරය රුපියල් 180ට වැඩි වෙලා තියෙනවා.

මේ සියල්ල කරන්නේ ලංකාවේ ඉන්න කෝටි දෙක හමාරක් වෙනුවෙන්ද? පාර්ලිමේන්තුවේ ඉන්න 225 බල ලෝභය වෙනුවෙන්ද?

එදා නීතිය රකින පොලිස් නිලධාරීන්ට ගහන හැටි අපි දැක්කා. අපිට හදිස්සියට උදව් කළ පාර්ලිමේන්තුවේ නිලධාරීන්ට පුටුවෙන් ගහපු විදිය දැක්කා.

මගේ පුතත් ඉස්කෝලේ යන පොඩි ළමයෙක්. පුතා සිකුරාදා උදේ බොක්සින් බලන්න ඕන කිව්වා ඉස්කෝලේ යන්නේ නැතුව. ඉස්කෝලේ ගිහින් ඉන්න කිව්වාම කිව්වා උදේ පාර්ලිමේන්තු නිසා බොක්සින් බලන්න පුලුවන් කියලා. මෙහෙම හැසිරෙන මන්ත්‍රීවරුන් තෝරලා හවන්න එපා. 

මම මන්ත්‍රීවරයකු ලෙස පත් කරලා අවුරුදු තුනයි. අපි එක්ක පසුපෙළ ඉන්න මන්ත්‍රීවරු තවම හොඳට ඉන්නවා. එයාලත් ඇමැතිවරු වුණාට පස්සේ කොහොම වෙයිද දන්නේ නෑ. 

මම හැම මාසෙම ආසනයේ ගම්මාන හැම එකකටම ගියා. මට කෝටි 50ක් දෙන්නම් කිව්වා. මාත් එක්ක පත්වුණු අනිත් ඇමැතිවරුන්ගේ කොන් කිරීම් තිබ්බත් මුදල් වලටත් තනතුරුවලටත් ජනවරම පාවලා දෙන්නේ නෑ.

අපිට කළ අසාධාරණවලට පාඩමක් උගන්වන්න කල්පනා කළා. ගයන්ත ඇමැතිතුමා වගේ කිහිප දෙනෙකු අපේ දුක අහලා අපිට උදව් කළා.

අපේ සමහර ඇමැතිවරු ගැරඩියට ලාම්පුතෙල් ගැහුවා වගේ දුවනවා ඉස්සර. දැන් අපේ කරට අත දාගෙන කතා කරනවා. ඉස්සරත් එහෙම තිබ්බා නම් කොච්චර හොඳ ද?

මෙතනින් පස්සේ ආණ්ඩු හදලා ඇමැතිකම් ගන්න ඇමැතිවරුන්ට පාඩමක් කියා දෙන්න. 

අපිට උදව් නොකරන්න පුලුවන්. කමක් නෑ. ආදරණීය මිනිසුන් අපිත් එක්ක ඉන්නවා. අපිට සල්ලි වැඩක් නෑ. මුදල් වැඩක් නෑ.

---

තුෂාර ඉඳුනිල් අමරසේන

මෛත්‍රීපාල මහත්තයා අපි සියලු දෙනාට කළේ මනමේ කුමාරිය වැදි රජ්ජුරුවන්ට කඩුව දුන්නා වගේ වැඩක්. ජනාධිපති තාත්තා පොතේ අවසානයේ තියෙන්නේ 2015 ජනවාරි 09 පාන්දර රනිල් වික්‍රමසිංහ මහත්තයා ප්‍රථමයෙන් සුභ පැතුවා කියලා. එහෙම සුබ පැතුව කෙනාට තමයි අද මෙහෙම කරන්නේ?

පහුගිය පළාත් පාලන ඡන්දයෙදි පොහොට්ටුව ජයග්‍රහණයක් ලබා ගත්තා. අපි දිනන්න තිබ්බ එක නැවැත්තුවේ ජනාධිපතිවරයා. මොකද පළාත් පාලන ඡන්දය කල් දැම්මේ ජනාධිපතිවරයා. 

එක් මන්ත්‍රීවරයෙක් කියලා තිබ්බා පිපීගෙන ආපු බොහොට්ටුව බලයට කෑදර අය හපාගෙන කෑවා කියලා. තව කෙනෙක් කියලා තිබ්බා මෛත්‍රීපාල මහත්තයා මහින්ද මහත්තයාගේ ඔළුවේ ඔට්ටුන්න තියලා සරම කැඩුවා වගේ කියලා.

දැන් ඔට්ටුන්න ඔළුවේ. සරම නෑ හෙළුවෙන්. සරම ඇඳගන්න අත ගත්තොත් ඔටුන්න ගන්නවා. ඔටුන්න බේරගන්න ගියොත් සරම නෑ. සරම ඇඳගන්න ගියොත් ඔටුන්න නෑ. 

මොවුන්ට තියෙන්නේ රට බේරා ගැනීමේ උවමනාවක් නෙමෙයි. තමන්ගේ නඩු ටික බේරාගන්නයි හදන්නේ. බුදු සරණයි දෙවි පිහිටයි කියලා බෝඩ් එක ගැහුවට ඇතුළේ අදින්නේ හරක් මස්. 

 

---

(අද පාර්ලිමේන්තුවේ විඩීයෝ දර්ශන)

---

 

 

 

 

 

ඡායාරූප - ළහිරු හර්ෂණ

---

සිඩ්නි ජයරත්න

ජනාධිපතිවරයා  කිව්වා මන්ත්‍රීවරුන් මිලිය ගණන් වලට විකුණුනා කියලා. කවුද මන්ත්‍රීවරුන් මිලට ගත්තේ? කවුද ඒ තත්ත්වය ඇති කළේ? එදා පාර්ලිමේන්තුවේ සිදුවුණ දේවල් අපි දැක්කා. කතානායකතුමා සම්භාවනීයට කටයුතු කළ ආකාරය අපි දැක්කා.

එතුමා ඇතුළු පාර්ලිමේන්තු කාර්ය මණ්ඩලයට ස්තුති වෙනවා. මම දැන් අවුරුදු 28ක් දේශපාලනයට ඇවිත්. මම විවිධ රාජ්‍ය නිලධාරීන් එක්ක කටයුතු කරලා තියෙනවා. මම දැකපු හොඳම රාජ්‍ය නිලධාරීන් ඉන්නේ පාර්ලිමේන්තුවේ.

ඒ නිලධාරීන්ගේ කාරුණික භාවය තුට්ටු දෙකට දාලා අශීලාචාර විදියට මන්ත්‍රීවරුන් හැසිරුණා. සාමාන්‍ය පෙළ නැති මන්ත්‍රීවරුන් හොඳට හිටියා. උගත් යැයි කියන මන්ත්‍රීවරුන් තමයි එහෙම හැසිරුණේ. විවිධ චෝදනා ලැබුණු අය තවමයි එහෙම හැසිරුණේ.

ඇයි වටලන්නේ නැත්තේ කියලා ඇහුවා. අපි වටලනවා පැජට් පාරේ තියෙන නිවස. අපි තවත් උත්සාහ කරන්නේ පාර්ලිමේන්තුවෙදි විසඳහන්න. අපි මේ සටන පාර්ලිමේන්තුවේදී දිනා ගන්න බැරි වුණොත් පාරේ දි දිනා ගන්නවා.

---

නලින්ද ජයතිස්ස

ඔක්තෝබර 26 සිට සෑම සිකුරාදම ජනපතිගෙන් නිකුත් කරන ගැසට්ටු නිසා තමයි මේ කැළඹීමේ ඇති වුණේ. අදත් සිකුරාදා. අදත් හවස 7ට විතර හඳ මෝදු වෙනවා. අද මොනවා වෙයිද කියලා අපි දන්නේ නෑ.

මෙය තව අගමැතිවරයකු ඉවත් කරලා අලුත් අගමැතිවරයකු යාරූප - ළහිරු හර්ෂණපත් කිරීමක් නෙමෙයි.

බහුතරය හදා ගන්න කෝටි 50ට 60ට මන්ත්‍රීවරුන්ට ලන්සු තියන්න ගත්තා. විවිධ හේතු නිසා ඒකට යොමු වෙන්න මන්ත්‍රීවරුන් හිතන්න පුලුවන්. ඔවුන් ඇමැතිකම් වලට, සල්ලිවලට ගන්න උත්සාහ කළා.

එහෙම කරලා බහුතරය ගන්න බැරි වුණාම කතානයකත් එක්ක කතා නොකර පාර්ලිමේන්තු සැසිය කල් තිබ්බා. ඒ කරලත් බහුතරය හදා ගන්න බැරි වුණාම පාර්ලිමේන්තුව විසිරුවා හැරියා. 

