( රංජිත් රාජපක්ෂ) 

අධික වර්ෂාවත් සමග ගිනිගත්හේන රංජුරාව ප්‍රදේශයේ සදසිරිගම ප්‍රදේශයට පිවිසෙන මාර්ගයේ කොටසක් නායයාමෙන්  හැටන් කොළඹ ප්‍රධාන මාර්ගයේ ගමනා ගමන කටයුතුවලට බාධා පැමිණ ඇති බව නුවරඑලිය දිස්ත්‍රික් ආපදා කලමණාකරණ ඒකකයේ සහකාර අධ්‍යක්ෂක රංජිත් අලහකොන් මහතා පැවසිය.

ගිනිගත්හේන සදසිරිගම ප්‍රදේශයේ පවුල් 60 ක් පමණ ජිවත්වන බවත්, එම ගම්මානයට පිවිසිමට තිබු එකම මාර්ගය නායයාම නිසා තමන් දැඩි පිඩාවට පත් වි සිටින බව ද  එම ගම්මානයේ පදිංචිකරුවෝ කියති.

නාය ගිය මාර්ගයේ තවත් කොටසක් නායයාමට සක්‍රිය වි ඇති බවත්, නායගිය ස්ථානයේ පස් කදු හැටන් කොළඹ ප්‍රධාන මාර්ගයට කඩා වැටිම නිසා එම මාර්ගයේ ගමනා ගමන කටයුතු එක් මංතිරුවකට පමණක් සිමා කර ඇති බවද සහකාර අධ්‍යක්ෂකවරයා පැවසිය.

පවතින වර්ෂාවත් සමග ගිනිගත්හේන නගරයේ වෙලදසැලක ගොඩනැගිල්ලක බිත්ති කිහිපයක්ද ඊයේ (08) දින කඩා වැටුණු බවත්, ඉන් කිසිවෙකුට අනතුරක් සිදු වි නොමැති බව ගිනිගත්හේන පොලිසිය පැවසිය.

මේ අතර කාසල්රි සහ මවුස්සාකැලේ ජලපෝෂක ප්‍රදේශවලට ඇද හැලෙන අධික වර්ෂාවත් සමග කාසල්රි ජලාශය පිටාර මට්ටමට ඉතා ආසන්න වි ඇත.

අද (09) දිනයෙත් නුවරඑලිය දිස්ත්‍රික්කයේ ස්ථාන කිහිපයකටම අධික වැසි පවති.