(ගයාන් සූරියඅරච්චි)

මිනී මැරුම් චෝදනා යටතේ රක්ෂිත බන්ධානාගර කර සිටින සැකකරුවන් තිදෙනකුට ඇප ලබාදීම සදහා මහේස්ත්‍රාත්වරයාට මුදල් ලබාදිය යුතු බව පවසා කාන්තාවන් තිදෙනකුගෙන් රුපියල් 60,000 ක මුදලක් ලබාගත් බව කියන කලවංචිකුඩි මහේස්ත්‍රාත්වරයාගේ ආරක්ෂක නිලධාරියකු ලෙස කටයුතු කළ කොස්තාපල්වරයකු අත්අඩංගුවට ගත් බව මඩකලපුව ජ්‍යෙෂ්ඨ පොලිස් අධිකාරී කාර්යාලය පවසයි.

මෙසේ අත්අඩංගුවට ගෙන ඇත්තේ කලවංචිකුඩි පොලිස් ස්ථානයට අනුයුක්තව රාජකාරී කළ පොලිස් කොස්තාපල්වරයෙකි.

පසුව පොරොන්දු වූ පරිදි උසාවි දිනයේදී රක්ෂිත බන්ධානාගාර ගත කර සිටින සැකකරුවන්ට ඇප නොලැබීම හේතුවෙන් එම කාන්තාවන් තිදෙනා නඩු විභාග අවසන්වීමෙන් අනතුරුව මහේස්ත්‍රාත්වරයාගෙන් ඒ බව විමසා ඇති අතර සැකකාර කොස්තාපල්වරයා රුපියල් 60,000 ක මුදලක් ලබාගත් බව ද එම කාන්තාවන් මහේස්ත්‍රාත්වරයාට පවසා ඇති බව පොලිසිය කියයි.

ඒ අනුව මහේස්ත්‍රාත්වරයා විසින් ඒ බව පොලිසියට දැනුම්දීමෙන් අනතුරුව සැකකාර කොස්තාපල්වරයා අත්අඩංගුවට ගනු ලැබීය.

අත්අඩංගුවට ගත් සැකකාර කොස්තාපල්වරයාට සහ අල්ලස් ලබාදුන් කාන්තාවන් තිදෙනාට එරෙහිව ඉදිරි නීතිමය කටයුතු සිදුකිරීම සදහා අල්ලස් හෝ දූෂණ චෝදනා විමර්ශන කොමිසන් සභාවට බාර දෙන බව ද පොලිසිය පවසයි.