ශ්‍රේෂ්ඨාධිකරණයේ ශ්‍රේෂ්ඨත්වය යම් තරමකට පෙන්නපු නිසා අපිය 14 පාර්ලිමේන්තු එන්න පුලුවන් වුණා. ඉන් පසු විශ්වාස භංග දෙකක් සම්මත කළා. දැන් කියනවා එය පිළිගන්නේ නෑ. තීරණාත්මකව වාර හතරක් කුමන්ත්‍රණ කාරීන් පරාජයට පත් කළා. හඬ අනුව පරාජයට පත් කළා. අත්සන් කරලා දීලා පරාජයට පත් කළා. ඉලෙට්‍රෝනික් ඡන්ද ක්‍රමයෙන් පරාජයට පත් කළා. හඬිත්, අත්සන්වලිනුත්, ඉලෙට්‍රෝනික් ඡන්දයෙනුත් ඔබට මෙය තේරුම් ගන්න බැරිද? 

2014 නොවැම්බර් 21 එවකට අමාත්‍ය මෛත්‍රීපාල සිරිසේන පොදු අපේකෂකයා විදියට එළියට ඇවිත් නව නගර ශාලාවේ ප්‍රවෘත්ති සාකච්ඡාවක් තියලා කිව්වේ විධායක ජනාධිපතික්‍රමය ඉවත් කරනවා කියලයි.

ඕලෙවල්වල් පාස් නැති අය පාර්ලිමේන්තුවට ඇවිත් යකා නටනවා කියලා අපි කියනවා. එයාලා තමන් දන්න ශිල්ප දානවා. ඒත් අපි දැක්කා විශේෂඥ වෛද්‍යවරියන්, හැත්තෑ ගණන්වල ඉඳන් පාර්ලිමේන්තුවේ හිටපු මන්ත්‍රීවරුන් කතානායක පුටුව උස්සන් යනවා. 

අපි කුමන්ත්‍රණකාරීන්ට එරෙහිව අපි වාර හතරක් අපේ බලය පෙන්නුවා.

මීළඟ දවසේ ජනාධිපති පාර්ලිමේන්තුවට ඇවිත් උත්තර දෙයි කියලා අපි බලාපොරොත්තු වෙනවා.

---

ආශු මාරසිංහ 

පාර්ලිමේන්තුවේ හරියට හැසිරෙන්නේ නැති මන්ත්‍රීවරුන්ගේ මන්ත්‍රී ධුරය අහෝසි කෙරන නීති පැනවිය යුතු බවට මම යෝජනා කරනවා. තුෂාර ඉඳුනිල් මන්ත්‍රීතුමයි, මුජිබර් මන්ත්‍රීතුමයි අසභ්‍ය පොතක් ගැන කතා වුණා. මෙය අසභ්‍ය පොතක් නෙමෙයි.

මෙම පොත කියෙව්වාම මට හැඟෙන්නේ හැඟීම් බර පොතක්. අසභ්‍ය පොතක් කියන එක චතුරිකා මහත්මියට කරන අගෞරවයක්. මේ පොත ලියලා තියෙන්නේ පිය සෙනෙහසින් තාත්තා ඇත්ත වශයෙන්ම කරපු දේවල් ගැන කියලයි මම හිතන්නේ.

මේ දියනිය වින්ද මානසික වද වේදනා ගැන මෙහි තිබෙනවා. රාජපක්ෂලාගෙන් ලැබුණු තර්ජන ගැන එහි තිබෙනවා. නොවැම්බර් 22 (2014) ඉඳන් රාජපක්ෂලාගෙන් පියාට ලැබුණු ප්‍රතිචාර ගැන මෙහි තිබෙනවා. 

තාත්තා කෙනෙක් ගැන බයෙන් ලියන කාරුණික සිතුවිලියි මේ පොතේ තියෙන්නේ. අසභ්‍ය පොතක් නෙමෙයි මෙය. මේ පොත දිහා බලාගෙන අපට වෙන්නේ හූලනවද? නැතිනම් දියණිය ගැන අනේ අපොයි කියනවද? 

දියණියට කවදා හරි කියන්න තියෙන්නේ මේ පොත ලිව්වේ මම නෙමෙයි කියලයි. එහෙම නොවුණොත් මේ පොතට අනුව හෘද්ධ සාක්කියෙන් වැළපෙන්න වෙනවා.

මූලාසනයෙන් හේෂාන් විතාන මහතා බැස ගිය අතර චමින්ද විජයසිරි මහතා මූලාසනාරූඪ විය. 

---

එම් තිලකරාජා 

ජනාධිපතිතුමා පාර්ලිමේන්තුව විසිරුවා හැරියට පස්සේ අපි හිටපු මන්ත්‍රීවරුන් වුණා. ඒ සම්බ්නධයෙන් නීති ඉදිරියට ගියාට පස්සේ ගැසට්ටුවට අතුරු තහනමක් ලැබුණා. ඒ අනුව අපි යළිත් මන්ත්‍රීවරුන් වුණා.

ආණ්ඩු පක්ෂයේ නියමිත සංඛ්‍යාවක් හිටියේ නෑ. ඡන්ද විමසීමක් කියපු ගමන් ආණ්ඩුව බියට පත් වුණා. අපි ඡන්දයකට ඕනෑම අවස්ථාවක සූදානම් කියා කියන ආණ්ඩුව පාර්ලිමේන්තුවේ ඡන්දයක් විමසන සෑම අවස්ථාවකදීම ඝෝෂා කරන සහ පාර්ලිමේන්තුවෙන් පිටව යන පිරිසක් බවට පත් වුණා. 

පාර්ලිමේන්තුව තමයි උත්තරීතර ආයතනය.  පාර්ලිමේන්තුව කල් තැබීමෙන් පස්සේ රාජාසන කතාව කළෙත් නෑ.  ඉන් පස්සෙයි ස්ථාවර නියෝග අත්හිටුවලා විශ්වාස භංගය ගෙනාවේ. 

ඡන්ද විමසීම්වලින් පැන යන්න කුමන්ත්‍රණය කළා. කතානායක ඉදිරිපත් කළ නම් 12 ගැන ඡන්ද විමසීමට ඉදිරිපත් නොවී ඔවුන් පැන දුවනවා අපි දැක්කා.  ඉලෙට්‍රෝනික ක්‍රමයෙන් අපි සනාථ කළා ව්‍යාජ ආණ්ඩුවට විරුද්ධයි කියලා.

පාර්ලිමේන්තුවට වැඩියෙන්ම නොපැමිණි මන්ත්‍රීවරයා කියනවා වතුකර ජනතාවගේ රුපියල් 1000 ඉල්ලීම ලබා දෙනවා කියලා.  

රුපියල් 600ක වැටුප රුපියල් 700 කරලා රුපියල් 1000ක් කරනවා කියලා ව්‍යාජ ප්‍රචාරයක් යවනවා.

එහෙම රුපියල් 100ක් වැඩිපුර දීලා පසුව එය ඔවුන්ගෙන් අය කර ගන්නත් මේ අය උත්සාහ කරනවා. 1000ක් දෙන්න බැරි වුණොත් ඉවත් වෙනවා කිව්වා. දැන් ඔවුන් පාර්ලිමේන්තුවෙන් ඉවත් විය යුතුයි.

---

විජයපාල හෙට්ටිආරච්චි

පෘථග්ජනයෝ විදියට කවුරු අතිනුත් වැරදි සිද්ධ වෙනවා. ඒ වැරදි හදාගන්න ඕනා. බොහෝම අහිංසකව පූස්පැටව් වගේ වාඩි වෙලා හිටිය අපටත් චෝදනා එල්ල වුණා. එකදාන් නවසිය හැත්තෑ ගණන්වල ආපු මන්ත්‍රීවරුනුත් කතානායකවරයාගේ පුටුව පෙරලනවා අපි දැක්කා. 

අපට විවිධ ආගමක් තිබ්බාට අපි පාර්ලිමේන්තුවේ ආගමක් ලෙස අදහන්නේ ආණ්ඩුක්‍රම ව්‍යවස්ථාව. අත්හැරීම ගැන කතා කළ සිරිසේන මහත්තයා ද ඉන්නේ කියලා අපට ප්‍රශ්නයක්.

26 වැනි දා අපි පාර්ලිමේන්තු ප්‍රජාතන්ත්‍රවාදය ගැන ඉගෙන ගන්න සංචාරයකට යන්න හිටියේ. ගුවන් තොටුපොළේදි මහින්ද මහත්තයා අගමැති කරලා කිව්වාම මට පොළොව පලාගෙන යන්න හිතුනා. ඡන්දෙන් දිනුවත් මහින්ද මහත්තයා අගමැති කරන්නේ නෑ කිව්ව මෛත්‍රීපාල සිරිසේන මහත්මයා ඔහු අගමැති කර තිබුණා.

