(සුජිත් හේවාජුලිගේ සහ  අංජුල මහික වීරරත්න)

සහකාර පොලිස් අධිකාරීවරුන්ට උසස්වීම් පිරිනැමීමේදී  යම් නිලධාරියකුට අසාධාරණයක්වී ඇත්නම් ඒ අයට සාධාරණය ඉටු කිරීමට පියවර ගන්නා බව මහජන ආරක්ෂක අමාත්‍ය සරත් වීරසේකර මහතා පාර්ලිමේන්තුවේදී  අද (9) පැවැසීය.

පොලිස් ගැසට් පත්‍රයේ (2018) සඳහන් පොලිස් ස්ථානවල  ශ්‍රේණි අනුව  පොලිස් නිලධාරීන්ට ලකුණු ලබාදී ඇතැයිද  හෙතෙම  සඳහන් කළේය.

ඔහු මෙසේ පැවසුවේ ජාතික ජන බලවේගය පක්ෂයේ නායක අනුර කුමාර දිසානායක මහතා පාර්ලිමේන්තුවේ ස්ථාවර නියෝග 27 (2) යටතේ මතු කළ ප්‍රශ්නයකට පිළිතුරු දෙමිනි.

එම ශ්‍රේණි වෙනස්වී ඇති බවට පසුව නිකුත් කෙරුණු ගැසට් පත්‍රවල සඳහන්වී ඇත්නම් ඒ අයට  අදාල ශ්‍රේණියේ ලකුණු ලබාදී ඇතැයිද  ඔහු කීවේය.

වැඩිවූ පුරප්පාඩු සඳහා  නැවත අයදුම්පත් කැඳවීමට පියවර ගත් බවත් මුලින්ම අයදුම්පත් කැඳවූයේ පුරප්පාඩු හැට තුනක් සඳහා පමණක් බවත්  ඔහු පැවසුවේය.

ජනාධිපති වරයාගේ උපදෙස් පරිදි පුරප්පාඩු සංඛ්‍යාව 230දක්වා ඉහළ නැංවූ බව පැවසූ වීරසේකර මහතා සැක උපදවන කිසිදු දෙයක් මෙතන සිදුවී නැතැයිද  ප්‍රකාශ කළේය.

වසර ගණනාවකට පසු මෙ පමණ පිරිසකට උසස් උසස්වීම් ලබාදීමට හැකිවීම ගැන  සතුටු වන බවද  ඔහු පැවසුවේය.

මෙම කටයුත්තේදී යම් නිලධාරියෙකුට අසාධාරණයක්වී ඇති නම් රාජ්‍ය සේවා කොමිෂන් සභාවට  මේ සම්බන්ධයෙන් අභියාචනයක් යොමු කළ හැකි බවත් ඒ අයට සාධාරණය ඉටු කිරීමට තමා  ඇප කැපවී සිටින බවත්  ඇමැතිවරයා පැවැසීය.