ප්‍රවීණ රංගධරයෙකු මෙන්ම අති දක්ෂ තිරනාටක රචකයකු ලෙස ප්‍රකට ගිරිරාජ් කෞෂල්‍ය අධ්‍යක්ෂණය කළ චිත්‍රපට ද්විත්වය සිකුරු හතේ සහ සුහද කොකා අතිසාර්ථක ලෙස තිරගතවූ අතර එම චිත්‍රපටවල ප්‍රධාන චරිතය නිරෑපණය කළේ පසුගියදා අප අතරින් සඳහටම සමුගත් විජය නන්දසිරි ප්‍රවීණ රංගන ශිල්පියාය.

විජය නන්දසිරි කලාකරුවාණන්ගේ වියෝවට තුන් මසක් ගතවීමේ නිමිත්ත හේතුකොට ගෙන හදසර ගිරිරාජ් කෞෂල්‍ය පිළිසඳරකට කැඳවා ගත්තේ ඔහුගේ අතිජාත මිත්‍ර විජය නන්දසිරි පිළිබඳ මතකය ආවර්ජනය කිරීම සඳහාය.

ඔබට විජය නන්දසිරි නම් වූ පතිභාපූර්ණ රංගන ශිල්පියා මුලින්ම හමවූ දවස මතකද?

ඔව්, ඒක රිද්මානුකූල මතකයක්. මගේ උපන්ගම කොලොන්නාව. ඉතිං ඒ පළාතෙ හිටිය අපේ ඥාති පිරිසක් එකතු වෙලා ‘කොලොන්නාව සොඳුරු මියැසිය’ පුංචි සංගීත කණ්ඩායමක් ආරම්භ කළා. අවුරුදු 12ක් විතර මම ඒ සංගීත කණ්ඩායමේ වාදකයෙක් හැටියට සම්බන්ධවෙලා හිටියා. ඒ කණ්ඩායම පටන් ගත්තෙ සුනිල් චන්ද්‍ර වික්‍රමසිංහගේ මූලකත්වයෙන්. ඒ කාලේ ලේක් හවුස් ආයතනය මගින් පවත්වපු තරගයකට අපේ සංගීත කණ්ඩායමක් සහභාගි වුණා. ඒ තරගය විනිශ්චය කරන්න ඇවිත් හිටියෙ විජය නන්දසිරි අයියා. එදා තමයි මුල් වතාවට මම විජය අයියව සජීවීව දැක්කෙ.

ඊට පස්සේ විජය අයියාව අපි චිත්‍රපටවල විවිධ දුෂ්ඨ, වීර හා අහිංසක චරිත හරහා දැක්කා. විශේෂයෙන් මනමේ වේදිකා නාට්‍යයේ විජය අයියාගෙ රංගනය මගේ හිත ගත්තා. මට ගෞරවයෙන් මතක් කරන්නම ඕන දෙයක් තියෙනවා. මනමේ කුමාරයාගේ චරිතය රඟපාන්න වේදිකාවට නගින්න ඉස්සර විජය අයියා හොඳින් යටිපතුල් හෝදනවා. මම දවසක් ඇහුවා ඒ ඇයි කියලා. මම වේදිකාවේදි මනමේ කුමාරයාට රඟපාද්දි කුණු ගෑවිච්ච යටිපතුල් ප්‍රේක්ෂකයන්ට පෙනු‍ණොත් එයාලට හිතෙනවා මේ මනමේ කුමාරයා නෙවෙයි කියලා. එතකොට ඒක මනමේ කුමාරයාගේ චරිතයටත් කරන අසාධාරණයක්. නළුවෙක් විදියට අපි රකින්න ඕන ගෞරවයක් තියෙනවා. ඒකයි මම හැමදාම හොඳින් යටිපතුල් හෝඳගෙන වේදිකාවට නගින්නේ. ඒ තමා විජය අයියා දුන්න උත්තරය.

ඔබට රංගන ක්ෂේත්‍රයට එන්න විජය උදව් කළාද?

