අලින්ට තියෙන ආදරය ආසාව ඇවිදින්නෝ විදියට කිසිම අඩුවක් පාඩුවක් නෑ. ඒ නිසා අපි අදත් යන්නේ අලි බලන්න. මේ වෙද්දි Walk 121 එක්ක අපි ඔබව රටේ බොහෝ තැන්වල අලි පෙන්නන්න එක්ක ගිහින් තියෙනවා. අද යන්නේ කොළඹ ඉඳලා ටිකක් දුර තැනකට අලි බලන්න. මේ මින්නේරිය ජාතික වනෝද්‍යානය. සීගිරි දඹුලු ගිහින් එන ගමන් බොහොම පහසුවෙන් ඔබට මින්නේරියටත් යන්න පුළුවන්. ලංකාවේ අලි ඇතුන් නරඹන්නටම සුදුසු වනෝද්‍යාන කිහිපයක් ම තිබෙනවා. යාල, උඩවලව, හබරණ, ලාහුගල, විල්පත්තුව හා මින්නේරිය එවැනි තැන් කිහිපයක්. මේ තැන්වලින් වන අලින් සියැසින් දැකගන්න හොඳම තැන මින්නේරිය වන උයන කියලයි පසුගියදා එහි සංචාරය කළ අපට නම් හැඟී ගියේ.

කොළඹ සිට හබරණ හරහා පොළොන්නරැව දක්වා විහිද යන ප්‍රධාන මාර්ගයේ කිලෝමීටර 182ක් ගිය තැන මින්නේරිය ජාතික වනෝද්‍යානය හමු වෙනවා. උද්‍යානයේ ප්‍රධාන පිවිසුම කොළඹ - පොළොන්නරැව මාර්ගයේ හබරණ පසු කර කිලෝ මීටර අටක් විතර ගියාට පසු අඹගස්වැව පිහිටා තිබෙනවා. හබරණ පොළොන්නරැව ප්‍රධාන පාරේ පොළොන්නරැව නගරයේ සිට කිලෝ මීටර 36ක් ගිය තැන අඹගස්වැව උද්‍යාන පිවිසුමට ළඟා වෙන්නත් පුළුවන්. කොහොම හරි මින්නේරියේ අලි බලන්න යන්න හොඳම කාලයක් තමයි මේ දවස්වල ගත වෙන්නේ. මේ දවස්වල රටේ බොහෝ ප්‍රදේශවලට වගේම මින්නේරියත් නියඟය. ඉතින් මින්නේරිය ජලාශයේ වතුර පොදක් බීමේ රිසියෙන් කැලේ හැංඟිලා ඉන්න බොහෝ සතුන් එළියට එනවා. අලි ෆොටෝ ටික මේ වටේට තියෙනවානේ. ඒවා බලන්න. අපි යුතුකම වශයෙන් මින්නේරි යද්දී සැලකිලිමත් වෙන්න ඕන කාරණා කියන්නම්.

ප්‍රධානම කාරණය තමයි අලි බලන්න යන වෙලාව. හවස 4-5 වගේ වෙද්දී අලි ඇත්තු වැව් පිටියට ගොඩ වෙනවා. වතුර බීලා 5.30 -6 වගේ වෙද්දී ආපහු කැලේට යනවා. ඒ නිසා මින්නේරිය වනෝද්‍යානයේ පිවිසුම් දොර ළඟට හවස 3 වෙද්දිවත් ගිහින් ඉන්න. ඒ වගේම ඔබට ඔබ එහි යන්නේ ජිප් රථයක් වගේ එකක නම් ඒකෙන් වනෝද්‍යානය ඇතුළට යන්න අවසර ගන්න පුළුවන්. ඒකට යම් මුදලක් ගෙවන්න ඕන. හැබැයි වාහනයේ ආරක්ෂාවටත්, පහසුවෙන් අලි සිටින ස්ථාන සොයා ගැනිමටත්, කැලෑව ඇතුළේ පාරවල් නොදැන අතරමං නොවීමටත් හොඳම දේ තමයි සෆාරි ජිප් රථයක සේවාව ලබාගැනීම. අපි කණ්ඩායම සීගිරියේ ඉඳලම මින්නේරිය බලන්න ජිප් රථයක් රැපියල් 3500ක වගේ මිලකට සපයා ගත්තා. ඒ කියන්නේ ඔබට ඊට වඩා අඩුවට අනිවාර් යෙන්ම සපයා ගන්න පුළුවන්. ප්‍රවේශම්වීමේ ගාස්තු, වාහනයට ගෙවන ටිකට්පත් ආදිය ඔබම මිලදී ගන්න ඕනෑ. වනාන්තරය කියන්නේ අපි ගිහින් එන තැනක් වුණාට වන සතුන්ට ඒ ඔවුන්ගේ නි‍ෙවස. අනුන්ගේ ගෙදරකට ගිහින් හැසිරෙන විදියට අපි නොකිව්වට වැදගත් ඔබ ඒක දන්නවා. අන්න ඒ විදියට ගිහින් හැසිරිලා එන්න.

ප්‍රසාද්