විදුලි සැපයුම දීමේ දී ගෘහස්ථ පාරිභෝගිකයන්ගෙන් සහ කර්මාන්ත කරුවන්ගෙන් අයකර ගත් තැන්පතු මුදල් සඳහා මහ බැංකුවේ වාර්ෂික පොලී අනුපාතයට අනුව හිමි විය යුතු පොලිය ඔවුන්ට ගෙවන ලෙස ශ්‍රේෂ්ඨාධිකරණය ලංකා විදුලි මණ්ඩලයට අද නියෝග කළේය.

විදුලි පාරිභෝගික සංගමය ගොනු කර තිබූ මූලික අයිතිවාසිකම් පෙත්සමක් කැඳවූ අවස්ථාවේදී ඉදිරිපත් වු කරුණු සළකා බැලීමෙන් අනතුරුව ශ්‍රේෂ්ඨාධිකරණය එලෙස නියෝග කළේය.

ශ්‍රේෂ්ඨාධිකරණ විනිසුරුවරුන් වන එස්. තුරේරාජා සහ සෝභිත රාජාකරුණා යන මහත්වරුන්ගේ සැදුම්ලත් ශ්‍රේෂ්ඨාධිරණ විනිසුරු මඩුලලක් හමුවේ මෙම මුලික අයිතිවාසිකම් පෙත්සම සලකා බැලීණි.

පෙත්සම කැඳවූ අවස්ථාවේදී විදුලි පාරිභෝගිකයන්ගේ සංගමය වෙනුවෙන් පෙනී සිටි නීතීඥ ආචාර්ය රවින්ද්‍රනාත් දාබරේ මහතා කරුණු දක්වමින් අදාල තැන්පතු වෙනුවෙන් පොලී ගෙවන ආකාරය සඳහන් මෝෂමක් ලංකා විදුලි බල මණ්ඩලය විසින් අධිකරණය ඉදිරිපත් කර ඇති බවත් එම මෝෂමට අනුව පොලී ගෙවිමට විදුලි බල මණ්ඩලයට නියෝගයක් නිකුත් කරන්නැයි ඉල්ලා සිටියේය.

එම ඉල්ලීම පිළිගත් අධිකරණය මෝෂම අනුව කටයුතු කරන ලෙස විදුලි බල මණ්ඩලයට නියෝග කළේය.