මම මුලින්ම මේ ක්ෂේත්‍රයට සම්බන්ධ වුණේ රංගන ශිල්පියෙක් හැටියට නෙවෙයි. මම දෙවෙනි සහාය අධ්‍යක්ෂකවරයෙක් හැටියට. නෝනාවරුනි මහත්වරුනි ටෙලි නාට්‍යයෙන් තමයි කලා ලොවට මම මුල්වරට සම්බන්ධ වුණේ. එතනින් පස්සෙ තමයි මම විජය අයියට හා රොඩ්නිට දැඩි ලෙස සමීප වුණේ. එතනින් පස්සෙ මම හාස්‍යයෝත්පාදක නිර්මාණවලට සම්බන්ධ වුණේ. මේ ක්ෂේත්‍රය තුළ මම යම් නමක් හදාගෙන තියෙනවානම් ඒ රොඩ්නි හා විජය නන්දසිරි අයියා නිසා බව අනිවාර්යයෙන්ම කිව යුතු වෙනවා.

නෝනාවරුනි මහත්වරුනි තුළ ඔබේ කාර්යභාරය වුණේ මොකක්ද?

ඒක ඉන්දියාවේ ටෙලි නාට්‍යයක පිටපතක් ආශ්‍රයෙන් ප්‍රවීණ නළු ටෝනි රණසිංහගේ අනුවර්තනයක් ලෙසයි එළි දැක්වුණේ. මම ඒකට සන්දු කෑලි, විකට කෑලි එකතු කළා. මම විජය අයියාට එවැනි යෝජනා කළාම එයා ඒවා අගයලා සතුටින් පිළිගත්තා. මට නිතරම කිව්වා හාස්‍ය පැත්තෙන් හොඳ අනාගතයක් තියෙනවා කියලා. එදා මගේ යෝජනා ඔහු ප්‍රතික්ෂේප කළා නම් අද ගිරිරාජ් කෙනෙක් මතු වෙන්නෙ නැහැ. පසුකාලීනව අපි ගොඩක් සමීප වුණා. පසුව අපි හොඳ පවුල් හිතවතුන් වුණා.

ඔබේ නිර්මාණවල විජය නන්දසිරි සුවිශේෂි චරිත නිරෑපණය කළා නේද?

ඔව්, එතුමා, කතුර, සිකුරු හතේ, සුහද කොකා වැනි නිර්මාණවල ඔහුගේ දායකත්වය අතිවිශිෂ්ඨයි. මේ ක්ෂේත්‍රයේ ඔහු පතාක යෝධයෙක්වෙලා ඉන්දැද්දී මම පුංචි කූඹියෙක්. ඒත් මට ඔහු දැක්වූ ගරුත්වය හා ඔහුගේ නිහතමානීබව පුදුමාකාරයි.

අධ්‍යක්ෂවරයෙක් හැටියට ඔබ විජය නන්දසිරි කියන රංගන ශිල්පියා දැක්කෙ කොයි ආකාරයටද?

මගේ කලා ජීවිතයේ මා එදා මෙදා තුර දැක්ක නම්‍යශීලීම නළුවා තමයි විජය අයියා.

ජීවිතේ දුක් සැප බෙදාගත්තු හොඳ යාළුවෝ දෙන්නෙක් ඔබ දෙපළ?

අනිවාර්යයෙන්ම ජීවිතේ විවිධ දුෂ්කරතා, විවිධ ගැටලු ආවත් අපි ඒ දුක සැප බෙදාගත්තා.

ඒත් ඔහුගේ අවසාන මොහොතේ ඔබට ඔහු ළඟ ඉන්න බැරිවුණා?

ඒක ඉතාම අවාසනාවන්ත මොහොතක්. විජය අයියගේ මරණය ගැන ඒ කනගාටුදායක පුවත අපට ආරංචි වෙනකොට අපි හිටියෙ කටුනායක ගුවන්තොටුපොළේ මාසයක සංචාරයක් සඳහා යන ගමන්. ඒ ගමනට මාත් එක්ක රොඩ්නි හා ප්‍රියන්ත සෙනෙවිරත්නත් හිටියා. අපට ආපසු හැරෙන්න බැරි වුණා. ඒක මතක් වෙද්දී ඇති වෙන්නෙ දරාගන්න බැරි දුකක්.

