(ක.ග. කරුණාරත්න)

කොවිඞ් 19 දෙවෙනි රැල්ල ආරම්භ වන අවස්ථාවේ ජාතික රුධිර පාරවිලයන ඒකකය  සතුව රුධිර සංචිත 13,000ක් පමණ පැවැති  බවත් මේ වන විට එම සංචිත ප්‍රමාණය 5,500ක් පමණ දක්වා අඩුවී ඇතැයි ජාතික රුධිර පාරවිලයන ඒකකයේ අධ්‍යක්‍ෂ,වෛද්‍ය ලක්‍ෂමන් එදිරිසිංහ මහතා අද (6) පොලොන්නරුවේදී පැවැසීය.

රුධිර සංචිත එසේ අවප්‍රමාණ වුවද කිසි ලෙසකින්වත් රෝගීන්ගේ රුධිර අවශ්‍යතාවය නවතා හෝ සපයාදීමේ බැරිකමක් ඇතිවී නැතැයිද ඒ මහතා කීය.

ජාතික රුධිර පාරවිලයන ඒකකයේ අධ්‍යක්‍ෂවරයා මේ බව කියා සිටියේ පොලොන්නරුව සුදු අරලිය හෝටලයේ පැවැති ජංගම රුධිර කඳවුරු වැඩ සටහනක සමාරම්භක අවස්ථාවට එක් වෙමිනි.

සුදු අරලිය සමූහ ව්‍යාපාරයේ සභාපති ඩඞ්ලි සිරිසේන මහතාගේ උපදෙස් පරිදි “ඩඞ්ලි සිරිසේන සමාජ සත්කාරක පදනම” මගින් මෙය සංවිධානය කර තිබුණි.

එහිදී තවදුරටත් අදහස් දැක්වූ වෛද්‍ය ලක්‍ෂමන් එදිරිසිංහ මහතා මෙසේද කීය.

“බස්නාහිර පලාතේ දැනට ක්‍රියාත්මක නිරෝධායන ඇඳිරි නීතිය නිසා ජංගම රුධිර කඳවුරු සංවිධානය කිරීම ගැටළුවක්ව තිබෙනවා. ඒ වගේම සෞඛ්‍ය රෙගුලාසි වලට අනුව මහජනයා ඒකරාශී කිරීම සීමා කරන්න සිද්ධ වෙලා තිබෙන නිසා අපි ඒ කටයුතු එම නීති රීති වලට අනුවයි කටයුතු කරනු ලබන්නේ. ඒ නිසා අපි ප්‍රධාන වශයෙන්ම තීරණය කලා ජාතික රුධිර පාරවිලයන ඒකකය හැටියට රටේ කොවිඩ් අවදානම අඩු ප්‍රදේශවලදී සෞඛ්‍ය අමාත්‍යංශයත්,වසංගත රෝග විධ්‍යාඥ ඒකකයත් නිකුත් කර තිබෙන එම සෞඛ්‍ය උපදෙස් වලට අනුගතව ඉතාමත් සීමිත කණ්ඩායම් සමඟ රුධිර කඳවුරු සංවිධානය කරලා එමගින් ජනතාවගේ අවශ්‍යතාවය සම්පූර් ණ කිරීම සඳහා රුධිරය ඒකරාශී කරන්න. අද ඉඳලා ඉදිරි සතියක කාලයක් පුරා අපි පොලොන්නරුව දිස්ත්‍රික්කයේ විශේෂයෙන්ම ආගමික ස්ථාන,බෞද්ධ පූජනීය ස්ථාන ආශ්‍රිත කරගෙන රුධිර කඳවුරු මාලාවක් සංවිධානය කරනු ලබනවා. එහිදී සෞඛ්‍ය ආරක්‍ෂිත පිළිවෙත් අනුගමනය කරමින්,කණ්ඩායම් සීමාසහිත ලෙස ගෙන්වා ගනිමින්,සමාජ දුරස්ථභාවය පවත්වා ගනිමින් විශේෂයෙන් කොවිඞ් ආශ්‍රිතයින් සහ රෝග ලක්‍ෂණ සහිතපුද්ගලයන් මඟ හරිමින්   මේවෙනකොට අපේ රුධිර සංචිත මට්ටම පහත වැටීමක් තිබෙනවා. නමුත් කිසි ලෙසකින් වත් රෝගීන් ගේ අවශ්‍යතාවය සඳහා වන රුධිරය අපි නවත්වලා නෑ.

උතුරු,උතුරු මැද සහ නැගෙනහිර යන දෙපළාතේ ප්‍රධාන සංඝ නායක පොලාන්නරුව පුරාණ ඉසිපතනාරාමාධිපති උඩගම ධම්මානන්ද නාහිමිපාණන් වහන්සේ විසින් පිරිසපංච ශීලයෙහි පිහිටුවනු ලැබූ අතර පැපිලියාන සුනේත්‍රාදේවී මහ පිරිවෙනේ පරිවෙන් අධ්‍යක්‍ෂ පූජ්‍ය මැදගොඩ අභයතිස්ස හිමිපාණන් වහනසේ මෙහිදී අනුශාසනයක් සිදු කළහ.