(සුජිත් හේවාජුලිගේ)

සෞඛ්‍ය අමාත්‍යාංශයේ  වෛද්‍ය සැපයුම් ඒකකය යැවූ  කෝටි ගණනක වටිනා  ඖෂධ තොගයක් මාස දෙකකට අධික කාලයක් තිස්සේ සෙල්සියස් අංශක 45ක අධික උෂ්ණත්වය තුළ දුම්රිය වැගන් වල  ඉවත් නොකර රඳවා තැබීම හේතුවෙන්  ඒවායේ ගුණාත්මක භාවය අඩුවීමේ දැඩි අවදානමකට ලක්ව පැවතුණ බව ජාතික විගණන කාර්යාලය නිකුත් කළ වාර්තාවක සඳහන් වේ.

රෝහල්වලට බෙදා හැරීම සඳහා කොළඹ කොටුව දුම්රිය ස්ථානයේ සිට අනුරාධපුර දුම්රිය ස්ථානයට පසුගිය වසරේ මුල් මාස හයක  කාලයේදී යවනු ලැබූ ඖෂධ තොග  වගකිවයුතු සෞඛ්‍ය  ආයතන කලට වෙලාවට  ඉවත් කර නොගැනීම නිසා  මේ තත්වය මතුවූ බව එම වාර්තාවේ දැක්වේ.

මෙම ඖෂධ ඉවත් කර නොගැනීම නිසා දුම්රිය දෙපාර්තමේන්තුවට ගෙවිය යුතු ප්‍රමාද ගාස්තුවල  එකතු වටිනාකම රුපියල් ලක්ෂ පණහකට ආසන්නය.

මේ සම්බන්ධයෙන් සෞඛ්‍ය අමාත්‍යාංශය විගණනයට පවසා ඇත්තේ දුම්රිය ගැල්මගින් වෛද්‍ය සැපයීම්  තොග බෙදාහැරීම වඩා ප්‍රායෝගික නොවන බව පෙනී ගියද රජයට වඩාත් වාසිදායක හා පහසුම ක්‍රමය මෙය බවයි.

වෛද්‍ය සැපයීම්   ප්‍රවාහනයට  ලොරි රථ ප්‍රමාණවත් නොමැති වීමත් ලැබෙන තොග ගබඩා කිරීමට ඉඩ ප්‍රමාණවත් නොමැති වීමත් හේතුවෙන් ඖෂධ තොග දුම්රිය ගැල් මගින් ආයතන වෙත යොමු කරන බවද  සෞඛ්‍ය ප්‍රධානීන්  වැඩිදුරටත්  පවසා ඇත.