විජය හා ඔබ අතර සිදුවූ අමතක නොවන සිදුවීමක් ඔබට මතක් කරන්න පුළුවන්ද?

හරි අපූරු සිදුවීමක් වුණා අපි දවසක් මීගමුවෙ &කුස පබාවතී* වේදිකාගත කරපු දවසක. ඒක ඉරිදා දවසක්. හරියට එදා රූ අපේ &එතුමා* රසවත් කොටසක් රෑපවාහිනියේ විකාශය වෙනවා. මට වගේම විජ අයියටත් ඒ කොටස බලාගන්න ලොකු වුවමනාවක් තිබුණා. නාට්‍ය ඉවර වෙච්ච ගමන් අපි ළඟ පාත ‘එතුමා’ බලන ගෙයක් හොයාගෙන ගියා. ඒ ළඟම ගේක ඇහුණා ‘එතුමා’ එකේ තේමා ගීතය යනවා. මායි විජය අයියයි ඒ නාඳුනන ගෙදරට ගිහින් ‘එතුමා’ බලන්න අවසර ඉල්ලුවා. අපි දෙන්නව හඳුනාගෙන ඒ ගෙදර කට්ටිය පුදුමයටත් සතුටටත් පත්වුණා. ඒ පවුලේ සමහර අය කාමරවලට ගිහින් හොඳ ඇඳුම් ඇඳගෙන සාලෙට ආවා. අන්තිමේදි මායි විජය අයියයි ‘එතුමා’ බලනවා. ඒ ගෙදර කට්ටිය හැමෝම අපි දෙන්නා දිහා බලන් ඉන්නවා.

ඔබ විජය තුළ දැක්ක හොඳම ගුණාංගය මොකක්ද?

ඔහු හොඳ යාළුවෙක් වගේම උතුම් මනුෂ්‍යයෙක්. හොඳ පියෙක්, ආදර්ශමත් ස්වාමිපුරුෂයෙක්. මම දන්න විදිහට ඔහුගේ බිරිය දේවිකා මිහිරාණිගේ පවුලේ අය දේවිකාට වැඩිය ආදරය කළේ විජය අයියට. මගේ දුවගෙ මංගල්ලෙදි හරියට පියෙක් වගේ ඉදිරියට ඇවිල්ලා අවශ්‍ය සියලු දෙයක්ම හොයලා බලලා කළේ විජය අයියා.

ඔහුගේ පවුල වෙනුවෙන්, බිරිය, දරුවෝ වෙනුවෙන් විජය අයියා මහන්සි වුණා. දවසක් අපි රෑපගත කිරීම්වල යෙදිලා ඉන්න අතරතුර මම දැක්කා විජය අයියා එයාගෙ ජංගම දුරකථනයෙන් Viber තාක්ෂණය ඔස්සේ ඕස්ට්‍රේලියාවල ඉන්න එයාගෙ මිණිබිරිය හුරතල් කරනවා. නළුවෙක් හැටියට ඔහු කිසිම වෙලාවක නෑ බෑ කිව්වෙ නැහැ. ඕනෑම අභියෝගයක් භාර ගන්න ඔහු පැකිළුණේ නැහැ. ඒ වගේ ජවයක් හා ශක්තියක් ඔහුට ලැබුණෙ කොහොමද කියලා හිතාගන්නවත් බැහැ. ඔහුට ඉවසීමේ හා දරාගැනීමේ පුදුම ශක්තියක් තිබුණා.

ඔහුගේ සැබෑ නොවුණ හීනයක් එහෙම තිබුණද?

ඔව්, විජය අයියාට ලොකු ආසාවක් තිබුණා චිත්‍රපටයක් අධ්‍යක්ෂණය කරන්න. මට හොඳ පිටපතක් ලියලා දෙන්න කිව්වා ඒ චිත්‍රපටය නිෂ්පාදනය කරලා අධ්‍යක්ෂණය කරන්න. ඒක ඔහු තුළ තිබුණ අදහසක් විතරයි.

I රමේෂ් උවයිස්