(සුජිත් හේවාජුලිගේ )

ශ්‍රී ලංකාවේ නිසි පරිදි ප්‍රමාණවත් ආහාර නොලැබෙන පිරිස( ආහාර අනාරක්ෂිත පිරිස) පසුගිය වසරේ සැප්තැම්බර් මාසය වන විට සියයට 24කින් පමණ ඉහළ ගොස් ඇතැයි එක්සත් ජාතීන්ගේ සංවිධානයේ ලෝක ආහාර වැඩසටහන කළ 2022 - 23 අධ්‍යනයේදී  තොරතුරු හෙළිවී ඇතැයි පේරාදෙණිය විශ්ව විද්‍යාලයේ ආර්ථික විද්‍යා හා සංඛ්‍යාන අධ්‍යනාංශයේ  මහාචාර්ය වසන්ත අතුකෝරල  මහතා ඉරිදා ලංකාදීපයට පැවසීය

එම ප්‍රතිශතය ඒ  වර්ෂයේ මාර්තු මාසය වන විට පැවතියේ සියයට දාහතක් වශයෙනි.

මේ අනුව පසුගිය 2023 මාර්තු වන විට  තිස්හත් ලක්ෂ හතළිස් හය දහස්  දෙසිය අනූවක් මධ්‍යස්ථ ආහාර අනාරක්ෂිත තත්ත්වයේ සිටි අතර 2023 සැප්තැම්බර් වනවිට පනස් දෙලක්ෂ අසූඅටදහස්  අටසිය  අසූ අටක් දක්වා  පහළොස් ලක්ෂ  හතළිස් දෙදහස්  පන්සිය අනූවකින් එය  ඉහළ ගොස් ඇති බව පෙනීයයි.

වතු අංශයේ  ආහාර අනාරක්ෂිතතාවය සියයට 42 සිට  සියයට පනස් දෙක දක්වා අනූ තුන්දහස්  පන්සිය  අනූ තුනකින් ඉහළ ගොස් ඇත. ග්‍රාමීය  අංශයේ ආහාර අනාරක්ෂිතතාව සියයට දාහතේ සිට 25 දක්වා  දහතුන් ලක්ෂ අසූවට දහස් හත්සිය හතළිස් හතකින්  ඉහළ ගොස් ඇත.

ආහාර අනාරක්ෂිතතාව වැඩි වශයෙන් ඉහළ ගොස් ඇත්තේ කාන්තාවන් ගෘහ මූලිකයන් ලෙස සිටින පවුල් වල බවද එම අධ්‍යයනයේදී  හෙළි වී ඇත. මේ අනුව සියයට 23 සිට 32 දක්වා ඉහළ යෑමක් පෙන්නුම් කරයි.

පිරිමින් ගෘහ මූලිකයන් සිටින පවුල්වල ආහාර අනාරක්ෂිතතාව සියයට 16 සිට  සියයට 22 දක්වා ඉහළ ගොස් ඇත.

සමෘද්ධි ලාභී පවුල්වල ආහාර අනාරක්ෂිතතාව සියයට 43  සිට 57 දක්වා ඉහළ ගොස් ඇතැයි තොරතුරු අනාවරණය වී ඇත