(යොහාන් භාසුර)

ක්‍රිකට් තරග මුදලට පවාදීමට යෝජනා කළ බවට චෝදනා එල්ල වී සිටින ශ්‍රී ලංකා ටෙස්ට් ක්‍රීඩක සචිත්‍ර සේනානායකගෙන් දෙවැනි ප්‍රකාශය ලබාගැනීමට නියමිත යැයි ක්‍රීඩා වැරදි වැලැක්වීමේ විශේෂ පොලිස් ඒකකයේ ප්‍රධානී ජ්‍යෙෂ්ඨ පොලිස් අධිකාරී ජගත් ෆොන්සේකා මහතා පවසයි.

සචිත්‍රගේ වත්කම් පිළිබඳ වාර්තාව එම පොලිස් ඒකකයට ලැබී ඇති බවත් ඒ සම්බන්ධයෙන් වැඩිදුර ප්‍රශ්න කිරීමට නියමිත බවත් ජගත් ෆොන්සේකා මහතා කියයි.

‘කොවිඩ්’ වයිරස් අවදානම හේතුවෙන් කිසිවකු කැඳවීමට නොහැකි බවත් සෞඛ්‍ය අවදානම පහව ගිය පසුව සචිත්‍ර නැවත කැඳවන බවත් ෆොන්සේකා මහතා සඳහන් කරයි.

සචිත්‍ර මෙම සිද්ධිය සම්බන්ධයෙන් පසුගිය මාර්තු මස 3 වැනිදා සුගතදාස ක්‍රීඩාංගණ සංකීර්ණයේ පිටිහි ක්‍රීඩා වැරදි වැලැක්වීමේ විශේෂ පොලිස් ඒකකයට පැමිණ ප්‍රකාශයක් ලබාදුන්නේය.

හම්බන්තොටදී පසුගිය වසරේ පැවැති ශ්‍රී ලංකා ප්‍රීීමියර් ලීග් (එල්.පී.එල්.) ක්‍රිකට් තරගාවලියට සහභාගි වෙමින් සිටි ශ්‍රී ලංකා යොවුන් ක්‍රීඩකයකුට තරග පාවාදීමට යෝජනා කළ බවට සචිත්‍රට චෝදනා එල්ල විය.