අනාගතේ ගැන මේ රටේ ජනතාවට විශ්වාසයක් ඇති විය යුතුයි. කවදා හරි සිංහල වංශකතාවේ ලියැවෙයි පාර්ලිමේන්තුවේ කළු පැල්ලමක් ඇති කාලයක් විදියට.

දිගටම මහින්ද මහත්තයා මෙහෙම අගමැති පුටුවේ තියා ගත්තොත් ජනාධිපතිතුමාට නිල නිවසෙන් එළියට යන්න පුලුවන් වෙයිද දන්නේ නෑ. උත්සව වලට යන්න වෙයිද්ද දන්නේ නෑ. ජනතාව මොනවා කරයිද දන්නේ නෑ. 

 

---

හේෂාන් විතානගේ 

මේ ඇති වෙලා තිබෙන තත්ත්වයේ ප්‍රධාන පාර්ශ්වකරුවා හැටියට ගරු ජනාධිපති මෛත්‍රීපාල සිරිසේන මහතා චෝදනා ගණනාවකට ලක් වෙලා තිබෙනවා.

ඔහු මේ උත්තරීතර පාර්ලිමේන්තුව වසර ගණනාවක් නියෝජනය කළ මන්ත්‍රීවරයෙක්.

ව්‍යවස්ථාදායකය, විධායකය, අධිකරණය ක්‍රියාත්මක වීම ගැන අබමල් රේණුවක දැනුමක් නැති කෙනෙකු ලෙස දැන් පෙනෙනවා.

ව්‍යවස්ථාදායකයට අධිකරණයට තිබෙන බලය ගැන වැටහීමක් නැත්නම් හෝ ඊට උපදෙස් දෙන්න අය තමන් ළඟ නැත්නම් අපිට මොකක්ද කියන්න තියෙන්නේ? රටේ රාජ්‍ය යාන්ත්‍රණය නැවතිලා. ආර්ථික අන්ත අසරණ තත්ත්වයට පාගලා දාලා තිබෙනවා.

දැන් මාසෙකට ආසන්න කාලයක් තවම උත්තරයක් හොයලා නෑ. ව්‍යවස්ථාදාකයේ බලය ජනාධිපතිට තේරෙන්නේ නෑ වගේම මහින්ද රාජපක්ෂ මහතාට තේරෙන්නෙත් නෑ. එක්කෝ තේරිලා නොතේරුණා වගේ ඉන්නවා.  

ව්‍යවස්ථාදායකය කුඩු කාරයන්ට එන්න පුලුවන් තැනක් නොවිය යුතුයි. පහුගිය කාලයේ පොලිසිය කුඩු කාරයන්, කසිප්පු කාරයන් ඇල්ලුවා. ඒ තරහට තමයි පොලිසියට ගැහුවේ.

මේ රටේ ජාතියට අබමල් රේණුවක ආදරයක් තිබෙනවා නම් වරද නිවැරදි කරන්න.බිමල් රත්නායක මහතා මූලාසනයෙන් යැයි හේෂාන් විතාන මහතා මූලාසනයට යෝජනා කර ස්ථිර කර ගනී. ඉන්පසු හේෂාන් විතානගේ මහතා මූලාසනාරූඪ විය.

---

මුජුබර් රහුමාන් මහතා රීති ප්‍රශ්නයක් මතු කරයි   මුජුබර් රහුමාන් - බස්නාහිර සභාවේ අසභ්‍ය චිත්‍රපට බැලීම ගැන පසුගියදා වාර්තා වුණා. ඉඳුනිල් තුෂාර මන්ත්‍රීතුමාත් මේ සභාවේ අසභ්‍ය පොතක් කියවනවා. ඉඳුනිල් තුෂාර - මගේ නම කියවුණා. මම කියවන්නේ චතුරිකා සිරිසේන ලියපු ජනාධිපති තාත්තා පොත.

 

නියෝජ්‍ය කතානායකවරයා යළිත් මුලසුනට පැමිණියේය.

---

එඩ්වඩ් ගුණසේකර 

මේ රට 2015ට පෙර රට දූෂිත මට්ටමට පත් වෙලයි තිබුණේ. දේශපාලන පක්ෂ බේදයකින් තොරවයි ජනාධිපතිවරයෙක් තෝරා පත් කර ගත්තේ. මේ රටේ ධනය සූරාගෙන ගන්න නෙමෙයි.

අපි මිනිස්සු වෙනුවෙනුයි දේශපාලනය කරන්නේ. අපේ දූ දරුවෝ මැරුවත් මේ රට බේරාගන්නවා කියලා හිතලයි අපි ජනාධිපතිවරයා තෝරාපත් කර ගන්න එකතු වුණේ.

අපට අවුරුදු තුනක් යනකම් කරන්න ආපු දේවල් කර ගන්න බැරි වුණා. අපි ණය තුරුස් ගෙවාගෙන ඉස්සරහට එද්දි තමයි අලුත් අගමැති කෙනෙක් පත් කළේ.

ජනාධිපති කළ කාර්ය නිසා රට අස්ථාවර වෙලා තියෙනවා. ආයේ අවුරුදු 50කට වත් රට ඉස්සරහට ගන්න බැරි වෙන තැනට පත් වෙලා තිබෙනවා. 

අද පෙන්වා දුන්නා බහුතරය තිබෙන්නේ කාටද කියලා. ජනාධිපතිතුමාට දැන් යුතුකමක් තියෙනවා මේ අපරාධය නවත්වලා අලුතින් ආණ්ඩුව පත් කරන්න. අපි එතුමාගෙන් ඉල්ලා සිටිනවා මේ දේ සිදු කරන ලෙස. 

---

එරාන් වික්‍රමත්න

ආණ්ඩුවක් මුවාවෙන් පවත්වාගෙන යන මහින්ද රාජපක්ෂ මහතාගේ කණ්ඩායමට අද ඡන්දයත් විශ්වාස භංගයක් වුණා. අද තිබුණ ඡන්දයත් විශ්වාස භංගයක් විදියට සලකන්න පුලුවන්. 

ව්‍යවස්ථාව ආරක්ෂා කරන්න කතානායකවරයා ගත් තීරණය අගය කළ යුතුයි.

ජනාධිපතිවරයාට ව්‍යවස්ථානුකූලව අගමැති පත් කළ හැකි වුවත් අගමැති අයින් කරන්න ජනපතිට බෑ. අගමැති අයින් කරන්න පුලුවන් පාර්ලිමේන්තුවට.

ඒ අනුව අගමැති විතරක් නෙමෙයි  ආණ්ඩුවත් විසිරිලයි තියෙන්නේ.

රජයේ සේවකයන්ට මම කියන්නේ ආඥාවන් පිළිපදිනවා නම් ඒ නියෝග නීත්‍යනුකූලදැයි බලන්න.  ලෝක ඉතිහාසය දිහා බලන්න. අද හෙට නෙමෙයි කවදා හරි ප්‍රතිඵල ලැබෙනවා.

ජනපතිකම් බලෙන් අල්ලං හිටපු අය දශක ගණනකට පස්සේ හිරේ ගොස් තිබෙනවා. ඒ අන පිළිපැද්ද අයටත් ඒකම වුණා.
මෙහෙත් අද හෙට නොවුණත් කවදා හරි ඒ දේම වෙන්න පුලුවන්.

මේක පාර්ලිමේන්තුව. මේකේ වරප්‍රසාද අපිට තිබෙනවා. නමුත් අනිත් අයට හිරිහැර කරන්න අවස්ථාව අපට නෑ. පොලිසිය මෙතනට ආවේ කතානායගේ නියෝගයට.

පොලිස් නිලධාරීන්ට පහර දුන්නා. කම්මුල්පහර දුන්නා. පාර්ලිමේන්තුව ඇතුළේ හිටියත් නීතිය ක්‍රියාත්මක වෙනවා. 

වරප්‍රසාද වලින් රටේ නීතිය අක්‍රීය වෙන්නේ නෑ. පාර්ලිමේන්තු මන්ත්‍රීවරයෙක් වුණා කියලා අපි රටේ නීතියට ඉහළින් නෙමෙයි ඉන්නේ. 

එම පාර්ලිමේන්තු මන්ත්‍රීවරුන් අත්අඩංගුවට අරගෙන නීතිය ක්‍රියාත්මක කළ යුතුයි.

අපි දැක්කා මන්ත්‍රීවරුන් රාජ්‍ය දේපොළ විනාශ කරන හැටි. සාමාන්‍ය පුද්ගලයකු වාහනයක් පැදගෙන ගිහින් ලයිට් කණුවක හැප්පුනොත් ඒකත් වැරදි. පාර්ලිමේන්තුවට ඇවිත් මහජන දේපොළ විනාශ කළාට විශේෂ නීතියක් නෑ. 

