"වේදිකා නාට්‍යයයක් හදන කොට ඒ සඳහා දීර්ඝ කාලයක් කැපවෙන්න සිද්ධ වෙනවා. ඒ විශේෂ කැපවීම කරන්න කාලය හොයාගන්න එකත් ලේසි නැහැ."

වසර 22කට කළින් නාට්‍ය ක්ෂේත්‍රයේ නියැලුණු අය තුළ තිබුණ ඒ කැපවීම ඔබ අදත් දකිනවද?

මගේ නාට්‍යවලට ගන්නෙ ඒ වගේ කැපවෙන්න පුළුවන් අය විතරයි. මේ වැඩෙත් ඉන්නෙ මාත් එක්ක කැමැත්තෙන්ම කැපවෙන්න පුළුවන් අය විතරයි. ශ්‍රීයන්ත මෙන්ඩිස්, කුසුම් රේණු, ජයලාල් රෝහණ, වසන්ත විට්ටච්චි, සංජීව දිසානායක, මහේන්ද්‍ර වීරරත්න, නුරාධිකා සේරසිංහ, අයිශාරා අතුකෝරාල, නදීශා රෑපසිංහ, ගාමිණී ජයලත් සහ තිස්ස ගුණතිලක මෙහි රංගනයෙන් දායක වෙනවා. චින්තක ජයකොඩි සංගීත අධ්‍යක්ෂක ලෙසත්, නිපුනි මෙන්ඩිස් ඇඳුම් නිර්මාණ ශිල්පිනි ලෙසත් කටයුතු කරනවා. අංග රචනය භාරව ඉන්නෙ වසන්ත විට්ටච්චි.

එදා මෙදා කාලය තුළ නාට්‍ය ක්ෂේත්‍රයේ ඔබ යම් වෙනසක් දකිනවාද?

වෙනස්කම් තිබෙන බව ඇහෙන්න ලැබෙනවා. හැබැයි මට ඒක අදාළ නැහැ. හේතුව මම තෝරාගත්ත කණ්ඩායම එදා හිටිය අය වගේම අදත් වෙනස් නොවුණු අය. අලුත් කෙනෙක් ආවත් පරණ අය වගේම කැපවෙන්න කැමති අය. ටෙලිනාට්‍ය නිසා අද බොහෝ අලුත් පරපුයෙත් කාර්යබහුල වෙලා. ඇතැම් අය ක්ෂණිකව ලැබෙන ජනප්‍රියත්වය පසුපස හඹා යනවා. ඒත් අලුත් පරපුරෙත් තමන්ගෙ වෘත්තීය වෙනුවෙන් කැපවෙන අය ඉන්නවා.

නාට්‍ය ක්ෂේත්‍රයේ අලුත් ප්‍රවණතා ගැන?

ඔව්. දැන් අලුත් ප්‍රවණතා දකින්න ලැබෙනවා. විශේෂයෙන්ම අපේ අලුත් පරපුර නව සොයාගැනීම් ගැන උනන්දු වෙනවා. ඒ ගොල්ලො ලෝකෙත් එක්ක වැඩියෙන් සම්බන්ධවෙලා ඉන්නවා. ඉස්සර වගේ නෙවෙයි, අද ඒ සඳහා බොහෝ පහසුකම් තියෙනවා. ලෝකය ඉස්සර වගේ දුර නැහැ. හැබැයි අවුරැදු 22කට පෙරත් අපි නාට්‍ය කළේ කිසියම් ජාත්‍යන්තර අත්දැකීම් එක්ක. නමුත් අද යටිතල පහසුකම් අතින් නම් රට තුළ තියෙන්නෙ අවගමනයක්. විශේෂයෙන් රංග ශාලා පිළිබඳ ගැටලුව විශාල ලෙස අද නාට්‍ය ෙව්දීන්ට බලපානවා. මීට අවුරැදු ගාණකට කලින් අපට තිබුණු දුෂ්කරතා අද තවත් වැඩිවෙලා.

"හංකිති 13" නාට්‍යය ගැන විස්තර කරනවානම්?

අපි සෝරෝම එක්තරා ආකාරයක ලොකු නිද්‍රාවක ඉන්නවා කියලා මට පේනවා. මමත්, අපි ඔක්කොම ලොකු නින්දක ඉන්නෙ. මේ නින්දෙදි අපි නිදාගන්නවා විතරක් නෙවෙයි, අපි නින්දෙදි කතා කරනවා. අපි නින්දෙන් විවිධ සන්නිවේදන කටයුතුවලත් යෙදෙනවා. ඒත් ඒවා යථාර්ථයෙන් එහාට ගිය සිහිනමය තත්ත්වයක තියෙන්නෙ. මේ සිහිනමය තත්ත්වයේ ඉන්නකොට මට පේනවා මිනිස්සු Freeze වෙලා බලන් ඉන්නකොට පාරවල් ගමන් කරනවා. රංග ශාලාවල නළු නිළියො Freeze වෙලා ඉන්නකොට ප්‍රේක්ෂාගාරය රඟපානවා. ඒත් මේ දේවල් අතරතුර මට පේනවා මගේ එක ඉන්ද්‍රියක් ඇහැරං ඉන්නවා. ඒ තමයි හෘද සාක්ෂිය. මේක වහන්න කොච්චර උත්සාහ කළත් වහන්න බැහැ. ඒ කතාව තමයි %හංකිති 13^ ට පාදක වෙන්නෙ.

අද නාට්‍යවල දකින "හාස්‍යමය" ගුණාංගය ගැන ඔබ මොනවද හිතන්නෙ?

මේකෙත් හාස්‍යය තියෙනවා. ඇත්තටම හාස්‍ය කියන්නෙ නාට්‍ය කලාවෙ තියෙන හොඳ අංගයක්. මේකෙ තියෙන්නෙ අපි සුලබව දකින හාස්‍යය නෙවෙයි. අද දකින හාස්‍ය රුල්ල වාණිජකරණය වෙච්ච නාට්‍ය කලාවක් ඉස්මතු කරනවා. විකුණන්නෙ හාස්‍ය. සැබෑ හාස්‍ය වේදිකාවට අවශ්‍යයි. ගැඹුරැ දේවල් ප්‍රකාශ කරන්නත් හාස්‍ය යොදාගන්න පුළුවන්. බාල විදිහටත් පුළුවන්.

අලුතින් චිත්‍රපටයක් කරන්න අදහසක් නැද්ද?

ඇයි නැත්තෙ. අලුත් චිත්‍රපටයකට ලෑස්ති වෙලා ඉන්නකොට තමයි මේ නාට්‍ය පටන් ගත්තෙ. ශ්‍රියන්ත ඇතුළු මගේ යාළුවෝ කීපදෙනෙක්ම යෝජනා කළා නාට්‍යයක් කරමු කියලා. නැත්නම් මම අර චිත්‍රපටය තමයි කරන්න හිටියෙ. මේ නාට්‍යයෙන් පස්සෙ මම නොපමාව චිත්‍රපටයේ වැඩ පටන් ගන්නවා.

රමේෂ් උවයිස්