(ඩයනා උදයංගනී)

ස්පුට්නික් - v පළමු මාත්‍රාව ලබාගෙන ඇති අයට දෙවන මාත්‍රාව සඳහා අවශ්‍ය එමඑන්නත් 1,20,000 ක ප්‍රමාණයක් ලබන සඳුදා (20) මෙරටට ලැබීමට නියමිත බව සෞඛ්‍ය අමාත්‍ය  කෙහෙලිය රඹුක්වැල්ල මහතා පැවසීය.

මෙම එන්නත් පළමු මාත්‍රාව ලැබූ මහනුවර දිස්ත්‍රික්කයේ ජනතාව සඳහා මෙම දෙවන මාත්‍රාව ලබා දීමට නියමිත බව ඇමතිවරයා සඳහන් කළේය.

 ඒ අනුව මෙරට  ස්පුට්නික්- v එන්නතෙහි පළමු මාත්‍රාව ලැබූ සියලු දෙනා පූර්ණ එන්නත්කරණයට ලක් වනු ඇතැයි ද ඇමතිවරයා කීවේය.

මහනුවර දිස්ත්‍රික්කයේ 1,50,000 ක පිරිසක් සඳහා ස්පුට්නික් එන්නත ලබාදුන් අතර ඒ අතරින් අවුරුදු 60ට වැඩි ජ්‍යෙෂ්ඨ පුරවැසියන් සඳහා එහි දෙවන මාත්‍රාව ද ලබා දී තිබේ.

ඉතිරි පිරිසට දෙවන මාත්‍රාව ලබාදීම දින තුනක් ඇතුළත ආරම්භ කෙරෙන බවත්, එළඹෙන සතිය අවසන් වන විට එම එන්නත්කරණය අවසන් කිරීමට හැකිවනු බවත්අමාත්‍යවරයා ප්‍රකාශ කළේය.

 සෞඛ්‍ය අමාත්‍ය කෙහෙලිය රඹුක්වැල්ල මහතා මේ බව පැවසුවේ ඖෂධ ආනායනය, ගබඩා කිරීම හා බෙදාහැරීම ඇතුළු කටයුතු සම්බන්ධයෙන් එම අමාත්‍යාංශයේ දී අද (15) පැවති සමාලෝචන සාකච්ඡාවකින් අනතුරුව මාධ්‍ය වෙත අදහස් දක්වමිනි.

මේ වන විට මෙරට ජනගහනයෙන් හරි අඩක් පූර්ණ එන්නත්කරණය කර ඇතැයි කී ඇමතිවරයා, ස්පුට්නික් එන්නත් තොගය  ලැබීමත් සමඟ ඉදිරි සති කිහිපය තුළ එම මහනුවර දිස්ත්‍රික්කයේ වයස අවුරුදු 20 ඉක්ම වූ සියයට 99 ට වැඩි පිරිසක් එන්නත්කරණය කර අවසන් වන බවද කීය.