‘‘රියැලිටි වැඩසටහනකට වඩා මෙය කලාකරුවන් එකතු වී කරන වැඩක් කියලා ‘‘දෙරණ’ මුලින්ම මට කිව්වාම, ඒ වෙලාවෙම මගේ හිතට ආපු දේ තමයි, වෙනසක් කරන්න ඕනෑ කියන දේ. අපේ රටේ රියැලිටි කිව්වාම බොහෝ වෙලාවට සිද්ධ වුණේ සිංදුවකට නටන එකයි. ඉතින් ඊට වඩා එහා ගිය දෙයක් මේ ස්ටාර් සිටි වෙතින් කළ හැකි බව මම තරයේ විශ්වාස කළා.’’

‘මේ විදියට කියන්නේ රංගනයෙන් නිරන්තරයෙන් අපූරු ප‍්‍රතිභාවයක් පෙන්නුම් කරන දුලීකා මාරපන ප‍්‍රවීණ රංගන ශිල්පිණියයි. කලාකරුවන්ගෙන් සමන්විත කණ්ඩායම් ලෙස සහභාගී වූ ‘‘ස්ටාර් සිටි’’ වැඩසටහන් මාලාවේ අවසාන ‘‘කිරුළ’’ දිනාගනු ලැබුවේ දුලීකා මාරපන ප‍්‍රමුඛ අනූෂා දමයන්ති, දිනක්‍ෂි ප‍්‍රියසාද්, රවීන් කණිෂ්ක, තීක්‍ෂණ අනුරාධ යන කණ්ඩායම විසිනි. රියැලිටිකරනයට එහා ගිය වින්දනයක් ගෙන දුන් අවසන් නිමේෂය දක්වා තම කණ්ඩායම කටයුතු කළ ආකාරය ගැන ‘‘දුලීකා’’ සඳැල්ලට කී කතාවයි මේ.

මොකක්ද ඔබ අර කිව්ව වෙනසක් කරන්න ඕනෑ කියලා හිතපු දේ?

මේ යෝජනාව දෙරණින් මට ලැබුණාම වෙනසක් කරන්න මට පුළුවන් යන හැඟීම පළමුව ඇතිවුණා. මොකද මේකට දායකවන්නෙ විවිධ ක්ෂේත‍්‍රවලට අයත් කලාකරුවෝ නිසා. දෙවැනියට මම හිතපු වෙනස තමයි, පටන් ගැන්මේ සිට අවසානය දක්වා පේ‍්‍රක්‍ෂකයන්ට නිර්මාණාත්මක දෙයක් තේමාවක් යටතේ දීමට හැකි බව. ඒ අනුව තමයි අපේ කණ්ඩායම කටයුතු කළේ. අපේ දේත් එක්ක ලංකාවේ මේ රියැලිටි කියන විටෙක ඒකාකාරිව ගලා යන වැඩසටහන්වලට ඒ වෙනස දිය හැකි බව මට තේරුණා. ඒ අනුව මුලින්ම අපේ කණ්ඩායම එක්ක මම අදහස් බෙදා ගත්තා. අපි එකිනෙකාට වෙනස් රිද්මය එක්ක අපේ කණ්ඩාමේ අනන්‍යතාවයක් ඇතිවෙන දෙයක් කරමු කියලා අපි කතා කර ගත්තා.

ඒ කියන්නෙ, කිරුළ දක්වා සැළසුම් සහගතව ආ ගමනක්?

සහතිකයෙන්ම ඔව්.

ඔබගේ කණ්ඩායමේ අනෙක් සගයින් ඔබගෙ හැඟීම් තේරුම් ගත්තද? ඔබගෙ අදහස්වලට මූලිකත්වය දුන්නාද?

මේ වැඬේ කරන්න ආරාධනා ලැබෙන විටම මම දෙරණත් එක්ක කතා කළේ ඒ අදහස් ගැනයි. කොහොම වුණත්, වේදිකාව හොඳින් පරිශීලනය කරපු මට එය ලොකු අභියෝගයක් වුණේ නැහැ. මම මගේ කණ්ඩායමේ අයගෙ ඔවුනට ආවේණික වූ රිද්මයක් ගැන මුලින් සොයා බැලූවා. අනූෂා එයාගෙ අනන්‍යතාවය බොහෝ දුරට හදාගෙන ඉන්නෙ නර්තනයට දක්‍ෂ චරිතයක් ලෙසයි. එහිදීත් එයා ඉන්දියානු සම්ප‍්‍රදායේ නර්තනයට වඩා දක්‍ෂයි. එතකොට දිනක්‍ෂි අපූරු සුන්දර තරුණියක්. ඇය රංගනයටxගැයුමට වගේම නර්තනයටත් හැකියාව දක්වනවා. රවීන් කණිෂ්ක ඞී‍්‍රම්ස්ටාර් තරුවක්. තීක්‍ෂණ සුපර් ස්ටාර් තරුවක්. ඒ අනුව මෙයාලගෙ ඒ රිද්මයන්ට එහා ගිය හැකියාවන් වෙතින් එයාලව ඉදිරියට ගේන්න පුළුවන් බව මට හැඟුණා. හැබැයි මුලදී අපි අනූෂාගෙ ඉන්දියානු රිද්මයට අනුව නර්තනය කරන්න ඉඩ දුන්නා. රවීන්ගෙ ගායනයට එහා ගිය නර්තනයක් ගන්න පුළුවන් වුණා. ඔහුගෙ නර්තන හැකියාව රටම දැක්කා. ඊළඟට තීක්‍ෂණ තමා සතුව රඟපෑමේ අපූරු හැකියාවක් ඇති බව පෙන්නුම් කළා. දිනක්‍ෂි තවත් අපූරු මිශ‍්‍රණයක් කළා. ඊළඟට එයාගෙ රිද්මය විවිධාකාර දේ කළා. මේ අපූරු සංකලනය තමයි, දිගටම ඉදිරියට ගියේ.