පොත්පත් ආයුධ කරගෙන පොත්පත්වලින් ගහනවා අපි දැක්කා. පොත්පත් කියවපු නැති අය ඉන්නවා ඇති. ඒත් පොත්පත්වලට අගෞරව කරන්න එපා. 

ඇඟේ අයියෙන් පාර්ලිමේන්තුවක් ගෙනියන්න බෑ. මොළේ හයියෙන් තමයි පාර්ලිමේන්තුව ගෙනියන්න ඕනෑ. මේ දේවල් කරන්නේ රාජපක්ෂවරුන්ට නඩු දාලා තියෙන නිසයි.

අපේ ආණ්ඩුවෙත් අඩුපාඩු තිබුණු බව අප පිළිගත යුතුයි. අනුර කුමාර දිසානායක මහතා කිව්වා රාජපක්ෂ රජයේ චූදිතයන් ආරක්ෂා කළා කියලා. එහෙම කරලා තියෙනවා නම් ඔවුන්ට එරෙහිව නීතිය ක්‍රියාත්මක වෙලා තියෙනවා. හොරකම් කළා නම්, බැඳුම්කර හොරකම් වුණා නම් ඒවා ගැනත් නීතිය ක්‍රියාත්මක විය යුතුයි.

අපි නීතිපතිට කියනවා ඒ සම්බන්ධයෙන් කඩිනමින් නීතිය ක්‍රියාත්මක කරන්න කියලා. අඩුපාඩු හදාගෙන ඉස්සරහට යන්න ඕනෑ.

---

පාලිත රංගේ බණ්ඩාර මහතාට කෝටි 50ක් දීමට ලබා දුන් දුරකතන ඇමතුම් පාර්ලිමේන්තුවේ ක්‍රියාත්මක කරද්දී මූලාසනයේ සිටින නියෝජ්‍ය කාරක සභා සභාපතිවරයා ඊට අවස්ථාව ලබා නුදුන්නේය.

---

පාලිත රංගේ බණ්ඩාර මහතා 

විජිත හේරත් මන්ත්‍රීවරයාගේ යෝජනාව ගැන කතා කරන්න ලබා දීම ගැන ස්තුතිවන්ත වෙනවා.

පසුගිය ඔක්තෝබර් මාසයේ ජපානයේ නිල කටයුත්තකට ගිහින් ඉන්දි ආරංචි වුණා මහින්ද රාජපක්ෂ මන්ත්‍රීවරයා අගමැතිවරයා ලෙස දිවුරුම් දෙන බව. 

27 වැනි දා මම නිල කටයුත්තට යන්න සූදානම් වෙද්දි මට දුරකතන ඇමතුමක් ආවා මේ රටේ ප්‍රධාන පුරවැසියාගෙන්. ඔහු මට කිව්වේ අලුතින් බිහිකරන ආණ්ඩුවට ඇවිත් කැබිනට් ඇමැති ධුරයක් බාර ගන්න කියලා.

ඉන් පසු ලංකාවට ආවට පස්සේ ආයෙත් දුරකතන ඇමතුමක් ආවා. ප්‍රධාන පුරවැසියා මට කිව්වේ හම්බෙමු, මේ අාණ්ඩුවට සම්බන්ධ එන්න කියලා. මම මගේ අකමැත්ත සෘජුවම ප්‍රකාශ කළා.

මේ ව්‍යසනකාරී තත්ත්වය ඇති කරලා රටේ ප්‍රධාන පුරවැසියා මාධ්‍ය හමුවය ඇවිත් පාර්ලිමේන්තුව විසිරුවන්න හේතු කිව්වා.

මන්ත්‍රීවරුන් මිල ගණන්වලට විකිණීම නිසා පාර්ලිමේන්තුව විසිරුවන්න වුණා කිව්වා. මෙවැනි තත්ත්වයක් ඇති කළේ මේ රටේ ජනාධිපතිතුමා. 

ඔහුගේ තීරණය නිසා මන්ත්‍රීවරුන්ට කතා කළා. එස්බී නාවින්න මහතා අනිත් පැත්තට යනවා කියලා ආරංචි වෙලා අපි එස්බී නාවින්න හමුවෙන්න ගියා. 

මේ කපුකම කළ පුද්ගලයා මට දිගින් දිගටම කතා කළා රුපියල් කෝටි 50ක මුදලක් ඇමෙරිකන් ඩොලර් වලින් මට ගෙදරට ඇවිත් දෙන්න කතා කළා.

නාවින්න ඇමැතිවරයාගේ සම්බන්ධීකරණ ලේකම් සහ යෝෂිත රාජපක්ෂගේ ලේකම්වරයකු කියන පුද්ගලයා මට කතා කළා. ඔවුන් මට කතා කළ හඬපට මම ඉදිරිපත් කළා.

එස්බී දිසානායකගේ සම්බන්ධීකරණ ලේකම්වරයකු වන නවීන් කියන පුද්ගලයා මට කතා කළා. 

කෝටි 50ක මුදලකුත් අරගෙන මහාචාර්යවරයෙකුත් එක්ක මගේ නිවසට එන බව තව කෙනෙක් කිව්වා.

මේ රටේ උගත් කියලා සම්මත අය තමයි මහාචාර්යවරු. ඒ මහාචාර්යවරයෙක් තමයි මන්ත්‍රීවරයන් මිලදී ගැනීමේ කටයුතු කළේ. 

මන්ත්‍රීවරයන් අලෙවි කරන තත්ත්වය පත් කළේ ජනාධිපතිවරයා ගත් අමනෝඥ ක්‍රියාකාරිත්වය නිසා. මේ තොරතුරු මා සතුව තිබෙනවා. අවශ්‍ය නම් මේ සභාවේ ක්‍රියාත්මක කර පෙන්වන්න පුලුවන්.

2005 දි ජනාධිපතිවරණය දිනුවේ එල්ටීටීයට ඡන්දය දීලා කියලා මේ පාර්ලිමේන්තුවේදී ශ්‍රීලති සූරියආරච්චි මහතා කිව්වා. ඔහුට වැඩිකල් ජීවත් වෙන්න ලැබුණේ නෑ. මගේ ජීවිතයටත් මොනාව වෙයිද දන්නේ නෑ.  

---

නියෝජ්‍ය කතානායකවරයා ඉවත් වී නියෝජ්‍ය කාරක සභා සභාපති මූලාසනයට පැමිණෙයි.

---

සුජීව සේනසිංහ මහතා 

තරුණ මන්ත්‍රීවරයෙකු වශයෙන් මේ ඇති වෙලා තියන තත්ත්වය සම්බන්ධයෙන් මට කණගාටුයි. 

අද පැහැදිලි වුණා බහුතරය තිබෙන්නේ කාටද කියලා. 120ට වැඩි පිරිසක් මහින්ද රාජපක්ෂට එරෙහිව තිබෙන බව අපි මුල ඉදන්ම කිව්වා.

ප්‍රජාතන්ත්‍රවාදය ලැබුණු දා සිට ඇතිවූ කළුම පැල්ලම ඇති වුණේ එදා පාර්ලිමේන්තුවේ.

මේ රටේ ප්‍රජාතන්ත්‍රවාදය මුල්ලකට දාලා ප්‍රචණ්ඩත්වය පාර්ලිමේන්තුවේ ඇති කරන්න මහින්ද ප්‍රමුඛ කණ්ඩායමට හැකි වුණා.

---

ආර් සම්පන්දන් මහතා 

ජවිපේ නායකතුමා හොඳ කතාවක් කළා. දැනට රටේ ඇති තත්ත්වයට පසුබිම් වූ කරුණු එහි සඳහන් වුණා. අගමැතිවරයා කියන කෙනා මේ සභාවේ විශ්වාසය දිනාගෙන තිබෙනවද කියන එක සරල දෙයක්. ඔහුට විශ්වාසය නැතිනම් ඔහු මේ රටේ අගමැති නෙමෙයි.

සියලුම ප්‍රජාතන්ත්‍රවාදී රටවල සම්ප්‍රදාය එයයි. ඔක්තෝබර් 26 වැනි දා පාර්ලිමේන්තු මන්ත්‍රීවරයකු අගමැති කර තිබුණත් ඔහු මේ සභාවේ විශ්වාසය දිනාගෙන නෑ. 

අපිට මෙහිදී අල්ලස් දීම, තර්ජනය කිරීම මන්ත්‍රීවරුන්ගේ විශ්වාසය දිනා ගන්න සෘජු ක්‍රමයක් ලෙස සළකන්න බෑ.
ඔක්තෝබර් 26න් පස්සේ රටේ සිදු වෙන දේ අපි දන්නවා.

