ජාතික අයෝමය ශූරයෙකු වන සිසිලසිරි සෝමපාලගේ තරග තහනම වසර 5ක කාලයක් සඳහා අත්හිටුවීමට ශ්‍රී ලංකා කායවර්ධන සම්මේලනය තීරණය කර තිබේ. වසර 2010 දී ජාතික අයෝමය ශූරයාට තේරුණු සෝමපාලගේ තරග තහනම ක‍්‍රීඩා ඇමැති මහින්දානන්ද අලූත්ගමගේ මහතාගේ උපදෙස් පරිදි පසුගිය පෙබරවාරි 1 වැනිදා සිට ඉවත් කිරීමට පියවර ගත් බව කායවර්ධන සම්මේලනයේ සභාපති කපිල කුමාර මහතා ”ලංකාදීප”යට පැවැසීය. ඒ සම්බන්ධයෙන් වැඩිදුරටත් අදහස් දැක් වූ කපිල කුමාර මහතා පැවසුවේ එම ක‍්‍රීඩකයාට එරෙහිව වසර 5කට පනවා තිබූ තරග තහනම එකී කාලසීමාවට බලපැවැත්වෙන පරිදි අත්හිටුවීමට පියවර ගත් බවයි. වසර 2010 බහරේන් රාජ්‍යයේ දී පැවැති ආසියානු අයෝමය ශූරයා තේරීමේ තරගාවලියට ශ්‍රී ලංකා කායවර්ධන සම්මේලනයේ අනුදැනුමෙන් තොරව සහභාගි වීමේ චෝදනාව මත වසර 2010 නොවැම්බර් 27 වැනිදා සිට 2015 නොවැම්බර් 27 වැනිදා දක්වා බලපැවැත්වෙන පරිදි කායවර්ධන සම්මේලනයේ විනය කමිටුව විසින් ඔහුට මෙම තරග තහනම පනවන ලදී. කෙසේ වුවත් සෝමපාල පැවසුවේ පසුගිය පෙබරවාරි 11 වැනිදා පැවැති 2011 වසර සඳහා වන ජාතික කායවර්ධන තරගාවලියට පුහුණු කටයුතු අතපසුවීම නිසා තමන් සහභාගි නොවූ බවයි.