මේ ජයග‍්‍රහණය ලැබුණාම ඔබට ඇතිවූ හැඟීම මොන වගේද?

ඉන්දියානු දීර්ඝ ටෙලිමාලා සහ ඔහේ කරන්නන්වාලේ දිගහැරෙන සිංහල නාට්‍යය සහ එකාකාරීව ගලායන රියැලිටි අතරේ තවමත් අපේ රටේ අපේ දෙයක් කිරීමට ඉඩක් ඇති බව තේරුම් ගත්තා. අන්න ඒ අනුව තමයි අපේකමට සහ අපේ සංස්කෘතිකාංග මෙන්ම අංගචලනවලට ගැලපෙන දෙයක් කළේ. මින් පසුව අපේ රටේ රියැලිටිකරණ වැඩසටහන්වල දී මේ දේ කරන්න බොහෝ දෙනා උත්සාහ ගනීවි. ඔන්න අපි ඒකට පුංචි පාරක් හදලා දුන්නා.

‘‘සුපර් ගැංග්ස්ටර්ස්’’ කණ්ඩායමේ සිටියදී මතකයේ රැඳී රසමුසු දේ සිහිපත් කළොත්?

මම හින්දා අනෙක් අයට වෙච්ච අමතක නොවන දේ තමයි ඇත්තෙ. අපට මුල සිටම අපේ ජනකවියට අනුව යමක් කරන්න, පැරණි චිත‍්‍රපට ගීතවලට අනුව යමක් කරන්න, ඒ වගේ පෙළ ගැස්මක් තිබුණා. අපට සැලැස්මක් තිබුණා. ඒවා ගැන කතා කරන අවස්ථා රසමුසු වුණා. අවසානයේදී අපි අම්මාxතාත්තා තේමා කරගත්තෙ ඇයි දන්නවද?

ඔබම ඒ ගැන කිව්වොත්?

මේක ධර්මද්වීපයක්. නමුත් මහලූ නිවාස අනන්තයි, අප‍්‍රමාණයි. අම්මාxතාත්තා අපි වෙනුවෙන් කළ දේ අප‍්‍රමාණයි. අපට උගන්වන්න කොච්චර කැප වෙනවද? ඒ කැපවීම මත ඉගෙන ගෙන මිනිස්සු අම්මාxතාත්තා මහලූ නිවාසවලට දාලා, ලෝකය අල්ලන්න යනවා. ඒක එහෙම වෙන්න ඕනෑ නැහැ. අන්න ඒ පණිවුඩය අපි චුට්ටක් රටට මතක් කරලා දුන්නා. මේ ජයග‍්‍රහණය ලබන්න නර්තන අංග පුහුණුව සඳහා අපට රසික, ගයාන්, ජෙරොම් ඞී. සිල්වා, සංඛ ලොකු අත්වැලක් වුණා. නර්තන ආචාර්ය සහ සරසවි ආචාර්ය රසික කොතලාවල සහ ඔහුගේ බිරිඳ නිෂා කොතලාවලත්, ඇඳුම් නිර්මාණයෙන් අමිල සහ වෙස් ගැන්වීමෙන් උදයංග ලබාදුන් දායකත්වය සිහිපත් කළ යුතුමයි.

මේ හැර මේ ස්ටාර් සිටි සම්බන්ධව සිටි කාලයේදී ඔබ මුහුණ දුන් වෙනත් දේ මොනවද?

පසුගිය මාස අටක කාලයේදී මේ නිසා මගේ ස්වාමි පුරුෂයා මෙන්ම අම්මාට මගෙන් විය යුතු, ඉටුවිය යුතු යුතුකම් කළ නොහැකි වුණා. කෙටියෙන්ම කිව්වොත් ඇහැක් ඇරලා බලන්න බැරි වුණා. එයාලා ඒ ගැන නොසිතා මාව සැහැල්ලූවෙන් තැබුවා. අනූෂා, දිනක්‍ෂි, තීක්‍ෂණ, රවීන්, උන් ඔක්කොම හරිම සුන්දරව මාව තේරුම් ගත්තා.

සඳුන් ගමගේ