නොවැම්බර් 16 වැනි දා මේ රට අවමානයට පත්වුණා. පාර්ලිමේන්තුව අවමානයට පත්වුණා සමහර මන්ත්‍රීවරුන්ගේ ක්‍රියාකාරිත්වය නිසා. කතානායකට එතුමාගේ ආසනයේ අසුන් ගන්න අවස්ථාව ලැබුණේ නෑ. පාර්ලිමේන්තු මන්ත්‍රීට පහර දුන්නා. මේ මන්ත්‍රීවරුන්මයි එසේ කළේ. මේ සියල්ල කළේ මේ සභාව බලය නිහඬ කිරීමටයි.

රටේ ආණ්ඩුක්‍රම ව්‍යවස්ථාවට ගරු කළ යුතුයි. රටේ ආණ්ඩුක්‍රම ව්‍යවස්ථාව උල්ලංඝණය කළ නොහැකියි. 

අපි මන්ත්‍රීවරුන් ලෙස බැඳී සිටිනවා ආණ්ඩුක්‍රම ව්‍යවස්ථාවට අනුකූල වීමට. මේ පාර්ලිමේන්තුවේ විශ්වාසය නැති පුද්ගලයකුට අගමැති ලෙස කටයුතු කරන්න ඉඩ දෙන්න බෑ.

---

සභාව දිවා ආහාරය නැතිව සවස 6 දක්වා කර ගෙන යෑමට අනුමැතිය ලැබේ.

---

මංගල සමරවීර මහතා 

සිරිසේන රාජපක්ෂ කුමන්ත්‍රණය හේතුකොට ගෙන අද රට අරාජික වෙලා. එක පුද්ගලයකුගේ හීනමානය නිසා මිලියන 22ක ජනතාවගේ අනාගතය අවිනිශ්චිතතාවකට පත් වෙලා තිබෙනවා. අපේ මුළු ආර්ථිකයම පසුගිය සති තුනේ භයානක අර්බුදයකට තල්ලු වෙලා.

අද ඩොලරය එකසිය අසූ ගණනකට වැඩි වෙලා. අපි ඩොලයර 173 ස්ථාවර කරගෙන ඉන්දි බන්දුල ගුණවර්ධනලා කිව්වා අපිට දුන්නා නම් අඩු කරනවා කියලා. දැන් කියනවා 200ට ගියත් කරන්න දෙයක් නෑ කියලා. මේ වන විට මේ රටේ නීත්‍යනුකූල රජයක් නෑ. නීත්‍යනුකූල මුදල් ඇමැතිවරයෙක් නෑ. 

ව්‍යවස්ථාවේ 148 වලන්තියේ තියෙනවා මූල්‍ය පරිපාලනය තියෙන්නේ පාර්ලිමේන්තුවට කියලා. 

මම මුදල් ඇමැතිවරයා විදියට දෙසැම්බර් 31 වෙනකම් මුදල් වෙන්කර වරෙන්තුව අත්සන් කර තිබුණත් 31න් පස්සේ මුදල් වෙන් කරන්න පුලුවන් වෙන්නේ නීත්‍යනුකූල අයවැයක් හෝ අතුරු සම්මත ගිණූමක් තිබ්බොත් විතරයි.

හොර කැබිනට් එකෙන් අතුරු සම්මත ගිණුමක් පාස් කර ගත්තත් පාර්ලිමේන්තුවේ එය පාස් කර ගන්න බෑ.

ජනාධිපතිවරයාට මුදල් වෙන් කරන්න පුලුවන් වෙන්නේ අතුරු සම්මත ගිනුමක් හෝ අයවැයක් නැතිව ඡන්දයකට ගිහින් ඒ ඡන්දෙන් පස්සේ මාස තුනක් වෙනකම් විතරයි. 

නීත්‍යනුකූල රජයක් තිබ්බා නම් අතුරු සම්මත ගිණුමක්වත් ඉදිරිපත් කරන්න තිබ්බා. තවමත් අපි ප්‍රමාද නෑ.මම විශේෂයෙන් ජනාධිපතිට කියනවා මේ රටේ ජනතාවගෙන් පළිගන්න එපා කියලා. එතුමාට ඔළුවේ තියෙන මදිපුංචිකං නිසා රටක් පාවා දෙන්න එපා. 

එතුමාට දැනුත් පුලුවන් පාර්ලිමේන්තුවේ බහුතරය තියෙන අගමැතිවරයා සහ නීත්‍යනුකූල ඇමැති මණ්ඩලයක් පත් කරන්න.
අපි අයවැය හදාගෙන තියෙන්නේ. එය අපට ඉතා ඉක්මණින් ඉදිරිපත් කරන්න.

අතුරු සම්මත ගිණුම හෝ අයවැය දෙසැම්බර් 31ට කලින් සම්මත කර නොගත්තොත් ලොකු ප්‍රශ්නයක් වෙනවා. ජනවාරි 10 විදේශ ණය ගෙවන්න තිබෙනවා. පසුගිය වසර තුනේදි අපි ණය ගෙවීම විනාඩියකින්වත් කල් දැම්මේ නෑ. 
නීත්‍යනුකූල මුදල් ඇමැතිවරයෙක් නැතිව 10ට ගෙවන්න තියෙන ණය ගෙවන්න බෑ.

භාරකාර අරමුදලින් මුදල් නිකුත් වෙන්නත් නීත්‍යනුකූල මුදල් ඇමැතිවරයකුගේ අත්සන යටතේ විතරයි. මම ජනාධිපතිවරයාගෙන් යළිත් ඉල්ලන්නේ නීත්‍යනුකූල රජය පත් කරන්නට කටයුතු කරන්න කියලයි.

---

මරික්කාර් මන්ත්‍රීවරයා - රජයේ නාලිකාවල සජීවීව පෙන්වනවා ඒකාබද්ධයේ මාධ්‍ය හමුව. ඒ නිලධාරීන් වරප්‍රසාද හමුවට කැදවන්න.

නියෝජ්‍ය කතානායක -  ඒ ගැන එතුමාගේ අවධානයට යොමු කරන්නම්

---

කතානායකවරයා පිටවී නියෝජ්‍ය කතානායකවරයා මූලාසනයට පැමිණෙයි.

---

පාර්ලිමේන්තුව කල් තැබීමේ යෝජනාව විජිත හේරත් මහතා ඉදිරිපත් කරයි. එය ස්ථිර කරමින් අනුර කුමාර දිසානායක මහතා කතා කරයි.

මෙම අස්ථාවර බව ඕපපාතිකව නිර්මාණය වුණේ නෑ. මෙම අස්ථාවර බව දේශපාලන කුමන්ත්‍රණයක ප්‍රතිඵලයක්. ඔක්තෝබර් 26 වැනි දා පැහැදිලිවම දේශපාලන කුමන්ත්‍රණයක් ක්‍රියාත්මක වුණා.  

එක මැතිවරණයක සිට තවත් මහ මැතිවරණයක් වෙනකම් කාලයේ දී අලුත් ආණ්ඩුවක් අවශ්‍ය නම් පාර්ලිමේන්තුවට අවස්ථාව තිබෙනවා බහුතර කැමැත්ත අනුව ආණ්ඩුවක් තෝරාගන්න.

ආණ්ඩු පෙරළීම සඳහා පිළිගත හැකි ක්‍රම තුනක් තිබෙනවා. 26 වැනි දා සිදුවූයේ එවැනි දෙයක් නොවෙයි. 

මේසෙක දෙපැත්තක හිටගෙන මෛත්‍රීපාල සිරිසේන මහතා කියනවා උඹ අගමැති මම ජනපති කියලා.මෙය දේශපාලන කුමන්ත්‍රණයක්

ලෝකයේ මෙවැනි රටක මෙවැනි ආණ්ඩු පෙරලීම් වුණා නම් එය ලේ වැගිරීම් වලිනුයි නවතින්නේ. අපේ රටේ ජනතාවට ස්තුතිවන්ත වෙනවා

අපි මේ කුමන්ත්‍රණය පිළිගන්නවා නම් නැවත කුමන්ත්‍රණයක් සිදු විය හැකියි.මේ කුමන්ත්‍රණය පරාජයට පත් කළ යුතුයි කියන ස්ථාවරයේ ජනතා විමුක්ති පෙරමුණේ අපි හිටියා. 

බලයෙන් බලය හරහා බහුතරය නිර්මාණය කර ගන්න කටයුතු කළා. තමන්ට තිබෙන මනාප ගණන සහ පාර්ලිමේන්තුවේ සිටි කාලය අනුව ගණන තීරණය කර වෙන්දේසි වුණා. පනින් විතරක් නෙමෙයි, නවතින්නත් සල්ලි ගත්තා. 

