පසුගිය මාසයේ තිරගත වීම ඇරඹි සුපිරි බොලිවුඩ් චිත්‍රපටයක් වන "ඩියර් සින්දගී" මේ වනවිට බොලිවුඩයට සමගාමීව ලොවපුරා රටවල් රැසක ප්‍රදර්ශනය වෙමින් පවතී. සුපිරි නළු ෂාරුක් ඛාන් සමග "කයිරා" නම් මෙහි ප්‍රධාන චරිතයට පණ පොවන සුරූපී ආලියා භාත් මේ වනවිට බොලිවුඩය තුළ විශාල ජනප්‍රියත්වයක් හිමි කරගෙන සිටින්නීය.

මේ වනවිට 23 වැනි වියේ පසුවන ඇය 1999 වර්ෂයේදී ක්ෂේත්‍රයට ප්‍රවිෂ්ට විය. ඒ ආක්ෂේ කුමාර් ප්‍රධාන රංගනයෙන් දායක වූ Sangharsh චිත්‍රපටය ඔස්සේය. නමුත් ඇයට එම චිත්‍රපටයේ ප්‍රධාන චරිතයක් සඳහා දායක වීමට වරම් හිමි නොවූ අතර, ඇය නැවතත් සිනමාවට එක්වූයේ 2012 වර්ෂයේදීය. ඒ කාගේත් කතාබහට ලක් වූ Student of the Year චිත්‍රපටය ඔස්සේය. ඇය එහි ප්‍රධාන චරිතය නිරූපණය කළ අතර, එම චිත්‍රපටයද ආදායම් වාර්තා අතරට පැමිණීමට සමත් විය. කෙසේ නමුත් මෙම කාරණාව හේතුවෙන් ඇය 2014 වර්ෂය වනවිට බොලිවුඩයේ ජනප්‍රියත්වට පත් රංගන ශිල්පිනියක වී තිබිණි. ඇයට 2014 වර්ෂයේදී චිත්‍රපට 06කට ප්‍රධාන චරිතයෙන් දායක වූ අතර, 2015 වර්ෂයේදී දායක වූයේ Shaandaar චිත්‍රපටය සඳහා පමණි.

Kapoor & Sons චිත්‍රපටය සමගින් මෙම වර්ෂය ආරම්භ කළ ඇය ඉන්පසු රඟපෑ Udta Punjab චිත්‍රපටය ආන්දෝලනාත්මක චිත්‍රපටයක් විය. එයට හේතුවූයේ ඒ චිත්‍රපටය සඳහා වාරණ පැණවීම සහ එය තිරගත වීමට පෙර අන්තර්ජාලය ඔස්සේ බාගත කිරීමේ හැකියාව ලැබීමයි. කෙසේ වුවද එම චිත්‍රපටයද ආදායම් වාර්තා තබන්නට සමත් විය. ඊට අමතරව ඇය මේ වසරේ මෙතෙක් දායක වී ඇත්තේ Ae Dil Hai Mushkil සහ මේ දිනවල තිරගත වෙමින් පවතින Dear Zindagi චිත්‍රපටවලට පමණි.

ඇය ලබන වසරේදී එක් චිත්‍රපටයක් සඳහා දායක වීමට නියමිත බවද සඳහන් වෙයි. ළබාල නිළියකව ජනප්‍රියත්වට පත් ඇය ශාරුක්ගේ පෙම්වතිය ලෙස රංගන වරම් හිමිවීම සිය ජීවිතයේ ලැබූ විශාලම ජයග්‍රහණය බවද සඳහන් කරයි.

ඩිලාන් ක්‍රිෂාන්ත