(නිමන්ති රණසිංහ)

සමගි ජන බලවේගය කොළඹදී පැවැත්වීමට නියමිත උද්ඝෝෂණයේදි ජනාධිපති කාර්යාලය, ජනාධිපති මන්දිරය, මුදල් අමාත්‍යාංශය, ගාලුමුවදොර පිටිය සහ ඒ ආශ්‍රිත මාර්ග කිහිපයකට අද (20) පස්වරු 2 සිට රාත්‍රී 7 දක්වා කාලය තුළ ඇතුළුවීමෙන් වළකින ලෙස කොළඹ කොටුව මහේස්ත්‍රාත් තිළිණ ගමගේ මහතා අද (20) නියෝග කළේය.

කොටුව, කොල්ලුපිටිය සහ කොම්පඤ්ඤවීදිය යන පොලිස් ස්ථාන අධිකරනයෙන්  කළ ඉල්ලීමක් සැලකිල්ලට ගත් මහේස්ත්‍රාත්වරයා මෙම නියෝගය නිකුත් කළේය.

අදාල උද්ඝෝෂණයේදී නීති විරෝධී ආකාරයට උද්ඝෝෂණකරුවන් හැසිරුණහොත් හෝ, මහජන පීඩාවක් ඇති වන අයුරින් කටයුතු කළහොත් පොලිස් බලතල පාවිච්චි කරන ලෙසට ද මෙහිදී මහේස්ත්‍රාත්වරයා පොලිසියට නියම කළේය.

 සමගි ජන බලවේගයේ මහලේකම් රංජිත් මද්දුමබණ්ඩාර ඇතුළු එහි සංවිධායකයින් 7 දෙනෙකු සහ ඊට සහභාගි වන තැනැත්තන්ට  අදාළ නියෝගය නිකුත් කර ඇත .