අපේ රටේ අශිෂ්ඨත්වයට පත් දේශපාලන ක්‍රමය වෙනස් කරන්න දිගුකාලීනව ජනතා විමුක්ති පෙරමුණ සූදානම්.

බලහත්කාරයෙන් බලය හදාගෙන, බිය ගන්වමින් මේ අශුද්ධ ක්‍රියාවලිය පන් ගත්තා. එය ජයගන්න ජනපතිට හැකියාව තිබුණේ නෑ. පාර්ලිමේන්තුව කල් තියලා වෙන්දේසිය පටන් ගත්තා. ඒත් බැරිවුණු තැන පාර්ලිමේන්තුව විසිරෙව්වා.

පාර්ලිමේන්තුව තෝරා ගත්තේ එක ජනවරමකින්. ජනපති තේරෙුණේ තවත් ජනවරමකින්. එක ජනවරමක් විසින් තවත් ජනවරමක් යටත් නොකළ යුතුයි.

අපේ ව්‍යවස්ථාව යටතේ එක් ජනවරමක් ඉවත් කරන්න ජනපතිට හැකියාව තිබුණා. ජේආර් ජයවර්ධන කළ වැඩේ අපි දන්නවා. ඒ ඒකාධිපතිත්වය ඉවර වුණේ උතුරෙත් දකුණෙත් ජීවිත විශාල ගණනක් අවසන් වෙලා. උතුරේ ජනතාවටත් ජනතා විමුක්ති පෙරමුණටත් විශාල වගකීමක් තිබෙනවා. ප්‍රජාතන්ත්‍ර විරෝධී සටනට විරුද්ධව නැගී සිටින්න.

2015 ජනවාරි අට වැනි දා ජනවරම ලැබුණා විධායක ජනාධිපතික්‍රමය ඉවත් කරන්න. 19 සංශෝධනයේ හරය තමයි ජනපතිගේ බලයෙන් පාර්ලිමේන්තුව යටපත් නොකළ යුතුයි කියන එක. ජනපති පාර්ලිමේන්තුව විසිරෙව්වේ ව්‍යවස්ථාව උල්ලංඝණය කරමිනුයි.

ජනාධිපතිට තමන්ගේ ඔළුවේ ඇතිවන මනස්ගාතවලට රටක් පාලය කරන්න බෑ. ජනාධිපතිට රට පාලනය කළ හැකි සීමා ව්‍යවස්ථාවේ සඳහන් වෙනවා ජනාධිපතිවරයා අවස්ථා ගණනාවකදී ව්‍යවස්ථාව කඩලා තිබෙනවා.

මේ ව්‍යවස්ථා විරෝධී ක්‍රියාවට එරෙහිව අපි අධිකරණයට ගියා. සියවස් දෙකකට වැඩි ඉතිහාසයක් අපේ අධිකරණ පද්ධතියට තිබෙනවා. 

විධායකයේ බලයෙන් පාර්ලිමේන්තුව නිහඬ කර තිබෙනවා. විධායකයත්, ව්‍යවස්ථාදායකයත් අධිකරණයත් එකට ගැටගැහුණු නඩුවක් මෙය.

ගැසට්ටුව තාවකාලිකව අත්හිටුවමින් ඓතිහාසික තීන්දුවක් ලබා දුන්නා. ඉන්පසු අපි කිව්වා කුමන්ත්‍රණයේ දෙවැනි පියවර පාර්ලිමේන්තුවේදී පරාජය කරන බව අපි කිව්වා.

14 වැනි දා දිනය ඉතාමත් තීරණාත්මක දිනයක් වීමට තිබුණා. අශිෂ්ඨ, ජනවරමට විරෝධී කුමන්ත්‍රණයට විරුද්ධව ශිෂ්ඨත්වය බලාපෙරෛාත්තු වෙන්න එපා කියලා අපි ජනාධිපතිට කියනවා.

පාර්ලිමේන්තුවට පැවරී ඇති වගකීම ගැන අපි හොඳ ඇගයීමට ඉන්නවා. පාර්ලිමේන්තුවෙන් සියල්ල විසඳා ගතයුතු කියන තැන අපි නෑ.  අපි උත්සාහ කරමින් සිටිනවා පාර්ලිමේන්තුවේ සම්ප්‍රදායන් සහ ස්ථාවර නියෝග රැකගන්න.

අපි ඔබේ හෝ කාර්ය මණ්ඩලය බාධා කළේ නෑ.

අපි ස්ථාව නියෝග සකස් කරද්දි දවසක විවාදයක් තිබ්බා. අද පාර්ලිමේන්තුව නියෝජනය කරන හැම දෙනාම අනුමත කළා. ඒ ස්ථාවර නියෝගයි දැන් තිබෙන්නේ. ඒ නිසා කුමන්ත්‍රණය පරාජය අද රටේ පාර්ලිමේන්තුව ප්‍රශ්න කරන්න ජනාධිපති පෙළඹිලා තිබෙනවා. 

ස්ථාවර නියෝගවල 135 වගන්තියේ පැහැදිලිව තිබෙනවා ස්ථාවර නියෝග අත්හිටුවන්න පුලුවන් කියලා. පාර්ලිමේන්තුවේ යේාජනාවක් ගන්න පුලුවන් වෙන විදියට ස්ථාවර නියෝග කිහිපයක් අත්හිටුවන යෝජනාවක් සුමන්තිරන් මන්ත්‍රීවරයා ගෙනාවා.

ස්ථාවර නියෝග අත්හිටුවීමේ යෝජනාව හරියට සම්මත වුණා. ඊට කවුරුත් විරෝධය දැක්වුවේ නෑ. ඉන්පසු විශ්වාස භංගය මම යේාජනා කළා. විජිත හේරත් මහතා ස්ථිර කළා. විශ්වාස භංගය තමයි පාර්ලිමේන්තුවේ විවාද කළ යුත්තේ කියා අපි පිළිගන්නවා. ස්ථාවර නියෝග අනුව අපි යෝජනාව ඉදිරිපත් කළා. ඊට විවාදයක් අවශ්‍යයි. අපි කැමැත්තෙන් හිටියා විශ්වාස භංග යේාජනාව විවාදයට ගන්න. මා ඉදිරිපිටස තමයි මහින්ද රාජපක්ෂ මහතා වාඩි වෙලා හිටියා. මඩ කාලාන්තරයක සිට අවශ්‍යතාවක් තිබ්බා ඔගේ ක්‍රියාකාරකම් ගැන ඔහුගේ ඉදිරිපිටම කතා කරන්න.

ජනවාරි මාසේ 8 ප්‍රතිඵලය එජාප ශඛ්‍යතාවයෙන් පමණක් ගත්තු එකක් නෙමෙයි. ලක්ෂ 62ක ඡන්ද ප්‍රමාණයක් ලැබුණේ එජාපෙ උවමනාවම නෙමෙයි. එදා ජනවාරි අට වැනි දා 62 ලක්ෂයක ජනවරමේ අපේක්ෂාවක් තිබ්බා. ජනවරමෙන් දින 50ක් යද්දි බැඳුම්කර මංකොල්ලය සිදු කළා. ඉන් පස්සේ විනාශකාරී ආර්ථික ප්‍රතිපත්තියකට ගියා.විශ්ව විද්‍යාල වෛද්‍ය පීඨ මාස 18ක් වහලා තිබ්බා.

රාජිත සේනාරත්නගේ පෞද්ගලික උවමනා මත තමයි සයිටම් ප්‍රශ්නය ඇදිලා ගියේ සිංගප්පූරු ගිවිසුම අත්සන් කරද්දි සාකච්ඡා කර නැවත කැබිනට් මණ්ඩලයට ඉදිරිපත් කළේ නෑ. හිටපු අගමැතිගේ හෝ මලික් සමරවික්‍රමගේ පෞද්ගලික දේපොළ නෙමෙයි මේ. පෞද්ගලික දේවොළ නම් හඳපානේ කළත් කමක් නෑ. හම්බන්තොට ගිවිසුම අත්සන් කළේ තක්කඩි විදියටයි.

හම්බන්තොට වරායට මිලක් නියම කරලා විකුණනවා. ඒ බදු සහන ගෙදරන් දෙන ඒවා නෙමෙයි. විශ්වාස භංග යේාජනාවට විධිමත් විවාදයක් දෙනවා නම් රනිල්ගේ ආණ්ඩුව ගැනත් ඔහුටත් ඇහෙන්න ලොකු වුවමනාවක් තිබ්බා එදාටත් සිහිබුද්ධියෙන් අහයි කියලා අපි හිතුවා. හැබැයි අපිට විවාදය කර ගන්න  බැරි වුණා.

කතානායකතුමා අවස්ථා තුනකදී කියනවා නමින් ඡන්දය ගන්න.

