(යොහාන් භාසුර)

විදුලි ආලෝක ධාරා භාවිතයෙන්, වලංගු බලපත්‍ර රහිතව සහ තහනම් දැල් භාවිතයෙන් ධීවර කටයුතු කරමින් සිටි පුද්ගලයින් 16 ක් සමඟ ඩිංගි යාත්‍රා 7 ක් සහ නීති විරෝධී ධීවර ආම්පන්න තොගයක් මුලතිව් සහ පුල්මුඩේ ප්‍රදේශයේදී භාරයට ගත් බව නාවික හමුදා පැවසීය.

මුලතිව් නයාරු සහ අලම්පිල් ප්‍රදේශයන්ට ඔබ්බෙන් වූ මුහුදු ප්‍රදේශයේ, පුල්මුඩේ කෝකිලායි ප්‍රදේශයට ඔබ්බෙන් වූ මුහුදු ප්‍රදේශයේ සහ කෝකිලායි කලපු ප්‍රදේශයේ අළුයම් කාලයේදී කළ විශේෂ මෙහෙයුමකින් මෙම පිරිස භාරයට ගත් බවත් නැගෙනහිර නාවික විධානයට අයත් ශ්‍රී ලංකා නාවික නෞකා ගෝඨාභය අයතනය මුලිතිව් නයාරු සහ අලම්පිල් ප්‍රදේශයන්ට ඔබ්බෙන් වූ මුහුදු ප්‍රදේශයන්හි ක්‍රියාත්මක කළ විශේෂ සෝදිසි මෙහෙයුමකදී භාරයට ගත් බවත් නාවික හමුදාව කියයි.

එම මුහුදු ප්‍රදේශයන්හී නීති විරෝධි ලෙස විදුලි ආලෝක ධාරා භාවිතයෙන් සහ තහනම් දැල් භාවිතයෙන් ධීවර කටයුතු සිදුකළ පුද්ගලයින් 10 ක් සමඟ ඩිංගි යාත්‍රා තුනක් සහ නීති විරෝධී ධීවර ආම්පන්න භාරයට ගත් බව ද   නාවික හමුදාව පැවසීය.

 නැගෙනහිර නාවික විධානයට අයත් ශ්‍රී ලංකා නාවික නෞකා රන්වැලි අයතනය පුල්මුඩේ කෝකිලායි ප්‍රදේශයට ඔබ්බෙන් වූ මුහුදු ප්‍රදේශයේ සහ කෝකිලායි කලපු ප්‍රදේශයේ කළ විශේෂ සෝදිසි මෙහෙයුමේදී එම ප්‍රදේශයන්හී නීති විරෝධි ලෙස විදුලි ආලෝක ධාරා භාවිතයෙන් සහ වලංගු ධීවර බලපත්‍ර රහිතව ධීවර කටයුතු සිදුකළ පුද්ගලයන් 6 ක් සමඟ ඩිංගි යාත්‍රා 4 ක් සහ නීති විරෝධී ධීවර ආම්පන්න භාරයට ගත් බව ද නාවික හමුදාව කීය.

මෙම මෙහෙයුම්වලදී භාරයට ගත් පුද්ගලයන් වයස අවුරුදු 22 ත් 44 ත් අතර වයසේ පසුවන පුත්තලම, කෝකිලායි, පදවි ශ්‍රී පුර, වැලිඔය සහ මදුරන්කුලිය යන ප්‍රදේශයන්හි පදිංචිකරුවන් බවට හදුනා ගත් බවත් එම පුද්ගලයින්, ඩිංගි යාත්‍රා සහ ධීවර ආම්පන්න ඉදිරි නීතීමය කටයුතු සඳහා මුලතිව් සහකාර ධීවර අධ්‍යක්ෂ කාර්යාලය වෙත සහ කුච්චවේලි ධීවර පරීක්ෂක කාර්යාලය වෙත භාරදුන් බව ද නාවික හමුදාව වැඩි දුරටත් සඳහන් කළේය.