සහල් මිල පිළිබඳව එකිනෙකා විවේචනය කරමින් සිටීම නවතා සහල් මිල ඉහළ යාම නැවැත්වීමට ගත හැකි හොඳම පියවරක් ගන්නැයි පාරිභෝගික අයිතීන් සුරැකීමේ ජාතික ව්‍යාපාරය රජයෙන් ඉල්ලීමක් කරයි.

සහල් මිල සීඝ්‍රයෙන් ඉහළ යාම නිසා පාරිභෝගිකයා සහල් මිලදී ගත නොහැකි තත්ත්වයකට පත්ව ඇතැයි ඔවුහු පෙන්වා දෙති.තවද මෙම තත්ත්වය මුල් කරගෙන බොරදියේ මාළු බෑමටද සූදානමින් තවත් පාර්ශවද මග බලා සිටින බව එම ව්‍යාපාරයේ සභාපති රංජිත් විතානගේ මහතා  ලංකාදිපයට පැවැසීය.

සහල් හිගයට පිළියමක් ලෙස සහල් ආනයනය කිරීම සදහා කැබිනට් මණ්ඩලයේ අනුමැතිය ලබා දුන්නද තවම මෙරටට සහල් ආනයනය කර නැති බව ඔහු කීවේය.

සහල් මිල වැඩිවීමට ඉඩ දී මහ පරිමාණයෙන් ලාභ ලැබීමට පිරිසක් සූදානමින් සිටීම මෙයට හේතුව බවත් ඔහු සඳහන් කළේය. එම ජාවාරමට ඉඩ නොදී මෙම අර්බුදයට ඉක්මනින් මැදිහත් වෙන ලෙසත් පාරිභෝගිකයාට සහනයක් ලබා දිමට කටයුතු කරන ලෙසත් රජයෙන් ඉල්ලන බව විතානගේ මහතා කීය.