14, 15, 16 කතානායකතුමා ගත් තීන්දුව ගැන අපි පැසසුමට ලක් කරනවා. මොකක්ද මෛත්‍රීපාල සිරිසේන මහතාට තියෙන අයිතිය විශ්වාස භංගය හරියට වුණාද නැද්ද කියලා කියන්න තියෙන අයිතිය?
පාර්ලිමේන්තුවේ තීරණය ගන්නේ කතානායකතුමා. ඔබතුමා 15 වැනි දා පාර්ලිමේන්තුවට ප්‍රකාශ කළා විශ්වාස භංගය සම්මත වූ නිසා ආණ්ඩුවක් නොමැති බව.

ජනාධිපතිට පොලොන්නරුවේ කුඹුරක් වගා කරන්න පුළුවන් හිතුනු විදියට. නමුත් ජනාධිපතිකම කරන්න බෑ හිතුනු විදියට. ජනාධිපතිතුමා ව්‍යවස්ථාවට යටත්.

ව්‍යවස්ථාවේ පැහැදිලිව තිබෙනවා ආණ්ඩුව විසිරුවන්න පුලුවන් ක්‍රමය.ඊයෙත් කැබිනට් මණ්ඩලය රැස්වෙනවා.
ව්‍යවස්ථාවේ තිබෙනවා විශ්වාස භංගයක් සම්මත වූ වහාම අමාත්‍ය මණ්ඩලය විසිරෙනවා කියා.

ඉන් පසු අග්‍රාමාත්‍ය වරයා සහ ඇමැතිවරුන් පත් කළ යුතුයි. ජනාධිපතිට පැවරී තිබෙන්නේ නව ආණ්ඩුවක් පිහිටුවීමයි.

එතුමාට ඕන නම් රාජපක්ෂ මහත්තයා එක්ක හුරතල් වෙන්න ආයෙත් අගමැති විදියට දිවුරුම් දෙන්න පුලුවන්. 
දින 10ක් තිස්සේ දැන් ආණ්ඩුවක් නෑ. 

මේ අරාජිකත්වය ඇති කළේ ජනාධිපතිවරයා.ජනාධිපතිවරයා තමන්ගේ කාර්ය භාරය දැන් ඉටු කරන්නේ නෑ. මේ කැබිනට් මණ්ඩලය විසින් ගනු ලබන කිසිම තීන්දුවක් ක්‍රියාත්මක කරන්න එපා කියලා අපි රාජ්‍ය සේවකයන්ගෙන් ඉල්ලා සිටිනවා.
මේ රටේ ව්‍යවස්ථාව රකින්න හැම රාජ්‍ය සේවකයකුම බැඳලා ඉන්නවා.

ව්‍යවස්ථාව ආරක්ෂා කරන්නන්ගේ ආරක්ෂාවටයි පොලිසිය සහ හමුදා තිබෙන්නේ.මේ රටේ ආරක්ෂක හමුදාවන්ටත් විශාල කාර්යභාරයක් තිබෙනවා ව්‍යවස්ථාව කඩන ලද කණ්ඩායමක් ආරක්ෂා නොකරන්න.

ජනාධිපතිවරයා එක එක්කෙනාට ගෙන්වන ලණු ජනතා විමුක්ති පෙරමුණට ගිල්වන්න බෑ කියලා මම කියනවා.ව්‍යවස්ථාව උල්ලංඝණය කළ ජනාධිපතිවරයාට එරෙහිව ගන්න පුලුවන් ක්‍රියාමාර්ගත් ව්‍යවස්ථාවේ තිබෙනවා. ඒ ක්‍රියාමාර්ගවලින් ගන්න පුලුවන් කවර යෝජනාව ද කියා අපි හිතලා බලනවා.

ගමේ ඉන්න ළමයකුටවත් ලේන්නු අඹ කාලා ඉතුරු වෙච්ච කෙටේ දෙන්නේ නෑ. එහෙම තියෙද්දි මේ ගත්තේ අගමැති කොටේ. අගමැති කොටේ ගන්න ඇයි පෙළඹුණේ? පාර්ලිමේන්තුවට ප්‍රධාන කාර්ය දෙකක් තිබෙනවා.එකක් නීති හදන එක. අනිත් එක මූල්‍ය පරිපාලනය. මේ කාර්යයන් දෙකම මහින්ද රාාපක්ෂගේ කණ්ඩායමට   කරගන්න බෑ.

අාණ්ඩුවට බහුතරයක් නෑ. අබ්බගාත ආණ්ඩුවක් බාර ගත්තේ ඇයි? මේ පාර්ලිමේන්තුව ඔවුන්ට තවත් මර්දනකාරී දේශපාලනයේ එක මධ්‍යස්ථානයක් විතරයි. මුදල් පරිපාලනයක්, නීති සම්පාදනයක් ඔවුන්ට පාර්ලිමේන්තුවේ කර ගන්න බෑ. එහෙම තියෙද්දි ආන්ඩුවක් හදාගත්තේ ඇයි?

අධිකරණවල නඩු ක්‍රියාත්මක වෙනවා. ගෝඨාභය රාජපක්ෂට නඩුවක් තිබෙනවා. ගෝඨාභයට එරෙහිව ඇවන්ගාඩ් නඩුව තිබෙනවා. මහජන මුදලින් මැදමුලනේ සොහොනක් හැදීම ගැන නඩුවක් තිබෙනවා. ගාමිණී සෙනරත්ලා ගෙවල්වල හංගං හිටපු විදිය අපි පස්සේ කියන්නම්. ගෝඨාභයට එරෙහි ඊළඟ නඩුවට දින නියම කරලා තියෙනවා

බැසිල්ට නඩු දෙකයි. විමල් වීරවංශට හා බිරියට නඩු දෙකයි. රෝහිතට, මහින්දානන්දට නඩුවක්. පෙබරවාරි මාසයට කලින් මේ නඩු ඔක්කොම තිබෙනවා. මේ ආණ්ඩුව හැදුවේ අධිකරණයේ තිබෙන නඩු නිසා.  මේ සතියේ විමල් වීරවංශයට තිබ්බ නඩුව ලබන වසරේ මැයි වලට කල් ගියා. මහින්ද රාජපක්ෂ මහතා දැනගෙන හෝ නොදැනගෙන පය තිබ්බේ නඩුවල චූදිතයන් බේරා ගන්නයි. 

ශිරන්ති රාජපක්ෂ අත්අඩංගුවට ගන්නේ නෑ කියලා කැබිනට් මණ්ඩලය තීරණයක් අරගෙන තිබ්බා. ඇයට එෆ්සීඅයිඩියෙන් කටඋත්තර ගන්න එන්න කිව්වාම හිටපු කතානායකගේ නිල නිවසට ගෙන්වාගෙන කටඋත්තර ගත්තේ. 

තිබුණු ජාතික ආණ්ඩුවට ජාතික න්‍යාය පත්‍රයක් තිබුණේ නෑ. බලපොරයක නිරත වුණා. මේ නොපැහෙන විවාහය සිද්ධ වෙන්නේ මෛත්‍රීපාල සිරිසේනගේ නැවත සිහසුනේ හිඳගැනීමේ වුවමනාව හා මහින්ද මහත්තයාගේ නඩු වසා ගැනීමේ උවමනාව.

ජනාධිපතිවරයාම කිව්වා ජනවාරි අට වැනි දා පොල්වත්තක හැංගිලා හිටියේ කියලා. කාට බයේද? බස්සන්ට බයේද? ඒ මහින්ද රාජපක්ෂ මහත්තයාට බයේ. මහින්ද බලයට පත් වුණොත් අඩි හයක් පොළොවේ යටට යනවා කිව්වා. එහෙම කිව්ව මේ දෙන්නා එකතු වීමේ සූත්‍රය කුමක්ද?

මෛත්‍රීගේ නමට, හැසිරීමට අපි අගෞරව කරලා නෑ. නමුත් රාජපක්ෂ කඳවුර උපයෝගී කරගත්තේ හිටං, හුටං, පඹයා වැඩි අවාදයි. ඒ කදවුරත් එක්ක මෛත්‍රීපාල සිරිසේන යළි විවාහ වෙන සූත්‍රය කුමක්ද?

මහින්ද රාජපක්ෂ අගමැති වීම නිසා අමන්දානන්දයට පත් වුණා අයගෙන් මම අහන්නේ. ඡන්දෙන් පස්සේ ඊට පහුවදා බහුතරය ගත්ත අයට මෛත්‍රීපාල සිරිසේන මහත්තයා කැමති නෑ කියලා වෙනත් පාර්ශ්වයක් පත් කළොත් මේ විදියටම මොකද කියන්නේ?

