(ඩයනා උදයංගනී)

අ.පො.ස සාමාන්‍ය පෙළ විභාගය දැනට සැලසුම් කර තිබෙන පරිදි ජනවාරි 18 වැනිසා ආරම්භ කරන්නේ ද යන්න ගැන තීරණයක් ඉදිරි දින 10 තුළ ගන්නා බව අධ්‍යාපන අමාත්‍ය, මහාචාර්ය ජී.එල්. පීරිස් මහතා පැවසීය.

බස්නාහිර පළාතේ හා දැනට හුදෙකලා කර ඇති ප්‍රදේශවල පාසල් දෙසැම්බර් පළමු සතිය හෝ එම මස මුල් දින 10 තුළ විවෘත කිරීමට නොහැකි වුවහොත් එම පාසල්වල විභාගයට පෙනී සිටින දරුවන්ට අසාධාරණයක් වන බැවින් දැනට තීරණය කර ඇති පරිදි විභාගය ආරම්භ කිරීම සාධාරණ නැතැයි ද අමාත්‍යවරයා සඳහන් කළේය.

ඒ අනුව ඉදිරි දින කිහිපයේදී එම පාසල්වල සාමාන්‍ය පෙළ පන්ති ආරම්භ නොකළොත් විභාගය කල්දැමීම උචිතදැයි සලකා බැලීමට සිදුවන බව මහාචාර්ය ජී.එල්.පීරිස් මහතා කීවේය.

විභාගයට පෙනී සිටින සිසුන්ගෙන් කොටසකට පන්ති පැවැත්වෙද්දී කොටසකට පන්ති නොපවත්වා විභාගය පැවැත්වීම සාධාරණ නැතැයි කී ඇමතිවරයා දුරස්ථ අධ්‍යාපන ක්‍රමවේද මගින් ඔවුන්ට වන පාඩුව අවම කිරීමේ වැඩපිළිවෙලක් දියත් කර ඇතත් එය සම්පූර්ණ විකල්පයක් යැයි නොසිතන  බව ද පැවසීය.

අමාත්‍යවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (26) පැවති මාධ්‍ය හමුවක් අමතමිනි.

බොහෝ ප්‍රදේශයන්හි පාසල්වල විෂය නිර්දේශය නිසි ලෙස ආවරණය කර නොමැති නිසා ප්‍රශ්න පත්‍ර සකස් කිරීමේදී සහනයක් දෙනවාද? යනුවෙන් මෙහිදී මාධ්‍යවේදියෙකු නැගූ පැනයකට පිළිතුරු දුන් ඇමතිවරයා පැවසුවේ ඒ සම්බන්ධයෙන් වෙනත් රටවල අත්දැකීම් අධ්‍යයනය කිරීමට සිදුවන බවයි.

ප්‍රශ්න පත්‍ර සකස් කිරීම සම්පූර්ණ විෂය නිර්දේශය අනුව සිදුකරන්නේ ද ආවරණය කළ කොටස පමණක් ආවරණය වන පරිදි සකස් කරන්නේද ආදී වශයෙන් ඉදිරියේදී සළකා බලන බව කී ජී.එල් පීරිස් මහතා ආරම්භ කරන දිනය

සංශෝධනය කළ යුතුද, විභාගය පවත්වනවා නම් කුමන ක්‍රමවේදයක් යටතේ ද යන්න ගැන දින 10ක් තුළ තීරණයක් ගන්නා බව සඳහන් කළේය.