(අංජුල මහික වීරරත්න)

තරුණ කෘෂි ව්‍යවසායකත්ව ගම්මාන වැඩ සටහනට මාස දෙකක් ඇතුලත රුපියල් මිලියන 2200ක් වැය කරන බව කෘෂිකර්ම අමාත්‍යවරයා මහින්ද අමරවීර මහතා පැවසීය.

කෘෂිකර්ම අමාත්‍යාංශය විසින් දිවයිනේ ගම්මාන 11ක් තරුණ කෘෂි ව්‍යවසායකත්ව ගම්මාන ලෙස සංවර්ධනය කිරීමේ වැඩ පිළිවෙළ යටතේ සෙවනගල නුගේගලයාය ගම්මානය තරුණ කෘෂි ව්‍යවසායකත්ව ගම්මානයක් ලෙස සංවර්ධනය කිරීම අද (18) අරඹමින් අමාත්‍යවරයා මෙි බව කීය.

ගොවිජන සංවර්ධන දෙපාර්තමේන්තුව, කෘෂිකාර්මික හා ගොවිජන රක්ෂණ මණ්ඩලය, හදබිම අධිකාරිය, හා කෘෂිකර්ම අමාත්‍යාංශය යටතේ ඇති විදේශ අරමුදල්වලින් ක්‍රියාත්මක වන ව්‍යාපෘති විවිධ ජනතා ප්‍රතිලාභී වැඩ සටහන් සඳහා මේ මුදල් වැය කර ඇතැයි කෘෂිකර්ම අමාත්‍යවරයා සඳහන් කළේය.

කෘෂිකර්මාන්තයේ සිටින ගොවි ජනතාවගෙන් සියයට 80කටත් වඩා වයස අවුරුදු 50 ඉක්මවු අය බවත් තරුණ ප්‍රජාව සිටිනුයේ සියයට 20ක් පමණ ප්‍රමාණයක් බවත් අමාත්‍යවරයා කීය. කෘෂිකර්මාන්තය යනු දියුණු විය හැකි වෘත්තියක් යැයි වර්තමානයේ තරුණයින්ට විශ්වාසයක් නැතැයි කීය අමාත්‍යවරයා ඒ නිසා ඔවුන් කෘෂිකර්මාන්තය වෙනුවට රජයේ රැකියා සොයා යන ප්‍රවණතාවයක් තිබෙන බව සඳහන් කළේය.