ඡන්දවලින් ආණ්ඩු පිළිගන්නේ නැතිනම් මැතිවරණ තියන්නේ ඇයි? පාර්මේන්තුව විසිරුවා හැරීමේ තීරණය ගත්තොත් හිතුණු හිතුණු විදියට පාර්ලිමේන්තුව විසිරුවයි. 

මේ මූලධර්ම උල්ලංඝණය කරලා තිබෙනවා. ඒක රාජපක්ෂ මහතා සතුටට පත් කරලා තිබුණත් මේ කඩුව ඔහුටත් එල්ල වෙයි කියලා කියන්න පුලුවන්ද?

මේ කුමන්ත්‍රණය නැවත සිදු නොවීමට ඉඩ නොදිය යුතුයි. 

එජාපය ජනතාවගෙන් ඈත් වෙලා හිටිය නිසා කුමන්ත්‍රණය හරියට පරාජය කරන්න ඔවුන්ට බෑ. ඔවුන් එක්ක ජනතාව හිටියා නම් අද මොවුන් ඉන්නේ පාර්ලිමේන්තුවේ නෙමෙයි, ජනාධිපතිගේ ගෙදර වටේ.

මේ පාර්ලිමේන්තුවට දැන් සුජාත භාවයක් නෑ. 2015 තෝරා ගත් පිළිබිඹුව දැන් නෑ. මේ පාර්ලිමේන්තුවේ කවුරු 113 ගත්තත් ඉදිරියට ආණ්ඩු කරන්න යුක්ති සහගත නෑ. සල්ලිවල කට්ටිය අරගෙන ආණ්ඩු කරන්න බෑ. කුමන්ත්‍රණය පරාජය පත් කිරීමෙන් පසුව අනිවාර්යෙන් පාර්ලිමේන්තු මැතිවරණයට යා යුතුයි. අපිට ලැබෙන පංගුව නෙමෙයි වැදගත්, ජනතාවගේ ජනවරම විකෘති වෙලා ඉදිරියට යන්න බෑ.

මේ කුමන්ත්‍රණය පරාජය පත් කර පාර්ලිමේන්තුව විසිරුවීමේ යේාජනාවක් ජනතා විමුක්ති පෙරමුණෙන් ඉදිරිපත් කරනවා. 

---

පාර්ලිමේන්තුවෙන් ආණ්ඩුවක් නැතැයි තීරණයක් දී තිබිය දී ජනමාධ්‍ය ආණ්ඩු පක්ෂය යැයි භාවිතා කිරීම වැරදි බව මන්ත්‍රීවරයෙක් පැවසීය.

---

තවත් වරක් නමින් ඡන්දයක් පවත්වන්නැයි ලක්ෂ්මන් කිරිඇල්ල මහතා ඉල්ලීමක් කළේය.

---

පාර්ලිමේන්තුවේ තේරීම් කාරක සභාවට සාමාජිකයන් පත් කිරීම ගැන අවසන් එකඟතාවකට නොපැමිණීම නිසා පැවැති ඡන්දයට පක්ෂව ඡන්ද 121ක් ලැබුණු බව කතානායකවරයා තීරණය කළේය.

---

ඡන්ද ගණන් කිරීමේ කටයුතු සහ නැවත පරීක්ෂා කිරීමේ කටයුතු සිදු වෙයි.

---

තේරීම් කාරක සභාව සඳහා සාමාජිකයන් පත් කිරීමේ යෝජනාව ගැන ඡන්ද විමසීම අවසන්

---

ඉලෙක්ට්‍රෝනික් ක්‍රමය වැඩ කරන්නේ නැති මන්ත්‍රීවරුන් ළඟට නිලධාරීහු ගොස් සහාය දෙති. ඉලෙට්‍රෝනික ක්‍රමයට බැරි වූ මන්ත්‍රී හු වාචිකව ඡන්දය දෙති.

---

ඉලෙට්‍රෝනික් ක්‍රමයට ඡන්දය විමසයි.

---

කතානායකට විරෝධය දක්වා මහින්ද රාජපක්ෂ මහතාගේ පාර්ශ්වයේ මන්ත්‍රීවරු සභා ගැබෙන් පිටව යති.

---

මහින්ද රාජපක්ෂ මහතාගේ පාර්ශ්වයේ මන්ත්‍රීවරු සභා ගැබෙන් පිටව යයි.

---

කතානායක - ඡන්දය ගන්නේ ඉලෙට්‍රෝනික් ක්‍රමයට 

---

 නමින් ඡන්දය විමසීමන බෙදුම් සීනුව නාද කරන්නැයි කතානායක දැනුම් දෙයි

---

සභාවේ ඝෝෂා

---

ලක්ෂ්මන් කිරිඇල්ල - කතානායකතුමනි නමින් ඡන්දයක් ගන්න

---

අජිත් පී පෙර්රා - පාර්ලිමේන්තුව පාලනය විය යත්තේ ස්ථාව නියෝග අනුවයි . නම් ලැයිස්තුවේ ආණ්ඩුව විපක්ෂය කියලා නෑ. මෙය ස්ථාවර නියෝගවලට එකඟයි.

---

සභාවේ ඝෝෂා

---

අපි මේ පාර්ලිමේන්තුව අත හැර යන බව විමල් වීරවංශ කියයි. 

---

විමල් වීරවංශ කතානායකට මූලාසනාරූඩ මන්ත්‍රී ලෙස ආමන්ත්‍රණය කරයි.

---

කතානායකගේ තීරණයට එකඟ නොවන බවත් දිනේෂ් ගුණවර්ධන මහතා  කියයි.

---

විමල් වීරවංශ - පාර්ලිමේන්තුවේ විශ්වාස භංග යේාජනාවක් සම්මත වෙලා නෑ. විශ්වාස භංගයක් හඬින් සම්මත කරන්න බෑ. 

---

කතානායකවරයා ව්‍යවස්ථා විරෝධීව හැසිරෙන බව කියනවා නම් ඔහුට එරෙහිව විශ්වාසභංගයක් ගෙනෙන එල චෝදනා කරන පිරිසට කියනවා.

---

අනුර කුමාර දිසානායක - හඳපානේ ජනාධිපති ඇවිත් අගමැති ගෙනත් ආණ්ඩු හදන ඒවා තමයි කැලෑ නීති. මේ තේරීම් කාරක සභාව ගැන ප්‍රශ්නයක් තිබේ නම් පාර්ලිමේන්තුවේ තමයි තීරණය ගත යුත්තේ.  ඒ සඳහා නමින් ඡන්දයක් ඕනෑ.

---

බන්දුල ගුණවර්ධන - අපේ රජය පාර්ලිමේන්තුවේ පිළිගන්න. 

---

තේරීම් කාරක සභාවට තමාගේ පක්ෂයටත් අවස්ථාවක් අවශ්‍ය බව ඩග්ලස් දේවානන්ද කියයි.

---

ලක්ෂ්මන් කිරිඇල්ල -  පාර්ලිමේන්තුවේ අගමැතිවරයකු නැතැයි ඔබ ප්‍රකාශයක් කර තිබෙනවා. ආණ්ඩුව කියන අයට මම කියනවා පාර්ලිමේන්තුවේ බහුතරය පෙන්වන්න කියලා. ඔවුන් තවම බහුතරය පෙන්වලා නෑ. බහුතරය පෙන්නුවොත් අපි බලතල දෙනවා.

---

පාර්ලිමේන්තුවේ  ඝෝෂා

---

කතානායකවරයා ව්‍යවස්ථා විරෝධී කතානායකවරයකු යැයි කියමින් දිනේෂ් ගුණවර්ධන මහතා කතානායකට චෝදනා කරයි.

---

තම කණ්ඩායම ආණ්ඩු පක්ෂය නියෝජනය කරන බැවින් තේරීම් කාරක සභාවේ බහුතරය ලබා දෙන ලෙස දිනේෂ් ගුණවර්ධන මහතා පාර්ලිමේන්තුවේදී ප්‍රකාශ කරයි.

---

තේරීම් කාරක සභාවේ නම් කතානායක ඉදිරිපත් කරයි

දිනේෂ් ගුණවර්ධන

එස් බී දිසානායක

නිමල් සිරිපාල  

මහින්ද සමරසිංහ

විමල් වීරවංශ

ලක්ෂ්මන් කිරිඇල්ල

මනෝ ගනේෂන්

රිෂාඩ් බදුර්දීන්

පාඨලී චම්පික රණවක

මාවෙයි සේනාධිරාජා

විජිත හේරත්

---

කතානායක  කරුජයසුරිය මහතාගේ ප්‍රදානත්වයෙන් අද  පාර්ලිමේන්තුව අරැඹිණි.

---

සෙංකෝලය රැගෙන ඒමෙන් පසු පාර්ලිමේන්තුවේ වැඩ කටයුතු ඇරැඹේ.