ශ්‍රී ලංකා හොකී සම්මේලනයේ වාර්ෂික නිලවරණය පැවැත්වීම වළක්වාලමින්  අභියාචනාධිකරණය අද (28) අතුරු නියෝගයක් නිකුත් කළේය.

ලබන අගෝස්තු 03 වැනිදා තෙක් මෙම අතුරු නියෝගය බලපැවැත්වේ. ශ්‍රී ලංකා හොකී සම්මේලනයේ වාර්ෂික නිලවරණය අද පැවැත්වීමට නියමිතව තිබූ අතර මෙම අතුරු නියෝගයත් සමඟ නිලවරණය පැවැත්වීමද අභියාචනාධිකරණය විසින් අත්හිටවීය.

ශ්‍රී ලංකා හොකී සම්මේලනයට නව නිලධාරී මඩුල්ලක් තෝරා පත් කර ගැනීම සඳහා නිලවරණයක් කැඳවීමට ක‍්‍රීඩා සංවර්ධන දෙපාර්තමේන්තු අධ්‍යක්ෂ ජනරාල්වරයා ගත් තීරණයට එරෙහිව හොකී සංගම් කිහිපයක් ගොනු කළ රිට් පෙත්සමක් ඊයේ(28* අභියාචනාධිකරණය හමුවේ කැඳවූ අතර එහිදී පෙත්සමේ කරුණූ සලකා බලමින් මෙම නියෝගය පැනැවීය.

පෙත්සම අභියාචනාධිකරණ සභාපති විනිසුරු විජිත් මළල්ගොඩ සහ එච්.සී.ජේ.මඩවල යන මහත්ම මහත්මීන්ගෙන් යුතු විනිසුරු මඩුල්ලක් හමුවේ කැඳවිණි.

මෙලෙස නිලවරණයක් කැඳවීමට ක‍්‍රීඩා බලධාරීන්ට නොහැකි යැයි පවසමින් රාජ්‍ය සේවා හොකී සංගමය, කළුතර හොකී සංගමය, ගම්පහ හොකී සංගමය ඇතුළු මෙරට හොකී සංගම් කිහිපයක් ගොනු කර තිබූ මෙම පෙත්සමෙහි වගඋත්තරකරුවන් ලෙස ක‍්‍රීඩා සංවර්ධන දෙපාර්තමේන්තු අධ්‍යක්ෂ ජනරාල්,ක‍්‍රීඩා අමාත්‍යංශයේ හොකී ප‍්‍රධාන විධායක  නිලධාරි චමිලනාදී හේරත් ඇතුළු අට දෙනෙකු නම් කරනු ලැබ ඇත.

හොකී සංගම් වෙනුවෙන් නීතිඥ සංජය ෆොන්සේකා මහතාගේ උපදෙස් මත ජනාධිපති නීතීඥ කුවේර ද සොයිසා මහතා පෙනී සිටියේය. ලබන අගෝස්තු 03 වැනිදා පෙත්සම යළි කැඳවේ.