ස්වර්ණවාහිනි නාළිකාව ආරම්භයේදී විකාශය වූ "හාට් බීට්" සංගීතමය වැඩසටහන නැරඹූ ඔබට නිරාෂා ඒකනායක අමතක නොවනු ඇත. වැඩසටහන් ඉදිරිපත් කරන්නියක ලෙස කලා ක්ෂේත්‍රයට එක්වූ නිරාෂා පසුව රංගන ශිල්පිනියක ලෙසද ඔබගේ ආදරය දිනාගත්තේ ස්වර්ණවාහිනී නාළිකාවේම විකාශය වූ "මගේ සඳ ඔබ" ටෙලි නාට්‍යය තුළිනි. දැනට ඇමෙරිකාවේ පදිංචිව සිටින නිරාෂා මේ දිනවල ලංකාවට පැමිණ සිටින්නීය.

"ඔව්, ලංකාවට ආවෙ මගේ දෙවැනි ගීතය නිර්මාණය කරන්න. "හුස්මක් පවා" තමයි ගීතය නම් කරලා තියෙන්නෙ. මේක යුග ගීතයක්. මා සමගින් සිරස සුපර් ස්ටාර් රියැලිටි තරගාවලියෙන් සංගීත ක්ෂේත්‍රයට පිවිසි සංඛ දිනෙත් තමයි මාත් සමග මේ ගීතය ගායනා කරන්නෙ. මේ දවස්වල මෙහි ගීත රූප රචනාවට සූදානම් වෙනවා. ලංකාවෙන් ආපහු යන්න කලින් මෙහි ගීත රූප රචනාවේ වැඩ නිමකරන්න තමයි බලාපොරොත්තුව."

ඇත්තටම, පුංචි කාලේ ඉඳලා මට ලොකු ආසාවක් තිබුණා ගායිකාවක් වෙන්න. නමුත්, ලංකාවෙ හිටිය කාලයේදී මට තිබුණ කාර්ය බහුලත්වයත් එක්ක ගීත ගායනයට යොමු වෙන්න කාලයක් හොයාගන්න බැරි වුණා. මම විවාහ වෙලා ඇමෙරිකාවේ පදිංචියට ගියා. එහිදී තමයි ගීත ගායනයට යොමු වෙන්න අදහසක් ආවේ. මොකද, මට මෙහෙදී වගේ ලොකු කාර්ය බහුලත්වයක් එහිදි තිබුණෙ නැති නිසා. මගේ සැමියා තමයි මාව ඒ පැත්තට යොමු කරන්න ගොඩක් උනන්දු වුණේ."