මම රාජ්‍ය සංගීත උලෙළේ නැගී එන ගායිකාවට නිර්දේශ වුණා පසුව අප්සරාවියේ ගීතය සුගත් සෝමවීරයන් මට ලබාදුන්නෙ. ඒ පද පෙළ දැක්කම ලොකු ආසාවක් ආවා සීගිරි අප්සරාවියන්ගේ පාපොච්චරාණය ගැන අපි නොහිතපු පැත්තක් ගැන කතා කරන නිසා මම මේ ගීතය තෝරගෙන සංගීත අධ්‍යක්ෂකවරයෙක් සොයද්දි නව පරපුරේ දක්ෂම සංගීත අධ්‍යක්ෂකවරයෙක් තමයි දර්ශන වික්‍රමතුංග. ඒත් මම විදේශගතව ඉන්න නිසා එම ගීතය ගායනා කරන්න ලැබුණෙ දෙසැම්බර් මාසෙ මුල් සතියේදීයි. එලෙස එළිදක්වපු ගීතයත් එක්ක අන්තර්ජාලයේ අපි බලාපොරොත්තු නොවූ ප්‍රතිචාරයක් අන්තර්ජාලයෙන් ලැබුණා. එය අනපේක්ෂිත ප්‍රතිචාරයක්. අදටත් අපේ රටේ අදවෙද්දි හොඳ ගීත ඇහෙන්නැති තත්ත්වයක් නෙ උදාවෙලා තිබෙන්නෙ. ඒ කියන්නෙ හොඳ ගීත බිහි නොවෙනවා නෙවෙයි. හොඳ ගීත රූපවාහිනී සහ ගුවන් විදුලි නාලිකාවල ප්‍රචාරය නොවීමයි. මේ ගීතයට ලැබුණු ප්‍රතිචාරය හිතාගන්න බැරි තරම්.

එයින් මටත් සුගත්ටත් දර්ශනටත් සතුටක් දැනුණා අපේ පරපුරේ යහපත් දෙයක වටිනාකම දන්න හොඳ රසිකයෝ පිරිසක් ඉන්නවා නේද කියල දැනෙන්න. මම මීට කලින් නිර්මාණ පහක් පමණ ගායනා කර තිබෙනවා. මම වේදිකා නාට්‍ය ශිල්පිනියක් විදියටයි කලා ක්ෂේත්‍රයට එන්නෙ. කුඩා කල සිට මම සංගීතය හැදෑරූ අයෙක් පාසල් අවධියේ ම මම විශාරද උපාධි සමත් වුණා. සමස්ත ලංකා මට්ටමේ ජයග්‍රහණ ගායනා තරගවලින් ලැබුවා. මම විශ්වවිද්‍යාලයට ඇතුළත් වීමත් එක්ක මම අනපේක්ෂිත ලෙස වේදිකා නාට්‍යවලට සම්බන්ධ වෙනවා. මහාචාර්ය එදිරිවීර සරච්චන්ද්‍රයන්ගේ සිංහබාහු නාට්‍යයේ සුප්පාදේවියගේ චරිතය රංගනයට 2000 වසරෙදි දායක වෙනවා. ඒ සමගම මගේ අධ්‍යාපන කටයුතු සහ නාට්‍ය එක්ක ගායිකාවක වීමේ හීනය දුරස් වුණා.

විශ්ව විද්‍යාල ජීවිතයේ අවසානයත් එක්ක මගෙ විවාහයත් සමග රටින් යන්න සිදුවෙනවා. මගේ ගායන පැත්තට යන්න තිබුණු මාර්ගය ආපසු හැරෙනවා. මම මුලින්ම එංගලන්තයේ ජීවත් වුණේ. පසුගිය වසරේදී ගීත කිහිපයක් පටිගත කළා. මගේ ගායන හැකියාව දැකලා නයනසේන වන්නිනායක වැනි අයගෙන් ලද සහයෝගයත් එක්ක තමයි පසුගිය වසරේ නාලක අංජන කුමාර ගීතවත් කරපු ඔහු විසින් රචිත තුන්මංසලක් කියන ගීතයට සම්බන්ධ වෙන්නෙ. ඒ සමහම දුමාල් වර්ණකුලසූරිය සංගීතවත් කරපු ගීතයක් ගායනා කරනවා ප්‍රියංගි ගුණවර්ධනයන් විසින් රචිත. එමෙන්ම දයාන් විතාරණයන් සමග යුග ගීතයකටත් සම්බන්ධ වෙනවා. එය සංගීතවත් කළේ අරුණ ගුණවර්ධනයන් විසිනුයි. ඔය ගීත තුනත් එක්ක තමයි මම යළි කලා ක්ෂේත්‍රයට එන්නෙ.

එමෙන්ම මගේ ගීයක් රාජ්‍ය සංගීත සම්මාන උලෙළේ හොඳම ගායනයට නිර්දේශ වීමත් තමා මගේ හැරවුම් ලක්ෂය වුණේ. මේ ආපු ගමන් මගේ විශාලම ප්‍රතිචාර ලද ගීතය තමයි අප්සරාවියේ ගීතය. එහි හැම පැත්තෙන්ම ලොකු විශේෂයක් තිබෙනවා යැයි මට දැනෙනවා. මට හිතෙනවා එහි කුමක් හෝ ගැලපීමක් නිසා රසික හදවත් තුළට ගෙන ගියා කියා.

ඉදිරියේදී නිර්මාණ කිහිපයක් එළිදක්වන්න සූදානම් වෙනවා වගේම කවුරුන් හෝ අනුග්‍රාහක භවතෙකු සිටිනවා නම් මගේ ප්‍රසංගයක් මෙන්ම සංයුක්ත තැටියක් එළිදක්වන්නත් මම සූදානම් ඒ සඳහා ෆේස්බුක්හි නිලක්ෂි රණසිංහයන් යනුවෙන් මා සම්බන්ධ කරගත හැකියි.

සටහන ඉඳුනිල් සින්දු